Kiơ̆ đơ̆ng Hơnih jang Mặt trận tổ quốc Việt Nam dêh char Đak Lăk, hloh 20 sơnăm pơgơ̆r, Năr lêh Tơgoăt tơgoăl rim hơdrĕch hơdrung hlôi lang să kơtang lơ̆m tơdrong erih sa kon pơlei tơ̆ tơring.

Hăm trong sơđơ̆ng păng pơkom, jơnei, rim sơnăm, đĭ đăng pơlei pơla kơ dêh char jei pơgơ̆r năr lêh ngăl. Lơ tơring tơrang pơgơ̆r pôk ăn hnam tơgoăt tơgoăl, năm ngôi pôk tơmam drăm ăn uưnh hnam đei iŏk yua ăn teh đak, ŭnh hnam dơnuh; pôk bơnê rim khul, rim bơngai jang ‘lơ̆ng lơ̆m kon pơlei pơla. Mặt trận Tổ quốc rim tơring tơ̆ Đak Lăk hlôi chă pơrô̆ hơvơn đei hloh 280 ti hlak jên ăn Hơnih mong jên kơ yuơ bơngai dơnuh, tơgum ming man vă jê̆ 5.500 pơbŭng hnam Tơgoăt tơgoăl păng hloh 2.000 hơnih jang pơyoa ăn kon pơlei. Mă kăl, 2 sơnăm pơrang jĭ hơbuh Covid-19 pơrăm, dêh char sơng iŏk đei tơdrong tơgŭm djru bơ̆ jang tang găn pơrang jĭ hăm akŏp kon jên păng tơmam drăm hloh 55 ti 600 triu hlak jên.