Brŏk tơ̆ hnam đơ̆ng rŏng 5 năr năm pơdơh ngôi tơ̆ Hơnih vei lăng bơngai đei kŏng kơ dêh char Dak Lak, lĭnh jĭ jăn Y Siêng Niê, plei Chiêng Kao, xăh Đắk Phơi, apŭng Lắk oei ƀĕnh tơdrong hiôk hơiă: “Năm chơt dêh, sŏng sa tôch kơ ‘lơ̆ng, vei lăng ‘lơ̆ng dêh. Dêh char Nghệ An dai đei, dêh char Sóc Trăng dai đei, apŭng Ea Kar hai, apŭng  Buôn Đôn hai, apŭng Ea Súp hai, apŭng Cư Kuin hai vang hơdai băl hơri “5 anh em trên một chiếc xe tăng”, đang kơ ‘noh “nổi lửa lên em”, chơt dêh, gơmăng hơ yơ kŭm hơri, tơ roi tơdrong đơ̆ng sơ̆, hơnih ‘nâu ĭnh tơblăh, hơ nih to ĭnh tơblăh. Tơ̆ kơ ‘năr ‘noh năm chă ngôi dăr pơlei tơm Buôn Ma Thuột.”

Lơ̆m hnam ‘nao man, ‘nhŏng Y Mực Liêng, kon drŏ dro lĭnh jĭ jăn Y Hiên Ông, oei tơ̆ plei Sruông, xăh Bông Krang, apŭng Lắk tơbăt, ưh pă athei tơtăm kơ tŏ bơngơ̆t kơ ‘mi kơna jơhngơ̆m đon ƀă sư hiôk ‘lơ̆ng, ŭnh hnam kŭm sơđơ̆ng jang sa, hơtŏk tơiung mŭk drăm: “Ƀă ĭnh đei kŏng hăm kach mang păng sư đei tơgŭm 1 khei 3 triệu păng teh đak tơgŭm dơ̆ng 50 triệu, ŭnh hnam tŏk iŏk dơ̆ng vă pơm hnam ăn kơ ƀă. Gơnang đơ̆ng đei teh đak tơgŭm jên vă bơngơ̆t ăn kơ sư păng oei sa rim năr kŭm đei tơgŭm vei lăng jơhngơ̆m jăn ‘lơ̆ng ƀiơ̆. Ĭnh apĭnh bơnê kơ khŭl kơdră tơring hlôi năm ngôi apĭnh jet gia păng asong tơmam ăn kơ sư.”

Kiơ̆ kơ yă Phạm Thị Lệ Vân, anih vei lăng bơngai jang lĭnh jĭ rơka tơpôl apŭng Lắk, vă đĭ đăng 1489 bơngai ŭnh hnam teh đak tơgŭm, bơngai đei kŏng tơ̆ apŭng tă kơ hlôi đei vei lăng ‘lơ̆ng păng đei tơdrong arih dang ăi dăh mă păi ƀiơ̆ kơ sô̆ jô̆ păh lăp. Dang ei apŭng tŏk bŏk akŏm tơgŭm vă ưh pă đei ŭnh hnam hơ yơ athei arih mơmat tat: “Hăm apŭng Lắk ‘noh tơdrong jang tơroi tơbăt păng kla jên tơgŭm ăn bơngai âu ‘noh ‘lơ̆ng tơtom, mă lei oei đei 12 ŭnh hnam đei bơngai oei lơ̆m ŭnh hnam dơnuh hin. Vă hơdrin ăn 12 ŭnh hnam ‘noh klăih đơ̆ng dơnuh hin ‘noh kŭm pơm hla ar tơ roi tơbăt ăn Anih vei lăng bơngai jang ‘noh kŭm đei trong tơlĕch jang mơ̆ng kiơ̆ tơdrong hiôk rim ŭnh hnam ‘noh tơgŭm hnam, tơ dăh đei hnam bơih ‘noh tơgŭm rơmo dăh mă hơdrĕch ‘long pơtăm dăh mă tơgŭm kơ sâp hla ar ‘mơ ‘met jên.”

Kiơ̆ kơ Anih vei lăng Bơngai jang lĭnh jĭ rơka păng tơpôl dêh char Dak Lak, dang ei lơ̆m dêh char đei hloh 45.000 ‘nu bơngai đei kŏng hăm kach mang, lơ̆m noh hloh 10.000 ‘nu bơngai tŏk bŏk sa jên tơgŭm rim khei. Lơ̆m dôm sơnăm âu ki, dôm tơdrong jang vei lăng ăn bơngai đei kŏng păng ŭnh hnam teh đak tơgŭm ling lang đei dêh char Dak Lak bơngơ̆t truh ƀlep tơdrong. Hơdrô̆ sơnăm ‘nâu, dêh char hlôi pơgơ̆r lơ ‘măng hăm vă jê̆ 400 ‘nu bơngai đei kŏng năm vei lăng hơtŏk ‘lơ̆ng jơhngơ̆m pran akŏm, năm chă ngôi tơmang lăng; bơ̆jang kiơ̆ năm ngôi, asong tơmam ăn dôm bơngai đei kŏng hăm akŏp jên hloh 15 ti hlak jên. Ƀơ̆t ‘năr 27/7 sơnăm ‘nâu, dêh char kŭm ‘măn hloh 6 ti hlak jên vă vei lăng ăn bơngai đei kŏng păng ŭnh hnam teh đak tơgŭm.

Mă đơ̆ng thoi noh ră, ƀok Nguyễn Quang Thuân, Phŏ Kơdră Anih vei lăng bơngai jang lĭnh jĭ rơka păng tơpôl dêh char Dak Lak tơbăt, jô̆ truh hơtuch sơnăm 2022, dêh char oei đei hloh 900 ŭnh hnam teh đak tơgŭm găh grŭp dơnuh hin kiơ̆ hơgăt lơ trong, hloh 600 ŭnh hnam oei mơmat tat găh hnam oei. Tơ̆ hơnăp kơnh, dêh char gô akŏm rim jên, tơmam vă ưh pă đei ŭnh hnam dơnuh hin lơ̆m ŭnh hnam teh đak tơgŭm păng bơngai đei kŏng:  “Hơdrin truh đĭ sơnăm 2024 gô hơmet ‘lơ̆ng mă đei hăm dôm ŭnh hnam tŏk bŏk mơmat tat găh hnam oei, mă 2 ‘noh jĭ hơnhăk ăn lĕch klăih đơ̆ng dơnuh hin. Klăih đơ̆ng dơnuh hin tơ̆ âu ‘noh jĭ lơ tơdrong tơm, tơdrong tơm găh lơ trong đei lơ tơdrong hơgăt rŏ lăng ‘noh jĭ jang hơdai hăm dôm anih jang rim tơdrong jang đơ̆ng Anih jang ‘noh vei lăng vă đei hơnăp jang hơmet ‘lơ̆ng păng oei hăm dôm ŭnh hnam ưh pă lơ̆m sơnăm jang dăh mă ưh kơ đei teh jang sa ‘noh athei tơmơ̆t lơ̆m tơgŭm tơpôl rim khei păng ăn lĕch đơ̆ng hơnăn ŭnh hnam dơnuh hin. Dêh char gô đei trong jang ‘lơ̆ng hloh vă hơmet ‘lơ̆ng tơgŭm dôm ŭnh hnam teh đak tơgŭm”.