Dak Lak pơhrăm ming tơdrong jang krao hơvơn kon pơlei ăn 210 kang ƀô̆, bơngai jang
Thứ bảy, 09:32, 01/07/2023
VOV Tây Nguyên/Thuem tơblơ̆
VOV Tây Nguyên/Thuem tơblơ̆
VOV4.Bahnar- Lơ̆m 5 năr, đơ̆ng ‘năr 26-30 khei 6, hloh 200 ‘nu kang ƀô̆ bơngai jang teh đak kơ dêh char Dak Lak hlôi vang hŏk lăm pơhrăm ming tơdrong jang krao hơvơn kon pơlei, yua đơ̆ng Anih jang Nội vụ Dak Lak jang hơdai hăm Anih pơtho pơhrăm bơngai jang pơlei tơm Đà Nẵng pơgơ̆r.
Lơ̆m 5 năr, dôm bơngai hŏk đei pơtho dôm tơdrong jang, lơ̆m noh đei dôm tơdrong jang ‘noh đon tơchĕng đơ̆ng Đảng păng teh đak găh tơdrong jang krao hơvơn kon pơlei lơ̆m chăl hle, roi tơƀôh akŏm dôm tơdrong ‘lơ̆ng đơ̆ng Luơ̆t pơm kiơ̆ kon pơlei pơm tơm tơ̆ tơring (đei tơmơ̆t yua đơ̆ng ‘năr 01/7/2023), Tơdrong jang krao hơvơn vang jang pơjing tơring tơrang ‘nao, anih kơdrơ̆m hơgei, hơtŏk hơnăp jang, jang tơnăp đơ̆ng Anih dăr hơlen tơmơ̆t jên jang đơ̆ng tơpôl.
Tơ̆ lăm pơhrăm, kang ƀô̆ rim tơring tơ̆ Dak Lak oei ‘măn jơ pơma dơnuh găh yan âu bơ̆jang, hơmet ‘lơ̆ng dơ̆ng dôm tơdrong hlôh vao, gơh jang, băt hơdăh hloh tơdrong tơm đơ̆ng tơdrong jang krao hơvơn kon pơlei lăp hăm tơdrong đơ̆ng rim tơring.
Viết bình luận