Kiơ̆ kơ ‘noh, dêh char Dak Lak gô tơlĕch kơ sô̆ jên 400.000 hlak jên 1 ‘nu vă tơgŭm ăn hloh 13.600 ‘nu bơngai đei kŏng; kơ sô̆ jên 500.000 hlak jên 1 ŭnh hnam ăn kơ 591 ŭnh hnam mĕ Việt Nam nuih mơng đĭ hiong; tơlĕch 1.200.000 hlak jên 1 ‘nu ăn kơ 118 ‘nu bơngai đei kŏng hơgei. ‘Ngoăih kơ ‘noh, dêh char oei ‘măn 15 triệu hlak jên vă năm ngôi, asong tơmam ăn kơ 3 Anih vei lăng rong lĭnh jĭ rơ ka ăl păng Anih vei lăng rong bơngai đei kŏng tơ̆ Bà Rịa Vũng Tàu, pơlei tơm Đà Nẵng păng dêh char Dak Lak.

‘Măng âu, kơdră chĕp kơ̆l dêh char Dak Lak gô pơgơ̆r dôm khŭl năm ngôi păng asong tơmam ăn mĕ Việt Nam nuih mơng, 1,2 ŭnh hnam bơngai đei kŏng hơgei, kơ sô̆ jên asong tơmam ăn dôm bơngai âu ‘noh 2.500.000 hlak jên. Dôm tơdrong jang hơpong tơ̆ pơsat lĭnh lôch dŏng teh, tơ̆k ŭnh jrĕnh ƀlŏk hơdơ̆r kŭm đei tơlĕch jang lơ̆m dêh char.