Ƀok Huỳnh Văn Ánh, xăh Phú Lộc, apŭng Krông Năng, dêh char Dak Lak tôch kơ lăp đon ƀơ̆t pơm hla ar teh đak trực tuyến tơ̆ 1 ‘măng kơ xăh 1 trong ƀônh hiôk. Ưh khan lăp nôp hla ar hô sơ lơ̆m kơ măy pơ vih pơ văn teh đak trực tuyến mă sư oei rơih trong kla jên kiơ̆ kơmăy anih mong jên điện tử. Ƀok Huỳnh Văn Ánh tơroi: “Ĭnh hoei pă athei năm pơm hla ar asong the ƀao hiêm dăh mă hoei kơ pơm hla ar apĭnh kơ sô̆ chih tơbăt hơnăn bơngai tơ̆ Kŏng an. Đe sư pơkă năr hơ yơ ‘noh ĭnh truh ĭnh iŏk dôm hla ar 1 lơ̆m 3 tŏ 1 ‘măng. Oei jên kla kŭm thoi noh mơ̆n, ĭnh đei kơ sô̆ chih tơbăt ĭnh quét dăh mă gơih ăn păih âu tôch kơ ƀônh păng tơ tĕnh.”

Oei hăm ƀok Nguyễn Ngọc Anh, xăh Hoà An, apŭng Krông Păc, dêh char Dak Lak đơ̆ng rŏng kơ đei dôm bơngai jang lơ̆m grŭp Tơdrong jang  06 kơ xăh tơ roi tơbăt, sư ƀôh đei iŏk yua ƀơ̆t yua tài khoản chih tơbăt hơnăn điên tư nhen: ‘mơ ‘met đei jơnăr, jên yua ưh pă chih tơroi lơ kơ loăi hla ar, tơ jur lơ tơdrong pơm hla ar mưh pơm dôm hla ar hành chính teh đak, gơh tơplih kăn kươk kon pơlei păng dôm kơ loăi hla ar mưh tơ roi akŏm đei ƀôh lơ̆m kơ măy chih tơbăt hơnăn điện tử teh đak nhen: hla ar huơ̆r gre, ƀao hiêm pơgang... Ƀok Nguyễn Ngọc Anh hlôi ưh kơ ‘nhoen pơm hla ar chih măt: “Tơplih kơ sô̆, tăh pơm tơbăt hơnăn điện tử ‘nâu jĭ tơdrong đei yua tôch kơ tih ăn kon pơlei kơ na đei dôm anih jang khŭl grŭp kơ xăh, apŭng bơngơ̆t truh năm tơ̆ rim ŭnh hnam tơgŭm kon pơlei nhôn hlôh thoi yơ ‘noh tăh pơm kơ sô̆ tơbăt hơnăn điện tử tôch kơ hiôk hơnhăk ăn đei yua ăn kon pơlei lơ̆m bơ̆jang kŭm nhen pơm hla ar kơ na kon pơlei nhôn tôch kơ chhôk hơiă.”

Tơdrong jang 06 đơ̆ng Khŭl kơdră teh đak đei ƀơm truh lơ tơdrong, tơgop hơtŏk ‘lơ̆ng đei yua vei lăng teh đak lơ̆m lơ tơdrong jang. Hăm hơnăp jang tơm lơ̆m tơdrong jang kiơ̆ Tơdrong jang 06, khei ‘năr âu ki, pơgơ̆r sơng iŏk hơmet pơ ‘lơ̆ng hla ar hành chính, krao hơvơn, pơtho kon pơlei pơm hla ar asong kăn kươk kon pơlei, hơtŏk loi dơ̆ng dôm trong jang vei sơđơ̆ng jang đang dôm tơdrong hơgăt pơm rơgoh hla ar chih răk. Trung tá Trần Văn Dũng, kŏng an xăh Hoà An, apŭng Krông Păc, dêh char Dak Lak tơbăt: “Kŏng an xăh jang hơdai hăm dôm anih jang năm truh tơ̆ dôm pơlei pơla pơgơ̆r tăh pơm tơbăt hơnăn điện tử tơ̆ kơ sô̆ 1 ăn kon pơlei păng kŭm jang hơdai hăm khŭl vei lăng hành chính pơgơ̆r tăh pơm tơbăt hơnăn điện tử tơ̆ kơ sô̆ 2. Kiơ̆ đơ̆ng tơdrong jang pơm kiơ̆ ‘noh kon pơlei tôch kơ hơdrin tơgŭm găh tăh pơm tơbăt hơnăn điện tử hăm kon pơlei.”

