Tưk tơiung dôm tơdrong hlôi jang đei, sơnăm 2023, Khul druh dăm jang unh điên Dak Lak hơnơ̆ng tơmât tơdrong jang Tơ̆k hơdăh trong pơlei vă pơjei băl bơ̆ jang păng pơjao tơdrong jang mă hơdăh ăn dôm anih jang. Dôm khei blŭng sơnăm ‘nâu, dôm anih jang vang jang hơdoi bơ̆ jang lơ tơdrong jang Tơ̆k hơdăh trong pơlei tơ̆ Plei druh dăm iung jang xa (xăh Ia Lốp, apŭng Ea Súp), plei Đồi Đá (xăh Krông Ƀuk, apŭng Krông Pach); plei Ga (xăh Ea Kmút), plei Ea Knốp (xăh Cư Ni) păng dôm thôn 1-2-3 (xăh Xuân Phú) găh apŭng Ea Kar.

Hơdrô̆ khei 3 – Khei druh dăm sơnăm 2023, anih jang unh điên hlôi bơ̆ jang 2 tơdrong jang Tơ̆k hơdăh trong pơlei tơ̆ Thôn 1, Thôn 2 (xăh Bình Hòa, apŭng Krông Ana) păng tơ̆ xăh Khuê Ngọc Điền, apŭng Krông Bông. Dôm tơdrong jang “Tơ̆k hơdăh trong pơlei” âu tôch đei yoa, ưh lăp pơyoa ăn tơdrong yak vih vât đơ̆ng kon pơlei đĕch mă oei vang vei lăng ‘lơ̆ng tơdrong sơđơ̆ng lơ̆m tơpôl, sơđơ̆ng tơ̆ trong nơnăm.