Pơgê năr 10/11, tơ̆ apŭng Ea Sŭp, dêh char Dak Lăk, Hơnih bơ̆ jang kơ Radiô Nơ̆r Pơma Việt Nam oei tơ̆ Tây Nguyên, Agribank Hơnih sơdrai găh Tu Dak Lăk, Kŏng ty Honda Dak Lăk, Kŏng ty phŏng Vân Nguyên atŭm hăm mĭnh ƀar ‘nu bơngai tơgŭm djru hlôi pơgơ̆r pôk ăn “Pơbŭng hnam tơnŏ tơring sơlam teh đak” ăn ŭnh hnam dơnuh, tơnap tap oei tơ̆ tơring Ea Bung. 

Hnam să 90m2 đei pôk ăn klo akăn ƀok Hoàng Minh Lý, oei tơ̆ thôn 8, tơring sơlam teh đak Ea Bung. Pơbŭng hnam au kơjă kơjên hloh 150 triu hlak jên, lơ̆m au 80 triu hlak jên đei rim hơnih mơdro sa vang tơra tơgŭm; pă dôm yơ ‘nŏh kơtum kơtŏng ‘nhŏng oh chă tơgŭm ăn. Đại tá Đỗ Quang Thấm – Kơdră chĕp pơgơ̆r Đảng Hơnih chĕp pơgơ̆r Ƀô̆ đô̆i vei lăng sơlam teh đak dêh char Dak Lăk tơbăt, dôm sơnăm au ki, hơnih au iung jang Tơdrong jang “Pơbŭng hnam tơnŏ tơring sơlam teh đak” păng hlôi ming man đei 5 pơbŭng hnam tơgŭm ăn rim ŭnh hnam dơnuh oei tơ̆ tơring sơlam teh đak Ea Bung.