Vă hơtŏk ‘lơ̆ng hơnăp jang đơ̆ng kơ dră anih jang đảng rim tơring lơ̆m tơlĕch jang kiơ̆ Tơdrong jang 06, ‘năr 20/3/2023, Khŭl chĕp kơ̆l pơgơ̆r Anih jang Đảng dêh char Dak Lak tơlĕch tơdrong tơchơ̆t kơ sô̆ 33 găh hơtŏk loi dơ̆ng tơdrong chĕp kơ̆l đơ̆ng rim kơdră anih jang Đảng lơ̆m tŭn pran tơlĕch jang Tơdrong jang hơtŏk tơiung iŏk yua hla ar chih răk kon pơlei oei sa, tơbăt hơnăn păng hơlen lăng điện tử pơyua ăn tơplih kơ sô̆ teh đak jăl jang 2022 - 2025, trĕng lăng truh sơ năm 2030 lơ̆m dêh char. Đơ̆ng tơdrong tơchơ̆t âu, Anih vei lăng kon pơlei dêh char Dak Lak tơlĕch ăn lơ trong vă jang vă tơlĕch jang Tơdrong jang. Hơdai hăm hlôi athei rim anih jang tơring pơjing vă jê̆ 2.400 grŭp bơ̆jang tơlĕch jang Tơdrong jang 06 đơ̆ng dêh char truh rim pơlei pơla, kueng kơ phô̆. Thuh dang ei, dêh char Dak Lak hlôi jang đang chih tơmơ̆t hloh 2,1 triệu tơdrong kơ tơ̆ng ang kon pơlei lơ̆m kơ măy chih răk teh đak găh kon pơlei oei sa, pơvei păng iŏk jang đei yua pơvih pơvăn teh đak găh tơdrong jang vei lăng sơđơ̆ng tơ̆ tơring. Hơdai hăm ‘noh, hlôi asong hloh 1,6 triệu the kăn kươk kon pơlei pơ klep chíp điện tử ăn kon pơlei, thu iŏk hloh 500 rơbâu tài khoản tơbăt hơnăn điện tử tơ̆ kơ sô̆ 1, kơ sô̆ 2. Kơmăy hơmet pơ ‘lơ̆ng hla ar hành chính kơ dêh char kŭm hlôi đei tơ goăt hăm anih chih răk teh đak găh kon pơlei oei sa, tơlĕch jang pơ vih pơvăn teh đak trực tuyến tơ̆ kơ sô̆ 3, kơ sô̆ 4 đei bơngơ̆t truh tŭn pran, mă loi ‘noh jĭ 25 pơ vih pơvăn teh đak kăl hloh găh Tơdrong jang 06 tơgop hơtŏk ‘lơ̆ng đei yua vei lăng hành chính pơyua ăn kon pơlei. Thiếu tướng Lê Vinh Quy, Kơdră vei lăng Kŏng an dêh char Dak Lak, phŏ grŭp bơ̆jang Tơdrong jang 06 kơ dêh char tơbăt: “'Nâu jĭ tơdrong jang đơ̆ng khŭl kơdră teh đak tơlĕch bơ̆jang kiơ̆ athei đei tơdrong vang jang đơ̆ng rim kơ dră rim anih jang tơdrong tơgŭm đơ̆ng đĭ đăng kon pơlei. Lơ̆m noh, khŭl linh kŏng an ‘noh jĭ tơm,pơgơ̆r, hơmet pơ ‘lơ̆ng đon tơchĕng, kăt iŏk kơtơ̆ng ang. Đĭ đăng athei lăng truh tơdrong đei yua atŭm ‘noh jĭ pơm tơdrong hiôk hloh ăn kon pơlei păng anih mơdro sa. Mă 2 ‘noh jĭ hơdrin tơroi tơbăt vă kon pơlei păng anih mơ dro sa ƀôh đei iŏk yua đơ̆ng tơdrong jang 06 ƀrư̆ ƀrư̆ pơ jing kon pơlei oei sa kơ sô̆, tơ pôl kơ sô̆.”

Hăm tơdrong pơgơ̆r đơ̆ng kơdră đảng, tơdrong pơ hnŏng lơ̆m bơ̆jang kiơ̆ đơ̆ng rim kơdră, dôm jơnei yak blŭng lơ̆m tơdrong tơlĕch jang kiơ̆ tơdrong jang 06 tơ̆ dêh char Dak Lak hlôi pơm tơdrong ‘lơ̆ng khôi luơ̆t ăn tơdrong hơtŏk loi dơ̆ng đei yua hơmet pơ ‘lơ̆ng pơvih pơvăn teh đak trực tuyến. Kiơ̆ đơ̆ng noh tơgop hơtŏk ‘lơ̆ng đei yua vei lăng teh đak pơm tơdrong hiôk ăn kon pơlei păng anih mơdro sa lơ̆m hơtŏk tơiung mŭk drăm tơpôl pơyua ăn tơdrong jang tơplih kơ sô̆ teh đak.