Sơnăm âu, 62 sinh viên kon kông kơ dêh char Đăk Lăk hŏk pơhrăm hơgei tŏk bŏk oei hŏk tơ̆ dôm hnam trưng Cao đẳng, Đại học lơ̆m jâ̆p teh đak đei pôk hơpah. Pơma ah jơ lêh, ƀok Y Biêr Niê, Phŏ Ƀĭ thư Tĭnh uy Đăk Lăk hmach bơnê păng pơ-ư pơ-ang hăm tơdrong pơ-'nam hŏk pơhrăm đơ̆ng đe sinh viên.

Atŭm hăm noh hơpơi 'meh, hơdruh tơdăm kon kông lơ̆m dêh char pơtoi hơdrin hŏk pơhrăm, pơ-'lơ̆ng đon bơnôh, lui ngeh tơnăp hăm trong jang đơ̆ng Đảng, luơ̆t tơchơ̆t đơ̆ng teh đak, chĕp vei tơdrong juăt jue tơguăt tơguăl kon pơlei, tơgop kăp gĭt ăn tơdrong tơ-iung pơjing pơlei pơla teh đak pơdrŏng kơtang. Atŭm hăm noh, dôm jăl jang Đảng, jơnŭm pơgơ̆r tơring, Măt trâ̆n tôh kuôk păng dôm anih jang chĭnh trĭ - tơpôl pơm jang tơnăp, đei jơnei dôm tơchơ̆t tơlĕch đơ̆ng Đảng, Teh đak hăm tơring kon kông păng groi kông, mă kăl noh dôm trong hơtŏk gah pơtho pơhrăm, hơtŏk pơ-'lơ̆ng bơngai jang ăn tơring.