Ƀlep lơ̆m jơ ‘năr Têt sơnăm au, dêh char Đăk Lăk jang kiơ̆ pôk ăn kon jên 500.000 hlak jên lơ̆m 1 ‘nu kang ƀô̆ bơ̆ jang, kang ƀô pơdơ̆h jang, khŭl ƀô̆ đô̆i kŏng ang, bơngai đei iŏk yau ăn Teh đak; hăm 1 trĭu hlak jên lơ̆m 1 ‘nu ăn rim kră pơlei, thôn trơng, bơngai jang ‘lơ̆ng; hăm 1 trĭu 300.000 hlak jên lơ̆m 1 ‘nu ăn dôm bơngai đei iŏk yau ăn teh đak kơtang hlŏh.

Găh pôk ăn tơmam drăm, hăm tơpôl mĭnh tơnô̆ tơmam drăm kơjă 500.000hlak jên (kơ dôm sơnăm hơdrol) ‘nŏh dang ei đơ̆ng 1-2 trĭu hlak jên lơ̆m 1 tơnô̆. Akŏp kon jên năm ngôi, pôk ăn tơmam drăm ‘nŏh 76 ti hlak jên, tŏk hlŏh 30 ti glak jên pơtêng hăm sơnăm 2022. Dơnŏ anĭh Mặt trận Tổ quốc Việt Nam dêh char hăm Khŭl Chư pơglang ƀrê dêh char Đăk Lăk gô pôk ăn hlŏh 3.000 tơnô̆ tơmam drăm (1 tơnô̆ kơjă 500.000 hlak jên) ăn ŭnh hnam dơnuh, ŭnh hnam tơnap tap tơ̆ 11 lơ̆m 15 apŭng, thĭ xah, pơlei tơm. Hơdrô̆ rim apŭng Ea Súp, Krông Bông, Buôn Đôn, Lắk đei klăh asong, tơgŭm djru tơmam drăm Têt đơ̆ng kon jên tơgŭm djru kơ mĭnh grŭp jang tih….