Hơngŭr chă hơmet pơ ‘ngoăih hơdroong păng ăn pơbe sa, ‘nhŏng Nay Y Than, hơdrung Jrai, oei tơ̆ buôn Dang, tơring Ea Hleo, apŭng Ea Hleo, dêh char Đak Lăk tơbăt, ‘nau ƀar tŏ pơbe yŏng đơ̆ng Kŏng ang apŭng Ea Hleo ‘nao pôk ăn lơ̆m tơdrong jang “Rei pơtăm găr ‘lơ̆ng tơ̆ trong chôt vih bơngai bơ̆h ƀơm pơm tơdrong glăi” đơ̆ng tŏk bŏk khei 7 sơnăm au.

Yuơ mơ̆ng kiơ̆ khul kơnê̆ chă hlŭ pơdôr, đunh kơ au 9 sơnăm ‘nhŏng Nay Y Than hlôi tĕch pơgŏh teh jang sa, hnam oei, chĕp ba kon akăn kơdau jăk năm tơ̆ Cam Pu Chia đơ̆ng rŏng ‘nŏh đei mĭnh ‘nu bơngai tơjră hăm teh đak chông ba năm oei tơ̆ Thái Lan. Ngêh ngăi tơdrong hơrih sa hiôk jơnap, mă lei kơ yuơ nơ̆r pơma phara dih băl, jang sa đei iŏk yua tŏ sĕt, ưh kơ măh vă tăh sa ăn ŭnh hnam kơna tơdrong erih sa kơ ŭnh hnam ‘nhŏng tôch mơmat tat. Đei kơdră tơring tơgŭm djru chôt vih tơ̆ pơlei pơla păng đei chă pơtho khan phăl hơlăng, ‘nhŏng hlôi ƀôh hơdăh tơdrong mă bơ̆n bơ̆h ƀơm păng hơdrin chă jang sa ‘lơ̆ng hơ iă dơ̆ng. Nay Y Than tơroi:“Sơnăm 2014 ĭnh mơ̆ng kiơ̆ nơ̆r khul kơnê̆ chă pơhlŭ pơdôr năm tơ̆ Thái Lan, đei kŏng ang tơring tơgŭm djru ĭnh brŏk vih dơ̆ng tơ̆ Việt Nam kơna ba ƀô̆h hơdăh tơdrong mă ba pơm ‘nŏh yoch, glăi, kơna đơ̆ng dang ei truh hơnô̆ hơnăp kơnh hơdrin hơrih sa ‘lơ̆ng hơ iă atŭm hăm pơlei pơla. Dang ei kŏng ang apŭng, dêh char pôk ăn pơbe ăn kơ ĭnh kơna ba tôch hơ iă, đei pơbe vă ŭnh hnam nhôn jang sa, hơdrin atŏk tơ iung mŭk drăm”.

Atŭm hăm ŭnh hnam Nay Y Than oei đei 5 ŭnh hnam anai jei sơng iŏk pơbe đơ̆ng tơdrong jang “Rei pơtăm găr ‘lơ̆ng tơ̆ trong chôt vih bơngai bơ̆h ƀơm pơm tơdrong glăi”. ‘Nau ‘nŏh rim ŭnh hnam tơnap tap hloh găh ŭnh hnam đei bơngai ‘nao brŏk vih đơ̆ng kơdau jăk tơ̆ teh đak đe, ‘nao brŏk đơ̆ng hnam pơnă, dôm bơngai hlôi bơ̆h ƀơm pơm tơdrong yoch ‘meh vă hơmet pơ ‘lơ̆ng jơhngơ̆m đon oei sa gơ̆h găt dơ̆ng. Kon jên pôk ăn pơbe vă jê̆ 100 triu hlak jên, kơ yuơ kŏng ang apŭng Ea Hleo chă pơrô̆ hơvơn vang tơra lơ̆m khul păng đei mĭnh ƀar ‘nu bơngai đei jơhngơ̆m đon ‘lơ̆ng tơgŭm ăn.

Hơdrol kơ ‘noh, lơ̆m sơnăm 2021, hăm trong jang au, Kŏng ang apŭng Ea Hleo jei hlôi chă hơvơn kon jên răt pôk ăn 10 tŏ pơbe ăn rim unh hnam, vă tơgŭm ăn kon pơlei atŏk tơ iung mŭk drăm. Truh dang ei, rim ŭnh hnam hlôi chă rong đei hloh 30 tŏ pơbe, hơrih sa hlôi sơđơ̆ng, đe sư hlôh yak hloh dơnuh hin păng kơdih chă pôk ăn pơbe ăn rim ŭnh hnam tơnap tap anai tơ̆ tơring dơ̆ng.

Ư̆h khan lăp pôk ăn pơbe ăn kon pơlei, rim khei, kang ƀô̆ kŏng ang kơ Kŏng ang apŭng oei klăh asong dih băl năm truh rim pơlei, vang năm hop akŏm hăm kon pơlei vă băt hơdăh dôm tơdrong, pơjing đei tơdrong tơgoăt tơgoăl ‘lơ̆ng hơ iă tơ̆ tơring, pôk ăn phe, mi tôm păng tơmam drăm sa kăl ăn kon pơlei tơnap tap. Lơ kang ƀô̆ kŏng ang oei hơdrin hŏk nơ̆r kon kông vă chă pơma dơnuh hăm kon pơlei, vang vei lăng năng tông sơđơ̆ng tơ̆ rim pơlei pơla. Ƀok Nay Niết, hơdrung Jrai, oei lơ̆m buôn Cham, tơring Ea Sol, apŭng Ea Hleo tơroi:“Kŏng ang hơnơ̆ng chă ăn phe, mi tôm ăn kon pơlei lơ̆m pơlei. Đe sư jei hơnơ̆ng năm ngôi, pơtho khan ăn kon pơlei, mă kăl lơ̆m hop akŏm pơlei, đơ̆ng kŏng ang, thôn trơng jei pơtho khan, pơrô̆ pơrôp kon pơlei. Kon pơlei lơ̆m pơlei bu bu jei kơchăng, hơdrin jang sa, ưh kơ mơ̆ng khul kơnê̆ chă pơhlŭ pơdôr, pơchôih dăh mă chă pơm glăi khôi luơ̆t au to bơih”.

