Lơ̆m pơbŭng hnam ‘mêm mơnat ‘nao đei tơ iung pơjing ming man să vă jê̆ 70m2, kơjă kơjên 200 triu hlak jên, mŏ Nguyễn Thị Tặng, đảng viên găh Hơnih jang đảng phương Thành Công, pơlei tơm Buôn Ma Thuột tôch chơt hơ iă ‘nă hal. Hăm akŏp jang sa iŏk đei kơ klo akăn yă lơ̆m 1 khei hloh 10 triu hlak jên, lăp măh chă răt sa kơ ‘năr, vei lăng năng tông ăn 2 ‘nu kon hơ ‘lơ̆p hŏk pơhrăm. Gơnơm tơdrong tơgum djru tơtom 70 triu hlak jên đơ̆ng Kon jên mong “Đảng viên pơkom pơm kiơ̆ jơhngơ̆m đon ‘lơ̆ng Ƀok Hô” kơ pơlei tơm Buôn Ma Thuột păng tơdong tơgŭm djru đơ̆ng ‘nhŏng oh, dang ei tơdrong hơpơi ‘mĕh vă đei hnam kơjăp ‘lơ̆ng kơ mŏ Tăng mă đei jing tơpă.“Ưh kơ ngêh truh năr au đei pơbŭng hnam ‘nau, ba lăp tơchĕng lăp răt đei teh đĕch, găh hnam ‘noh ba jei tim pơ̆n tơchĕng truh, kơ yuơ kon jên vă pơm hnam ‘noh lơ pơtêng hăm tơdrong jang sa iŏk đei kơ klo akăn nhi chă rong ‘me 2 ‘nu kon păng ŭnh hnam oei đei mĕ kră dơ̆ng. Đei hnam au ba chơt hơ iă dêh, tang măt ŭnh hnam bơnê kơ rim đảng viên lơ̆m hơnih đảng lăng tông nông gia ăn ŭnh hnam.”

Kơ yuơ sơnăm ‘lŏ kră, pă đei jơhngơ̆m jang sa, ŭnh hnam tơnap tap kơna ƀok Nguyễn Văn Châu 62 sơnăm, 30 sơnăm jang Đảng oei tơ̆ Koeng kơphô̆ 5, Phương Tự An, pơlei tơm Buôn Ma Thuột oei tim mă kĕ vă ming hơmet hnam man đei ming man đunh kơ au 30 sơnăm mă đơ̆ng hnam au đĭ hư răm kơtang. Tơ̆ hơnăp tơdrong au, khei 4/2021, đei tơguư̆m ăn 25 triu hlak jên đơ̆ng “Kon jên mong đảng viên pơkom pơm kiơ̆ jơhngơ̆m đon ‘lơ̆ng Ƀok Hô” kơ pơlei tơm Buôn Ma Thuột atŭm hăm kon jên ŭnh hnam mong răk, ŭnh hnam ƀok hlôi ming hơmet đang hnam so sĕnh au.“Âu ki hnam jei pă gan ‘lơ̆ng, hnăt hnot đei Hơnih Đảng pơlei tơm lăng ba, tơgŭm djru, ƀar sơnăm au ba jei hiôk ƀiơ̆ mư̆h ‘mi kial kơ yuơ jơhngơ̆m jăn pă gan pran jăng bơih. Bơnê lơ kơ khul kơdră.”

Đei pơjing iung jang đơ̆ng sơnăm 2013 truh dang ei, Kon jên mong răk đảng viên pơkom pơm kiơ̆ jơhngơ̆m đon ‘lơ̆ng Ƀok Hô kơ pơlei tơm Buôn Ma Thuột hlôi pơjing đei trong jang hơ-iă, hơvơn đei lơ kang ƀô̆, đảng viên păng kon pơlei vang jang. Vă pơjing đei Kon jên mong, rim hơnih đảng ling lang chă pơrô̆ pơrôp kang ƀô̆ đảng viên hơnih jang kơdih vang chă tơra tơgop: Hăm khul 1 lơ̆m 1 ‘nu 1 khei ‘noh 30.000 hlak jên, khul 2 chă tơra tơgop tŏ sĕt hloh 15.000 hlak jên lơ̆m 1 khei, khul 3 chă tơra tơgop 6.000 hlak jên năm tơ̆ lơ lơ̆m 1 khei păng khul mă 4 chă hơvơn mơ̆ng kơdih chă tơra tơgop. Kon jên mong răk sơnăm 2013 truh dang ei kơ Kon jên mong răk đảng viên pơkom đei truh 8 ti 600 triu hlak jên. Đơ̆ng noh, tơgŭm djru ming man păng ming hơmet 15 pơbŭng hnam, tơgŭm atŏk tơ iung mŭk drăm ăn 11 ‘nu, tơgŭm ming hơmet jĭ jăn ăn 697 ‘nu păng tơgŭm djru au to ăn mĭnh ƀar ‘nu bơngai. Ƀok Trần Văn Châu, Kơ iĕng Kơdră chĕp pơgơ̆r Ban Tuyên Giáo Thành ủy Buôn Ma Thuột, dêh char Đak Lăk tơbăt:“Kon jên mong au jĭ tôch gĭt kăl. Mă blŭng ‘nŏh tơgŭm djru ăn rim đảng viên ŭnh hnam tơnap tap, đei tơdrong sar bar păng mĭnh ƀar ‘nu đảng viên dơnuh ‘mĕh vă jang sa mă lei ưh kơ đei kon jên tơmơ̆t jang ‘nŏh nhôn jei hlôi tơgum djru ‘noh đe sư jang sa jei đei iŏk yau kơjăp, dăh mă mĭnh ƀar ‘nu đảng viên hnam oei hiăh hiok, đảng viên ưh kơ đei kon jên hu vă ming man hnam oei ‘nŏh khul chĕp pơgơ̆r Kon jên mong răk au chă lăng hơlen păng tơgŭm djru tơtom, đe sư ƀôh hơdăh khul Đảng ling lang lăng ba đơ̆ng rŏng.”

Đơ̆ng kon jên pơkom tŏ sĕt sot hlôi jing Kon jên mong răk lơ. ‘Nau jing tơdrong jang tôch gĭt kăl, vă jang kiơ̆ yan au hloi lơ̆m tơdrong hŏk pơhrăm păng pơm kiơ̆ jơhngơ̆m đon ‘lơ̆ng kơ Ƀok Hô đơ̆ng Hơnih Đảng păng kon pơlei kơ pơlei tơm Buôn Ma Thuột, tơgop tơgŭm dôm bơngai đei iŏk yua ăn teh đak, bơngai đảng viên tơnap tap kĕ yak hloh tơdrong tơnap tap hrat hrĭn pơm sơđơ̆ng erih sa.