Ăh 'năr hơtuch kơ giĕng, Thươ̆ng wĭ Y Biza Rya, Kơdră Khul hơvơn pơtho kon pơlei kơ Anih Linh vei xơlam teh Ia Rvê, atŭm hăm khul grŭp truh apong kon pơlei thôn 1, xăh Ea Rvê.  Thươ̆ng wĭ Y Biza ăn tơbăt, tơroi hơtŏk hlôh vao găh khôi luơ̆t ăn kon pơlei jing minh trong vă kon pơlei hlôh vao hơdăh păng atŭm jơhngơ̆m vei xơđơ̆ng tơpôl tơ̆ tơring xơlam teh:  Anih Linh vei xơlam teh adoi nhen rim anih jang, rim tơring hơnơ̆ng jang hadoi pơgơ̆r dôm tơdrong tơroi tơbăt găh luơ̆t đei tơrĕk truh kon pơlei hăm trong tơroi tơbăt atŭm hăm dôm tơdrong hŏk hôp thôn, hŏk hôp chi ƀô̆ dăh mă dôm tơdrong hop akŏm tơ̆ dôm thôn. Mă tơm noh kon pơlei băt hơdăh păng pơm kiơ̆ ƀlep dôm tơchơ̆t đơ̆ng khôi luơ̆t teh đak.

Pơmai  Lâm Thị Hợp, thôn 1, xăh Ia Rvê ăn tơbăt, jê̆ 17 xơnăm jăk đơ̆ng pơlei pơla Bến Tre truh apŭng Ea Sup năm jang, gơnơm đei tơdrong tơgŭm, tơrĕk đơ̆ng jơnŭm pơgơ̆r tơring păng khul grŭp jang tơ̆ tơring mă unh hnam hlôh vao găh dôm trong pơkăp jang đơ̆ng Đảng, khôi luơ̆t teh đak xơđơ̆ng pơm jang, băt tơdrong trŏ noh jang, tơdrong yoch noh tang găn: Đe met ƀô̆ đô̆i vei xơlam teh duh tơrĕk ăn kon pơlei đang kơ noh chă tơroi pơtho ăn kon pơlei. Kiơ̆ đơ̆ng dôm tơdrong akŏm tơroi tơbăt noh inh duh hlôh vao hơdăh găh khôi luơ̆t păng duh jang atŭm hăm rim khul jang vă vei lăng xơđơ̆ng xơlam teh.

Xăh xơlam teh Ia Rvê, apŭng Ea Súp, dêh char Đăk Lăk dang ei đei hloh 2.000 unh hnam hăm hloh 6.900 măt bơngai kơ 23 hơdrung bơngai atŭm erih jang xa. Lơ̆m dôm xơnăm kơ âu, atŭm hăm jơnŭm pơgơ̆r tơring, Anih linh vei xơlam teh Ia Rvê hlôi kơtă tơguăt hăm tơring, vang jang xek tơlang dôm tơdrong vei xơđơ̆ng tơ̆ tơring pơxĕl, xơđơ̆ng tơpôl chĭn trĭ, xơđơ̆ng tơpôl lơ̆m tơring. Thươ̆ng tă Nguyễn Xuân Sơn, jang Chĭnh trĭ tơ̆ Anih linh vei xơlam teh Ia Rvê ăn tơbăt: tơguăt kơjăp hăm kon pơlei, pơm kiơ̆ pơkăp “atŭm xŏng xa, atŭm pơm jang, atŭm pơma nơ̆r kon kông”, Ia Rvê hlôi pơjing đei đon lui lơ̆m tơpôl kon pơlei vă vei xơđơ̆ng xơlam teh: Anih linh đei 17 'nu pơm jang tơ̆ tơring. 'Nguaih kơ xơnong juăt jang, tơdrong chă hơlen, tang găn ma twĭ, hơvơn pơtho kon pơlei noh jang tơnăp tơdrong chă hơvơn kon pơlei pơm kiơ̆ tơnăp trong pơkăp jang đơ̆ng Đảng, khôi luơ̆t tơchơ̆t đơ̆ng Teh đak, hơvơn kon pơlei pơm kiơ̆ ƀlep tơchơ̆t tơring xơlam, ưh đei pơm glăi tơchơ̆t tơring xơlam, vei xơđơ̆ng tơpôl lơ̆m thôn, pơlei, xăh.

