Tơ̆ ‘măng hop akŏm, ƀok Nguyễn Minh Chí, Phŏ Kơdră Anih Choh jang xa păng Hơtŏk tơring tơrang dêh char Đăk Lăk sơkơ̆t hơdah: 52 dơnâu mong đak rơgoh akŏm tơ̆ tơring pơsĕl pơdơh pơm jang păng lơ anih mong đak nai jang kơplah kơplot đei 20% - 40% mă Rađio nơ̆r pơma VN chih tơroi noh trŏ tơpă. Tơdrong tơm noh kơlih dơnâu mong đak đei man đơ̆ng lơ sơnăm bơih, dơnâu iĕ, đei pơjao ăn Anih jang vei lăng kon pơlei dôm xah dah mă pơjao ăn jơnŭm vei lăng thôn, pơlei iŏk pơm jang mă lei ưh đei tơdrong juaih jang.

Tơdrong ming hơmet, noh ưh đei tơlĕch jang. Đơ̆ng rŏng tơmơ̆ng tang măt ăn anih choh jang xa tơblang, ƀok Nguyễn Tuấn Hà, Phŏ Kơdră Anih jang vei lăng kon pơlei dêh char Đăk Lăk pơkăl Anih Choh jang xa păng Hơtŏk tơring tơrang, Anih jang vei lăng kon pơlei dôm tơring athei hơlen dôm anih kon pơlei oei xa ưh kơ mah đak sŏ nhă rơgoh kơyuơ dơnâu mong đak hư răm vă asong jên ming hơmet, dah hrôih asong đak sŏ nhă ăn kon pơlei, mă kăl noh lơ̆m pơyan phang pơđang dang ei.