Pơgê 28-6, Liên đoàn Lao động dêh char Đắk Lắk pơgơ̆r tơƀâp, hơpăh hŏk ƀŏng ăn kon hơ ‘lơ̆p đe đoan viên, bơngai jang kơ teh đak, bơngai bơ̆ jang đei tơdrong arih xa pơmat tat. Tơdrong ‘nâu hlôi hơpăh 103 kơsuơ̆t hŏk ƀŏng đei kơjă 1 triu hlak jên ăn hŏk tro đei tơdrong arih xa pơmat tat hŏk rơgei, jên 1,5 triu hăm hŏk tro pơti. ‘Nâu jĭ dôm hŏk tro đei rơih đơ̆ng 21 công đoàn tơ̆ tơring.

Đei iŏk hŏk ƀŏng yak hlŏh pơmat tat hŏk hơgei ‘măng mă âu, oh Lâm Tâm Như, hŏk tro lăm 9D, hnam trưng THCS Nguyễn Văn Cừ, plt Buôn Ma Thuột, đei mĕ jĭ công nhân oei bơ̆ jang tơ̆ Công ty vei lăng cham char Đông Phương pơma akhan: jên hŏk ƀŏng âu tơgŭm ăn ŏh đei đon adrin hlŏh dơ̆ng vă hŏk pơhrăm mă ‘lơ̆ng, jing bơngai đei yoa ăn tơpôl, tơgŭm ăn mĕ ƀă sơđơ̆ng jơhngâm bơ̆ jang. Tơ̆ tơdrong hơpăh jên hŏk ƀŏng âu mơ̆n, đe oh đei năng đe siêk, vang ngôi pơchơt tơ̆ ‘ngoăih păng tơƀâp pơma nuh hăm lơ bôl boăl tơhnơr băl.