Kiơ̆ Đăi tă Đỗ Quang Thấm, Phŏ Chĭn ủy Anih tơm pơgơ̆r Ƀô̆ đô̆i vei xơlam teh dêh char Đăk Lăk, khei năr âu ki, atŭm hăm tơdrong tơgŭm kon pơlei hơtŏk mŭk drăm, xơđơ̆ng tơdrong erih, khul linh vei xơlam teh hlôi pơm jang lơ trong vă tơroi pơtho khôi luơ̆t truh kon pơlei tơring xơlam teh. Đơ̆ng tơdrong tơroi tơbăt kiơ̆ aloa rapor pơre nơ̆r vih vơ̆t tơ̆ âu tơ̆ to, akŏm tơ̆ thôn pơlei, axong hla bar tơbang dăh mă truh rim unh hnam, pơm jang atŭm hăm lơ tơdrong vă tơgŭm kon pơlei choh jang xa... Xơnăm 2022, ƀô̆ đô̆i vei xơlam teh Đăk Lăk hlôi pơgơ̆r lơ tơdrong tơroi tơbăt, hơvơn kon pơlei tơ̆ dôm xăh xơlam teh vang jang tang găn păng tơjră pơrang jĭ, tang găn păng tơjră dôm tơdrong pơm glăi găh ma twĭ, tĕch răt bơngai, kơdâu glăi găn xơlam teh. Atŭm hăm noh, pơjing dôm “Kơtuh săch khôi luơ̆t trong xơlam”, jang hadoi hăm tơring akŏm dôm khul tơgŭm găh khôi luơ̆t, kâu lak ƀô̆ pơm kiơ̆ luơ̆t pơkăp... Truh dang ei tơ̆ Đăk Lăk hlôi đei 26 kơtuh săch khôi luơ̆t hăm hloh 20 rơbâu kơsâ̆p săch; 38 Khul vei xơđơ̆ng tơpôl, vei xơđơ̆ng trong xơlam teh... Đăi tă Đỗ Quang Thấm ăn tơbăt dơ̆ng: Minh lơ̆m dôm trong jang dang ei nhôn oei tơlĕch jang hadoi hăm tơring, noh jing tơdrong jang “Unh hnam drăkăn ưh đei pơm glăi pơkăp xơlam teh” păng “Thôn ưh đei hơdruh tơdăm pơm glăi khôi luơ̆t” vă pơlan xă adoi nhen tơdrong tơroi tơbăt đei tơlĕch jâ̆p jang. Atŭm hăm noh nhôn duh iŏk yua xơnong jang đơ̆ng đe kră pơlei, kơdră thôn, pơlei, bơngai đei kon pơlei lui yom vă jang tơnăp tơdrong tơroi tơbăt găh khôi luơ̆t ăn kon pơlei.

Dêh char Đăk Lăk đei 73km trong xơlam teh tơkuh hăm dêh char  Mondulkiri, teh đak Camphuchia; đei 4 xăh xơlam teh kơ 2 apŭng Ea Sup păng Buôn Đôn. Dôm tơdrong pơm jang tơrĕk hơtŏk mŭk drăm, vei lăng jơhngơ̆m jăn păng hơtŏk hlôh vao găh khôi luơ̆t ăn kon pơlei hlôi tơgop vei xơđơ̆ng chĭn trĭ, xơđơ̆ng tơpôl, pơjing tơring xơlam roi năr roi xơđơ̆ng hơtŏk tơ-iung.