Hrei au lơ̆m dêh char đei hloh 1.000 hnam trương hŏk đơ̆ng mâm non trŭh jăl pêng, hăm vă jê̆ 470.000 ‘nu hŏk tro, lơ̆m au hŏk tro kon kông tơ̆ mâm non tơmơ̆t 35%, jăl kơđeh tơmơ̆t 40%. Sơnăm hŏk 2021 - 2022, đei 98% hŏk tro kon kông jăl kơđeh hlôi hok keh đang tơdrong pơtho nơ̆r Yuăn; măt bơngai hŏk tro kon kông mơ̆t hŏk lăm 1 ƀlep sơnăm (6 sơnăm) jơnei 99,8%.

Khei năr kơnh, Dơnŏ anih vei lăng Hnam trương pơtho pơhrăm Đăk Lăk hơnơ̆ng atŏk kơtang bơ̆ jang pơtho hok pơhrăm ming tơdrong bơ̆ jang ăn khul kang ƀô̆, ƀok thây kô pơtho, trong pơgơ̆r pơtho nơ̆r Yuăn ăn hŏk tro kon kông lăm mâm non, jăl kơđeh. Atŏk lơ jơ pơtho nơ̆r Yuăn lơ̆m 2 hơyŭh dơ̆ng lơ̆m 1 giĕng đơ̆ng lăm 1 trŭh lăm 5; atŏk pơtho nơ̆r Yuăn ‘moi kiơ̆ nơ̆r hơdrĕch hơdrung kơdĭh păng vei răk tơdrong oei sa joăt joe rim hơdrĕch hơdrung; atok pơtho nơ̆r Yuăn lơ̆m rim tơdrong hŏk pơhrăm păng tơdrong jang pơtho pơhrăm…