Sơnăm 2023, Kŏng ti jang ŭnh điên Dak Lak đei pơjao vă jê̆ 288 ti hlak jên akŏp trong tơlĕch jang jên tơmơ̆t jang ming man. Kŏng ti hlôi hơmet tơmơ̆t jên jang ăn dôm tơdrong jang tơley ŭnh điên 110kV hloh 14 ti hlak jên, tơley ŭnh điên trung hạ thế hloh 223 ti hlak jên, păng tơdrong jang nai dang 50 ti hlak jên. Truh dang ei, kŏng ti hlôi hơlen lăng, chih jô̆ tơdrong jang bơ̆jang đang 14 tơdrong jang, akŏp kơjă hloh 52,2 ti hlak jên, ‘mơ ‘met đei hloh 19 ti hlak jên pơtêng hăm jô̆ hơlen blŭng a. Vă iŏk đei tơdrong hơgăt tơlĕch jên jang hloh 95% trong tơlĕch jang kon jên kơ sơnăm, dang ei dôm anih jang tŏk bŏk pơgĕnh tơlĕch jang lơ trong jang tŭn hrĕnh bơ̆jang, răt pơtruh tôm kơ sô̆ tơmam hlôi pơm hla ar pơlăp.

Lơ̆m noh, Anih vei lăng tơdrong jang pơm gơng tơƀưh jang hơdai đơ̆ng dôm anih iŏk jang pơtho tơƀôh, bơngai iŏk jang ming pơlăp, anih jang vei lăng. Dôm anih jang nai kơchăng pơm hla ar năr kăt ŭnh điên pơyua ăn tơdrong jang, jang tơgŭm hơmet pơ ‘lơ̆ng dôm tơdrong mơmat tat vă jang đang dôm tơdrong jang kiơ̆ ƀlep hrĕnh păng vei sơđơ̆ng ‘lơ̆ng. Tơdrong akŏm jang đang dôm tơdrong jang tơmơ̆t jên jang teh đak gô tơgop pơm tơplih ‘lơ̆ng, hơtŏk ‘lơ̆ng ŭnh điên pơtruh ăn tơmoi tơ̆ dôm tơring lơ̆m dêh char Dak Lak.