Vă yak hơdoi tơ iung pơjing hơrih sa ‘lơ̆ng rŏ tơ̆ tơring, kŏng ang apŭng Ea Hleo iung jang hơdoi kơjăp hăm kơdră tơring, păng rim khul lui khop chă pơrô̆ pơrôp, pơtho khan ăn kon pơlei vang iung jang rim tơdrong jang, tơ iung pơjing ŭnh hnam hơrih sa ‘lơ̆ng, vang iung jang tơ iung pơjing tơring tơrang ‘nao. Kŏng ang jei iung jang hơdoi hăm rim pơlei pơla pơgơ̆r Joh ayo kơdŏ soang-đă ƀŏng lŏng tơplŏng kơdau vă atŏk kơtang tơgoăt tơgoăl dih băl ƀar păh kon pơlei hăm khul kŏng ang. Ƀok Y Jô Suê Ksơr, Mục sư vei lăng Chi hội Tin lành Ea Sol, tơring Ea Sol, apŭng Ea Hleo tơbăt:“Yak hơdoi hăm kon pơlei ‘noh kŏng ang tơring, apŭng iung jang hơdoi pơrô̆ pơrôp pơtho khan lơ̆m khul tơdăh ŭnh hnam ayơ oei mong răk rim ƀrơ̆m phao păng tơmam đôh lơ̆m hnam ‘noh dăh năm ba ăn kŏng ang hloi vă sơđơ̆ng ăn kơ dih, ŭnh hnam, veh ver đei tơdrong au to. Jei chă pơtho khan ăn kon pơlei găh tơdrong pơm kiơ̆ kơ jăp dôm tơdrong tơchơ̆t hao gre rĕnh ƀlep pơkăp, mưh hao gre yok trong nŏh yơ̆l môk kŭp. Chă pơtho khan ăn kon pơlei hơdrin jang sa, atŏk tơ iung mŭk drăm, tơ iung pơjing hơrih sa lơ̆m ŭnh hnam roi năr roi sơđơ̆ng păng atŏk tơ iung”.

Kiơ̆ đơ̆ng Thượng tá Nguyễn Công Hòa, Kơdră chĕp pơgơ̆r Kŏng ang apŭng Ea Hleo, yak hơdoi vang atŏk tơ iung mŭk drăm, yak hơdoi lơ̆m bơ̆ jang vei lăng sơđơ̆ng dơ̆ng kơjăp păng yak hơdoi tơ iung pơjing hơrih sa ‘lơ̆ng hơ iă ‘noh 3 tơdrong tơm kơ trong jang “3 yak hơdoi” đei Khul kơdră chĕp pơgơ̆r Đảng Kŏng ang apŭng tơlĕch ăn tơ̆ tơring đơ̆ng sơnăm 2021 truh dang ei. Tơdrong jang au hlôi iŏk đei tơdrong lăp đon, jang kiơ̆ kơtang đơ̆ng rim răih kŏng ang lơ̆m hơnih bơ̆ jang. Dôm tơdrong jang hơdăh tơ̆ tơring tơgop pơjing đei tơdrong tơgoăt tơgoăl dih băl ‘lơ̆ng liĕm ƀar păh khul kŏng ang hăm kon pơlei, tơgŭm ăn tơdrong sơđơ̆ng dơ̆ng kơ jăp tơring đei jang kiơ̆ roi năr roi ‘lơ̆ng hloh.“Bơ̆ jang pơrô̆ pơrôp kon pơlei hrei au ‘nŏh jing tơdrong jang hơnơ̆ng, đei lơ trong jang, lơ̆m au đei trong jang “3 yak hơdoi” hlôi tơlĕch jang kiơ̆ păng atŏk tơ iung ‘lơ̆ng liĕm. Kŏng ang apŭng jei chă hơvơn tơpôl vang tơgŭm djru adoi nhen kơdih chă tơgop vă răt dôm pơbe, phe, mi tôm păng dôm tơmam drăm sa anai. Tơdrong jang au hlôi tơbăt hơdăh jơhngơ̆m đon ‘lơ̆ng rŏ gĭt kăl đơ̆ng khul kŏng ang hăm kon pơlei vă kon pơlei dă ƀiơ̆ tơnap tap”.

Đơ̆ng tơdrong jang tơjê̆ kon pơlei, tơklep kơjăp hăm tơring, kŏng ang apŭng Ea Hleo hlôi tơlĕch jang răt tơgŭm phe ƀa, tơmam drăm sa vă tơgŭm djru kon pơlei, chă hơlêm, pôk hơpăh vă tơplih iŏk ƀrơ̆m phao au to. Gơnơm lơ loh, kon pơlei hlôi năm ba ăn kơ rơbau tŏ ƀrơ̆m phao pơm kơdih păng tơmam đôh rim kơ loăi. Trong jang đơ̆ng kŏng ang apŭng Ea Hleo đei kơdră chĕp pơgơ̆r Kŏng ang dêh char Đak Lăk hôn bơnê, đei lơ hơnih jang lơ̆m dêh char jang kiơ̆ păng lang să, tơgop pơm sơđơ̆ng dơ̆ng kơjăp tơ̆ rim tơring tơrang pơlei pơla.