‘Nao âu, Khul drŏ kăn Việt Nam pơgơ̆r “Năr drŏ kăn iung jang xa” hăm hơnăn: “Drŏ kăn Dak Lak iung jang xa gơ̆h hơgei păng jang hơdoi hăm anih tĕch mơdro”. Năr iung jang xa đei lơ tơdrong nhen: roi tơbăt tơmam đơ̆ng iung jang xa đei kơ đe drŏ kăn; pơgơ̆r thi mă hơtuch đon tơchĕng rơgei vă iung jang xa, tĕch mơdro sơnăm 2023; hop akŏm Trong tĕch mơdro chăl 4.0; pơjao jên tơgŭm asong tŏk iŏk ăn drŏ kăn vă iung jang xa.

‘Nâu jĭ jơ năr vă đe mŏ hŏh drŏ kăn lơ̆m dêh char tơƀâp, pơma nuh, roi tơbăt ăn băl dôm tơdrong kăl mưh iung jang xa, tĕch mơdro, jang atŏk tơiung mŭk drăm; pôk pơ ư đe drŏ kăn rơgei mưh jang xa, tĕch mơdro. Vang truh akŏm, mŏ H’Chi Mlô, tơ̆ xăh Ea Đar, apŭng Ea Kar, dêh char Dak Lak tơroi: “Inh truh hăm Năr drŏ kăn iung jang xa, hăm hơnăp jang ‘nŏh jĭ pơm bơngai chĕp ba, roi tơƀôh đĭ đăng tơmam đơ̆ng đe mŏ ŏh iung jang xa tơ̆ tơring jang đei, yoa ‘nâu kŭm jing năr vă rim drŏ kăn hơnhăk tơƀôh tơmam đơ̆ng kơdih jang đei, roi tơbăt ăn bơngai nai, chă trong tĕch mơdro, chă tơdrong jang ăn đe mŏ ŏh, mă loi jĭ đe mŏ ŏh drŏ kăn bơngai kon kông”.

Lơ̆m tơdrong pơgơ̆r Năr drŏ kăn iung jang xa dêh char Dak Lak sơnăm 2023, Khul drŏ kăn Việt Nam dêh char Dak Lak pơgơ̆r hop akŏm Trong tĕch mơdro chăl 4.0 vă pơtho tơƀôh đon hlôh vao, tơdrong kăl păng dôm trong jang tơgŭm ăn drŏ kăn iung jang xa, tĕch mơdro. 

Tơ̆ hop akŏm, dôm bơngai tang măt đei mơ̆ng bơngai juăt jang tơroi găh dôm tơdrong nhen: Dôm tơdrong atŭm găh trong iung jang xa, tĕch mơdro sơng bơngai răt tơmam chăl 4.0; tơdrong tơlĕch trong tĕch mơdro tơ̆ Dak Lak hrei ‘nâu – dôm tơdrong ‘lơ̆ng păng tơdrong nol hăm drŏ kăn iung jang xa, tĕch mơdro; hơtŏk pơ ‘lơ̆ng trong jang, pơm tơplih iŏk yoa – tơdrong gĭt kăl đơ̆ng dôm anih tĕch mơdro tơm. Lơ mŏ ŏh kŭm tơlĕch nơ̆r apinh, pơma nuh hăm bơngai roi tơƀôh găh dôm tơdrong kăl tơrĕk truh mưh chih pơjing hơnăn tơmam, pơm tơlĕch tơmam păng chă anih răt tơmam.

Mŏ Nguyễn Thị Ngọc Thắng, tơ̆ phường Tân Lập, plt Buôn Ma Thuột pơma: “Tơdrong mă inh ƀôh lăp đon hlŏh jĭ tơdrong pơjing trong tĕch mơdro tôch rơđăh adrol vă ăn 1 anih tĕch mơdro jang xa. ‘Nŏh jĭ tơdrong mă anih jang nhôn oei ưh kơ đei yoa inh jĭ 1 ‘nu bơngai jang lơ̆m tơpôl ‘năi, inh iung jang xa kiơ̆ trong sek tơlang dôm tơdrong ăn tơpôl kơna tam đei chih pơjing trong jang ăn anih tĕch mơdro nhôn. Kơna dôm tơdrong thoi nŏh tơpă mơ̆n tôch gĭt kăl vă inh gơ̆h chih pơjing đei trong jang xa ăn anih jang thoi yơ”.

Hăm lơ nơ̆r tơroi tơpă tơ̆ yăn âu păng tôch đei yoa, hop akŏm hlôi tơgŭm ăn đe mŏ ŏh hlôh vao lơ tơdrong dơ̆ng păng chă đei trong jang lăp vă iung jang xa, tĕch mơdro; iŏk yoa kơmăy kơmŏk vă pơm đei tơmam ‘lơ̆ng, chih pơjing hơnăn tơmam, hơtŏk kơsư̆k pơjei. Ƀlep ƀât ‘măng mă âu mơ̆n, Khul drŏ kăn Việt Nam pơgơ̆r tơdrong thi mă hơtuch găh đon pơchĕh rơgei mưh iung jang xa, tĕch mơdro sơnăm 2023. Tơdrong thi iŏk đei 84 hla ar hô sơ đơ̆ng đe drŏ kăn lơ̆m dêh char vang thi. Dôm tơdrong vă jang đei thi tơ̆ âu đei lơ tơdrong găh choh jang xa, hăm dôm tơmam tơm tơ̆ tơring nhen chĕh phe, ca cao, tơmam tanh, pai tơdrô ge. Lơ̆m nŏh, “Tơmam xa ‘lơ̆ng đơ̆ng găr ‘long tơ ‘ngiơ” hlôi iŏk đei yaih như̆k.

Yă Tô Thị Tâm, Kơdră vei lăng Khul drŏ kăn Việt Nam dêh char Dak Lak, Kơdră pơgơ̆r tơdrong thi tơroi: “Kơsô̆ bơngai vang thi sơnăm ‘nâu tôch lơ păng rim tơdrong jang đei hơmet tôch ‘lơ̆ng, chih tơblang tôch rơđăh, iŏk yoa đei lơ tơmam tơ̆ tơring vă tưk tơiung, pơm jing tơmam vă tĕch mơdro. Khul châm hơlen hlôi pơtruh nơ̆r ăn bơngai thi athei hơnơ̆ng hơmet pơ ‘lơ̆ng ming tơdrong jang đơ̆ng kơdih vă gơ̆h bơ̆ jang kiơ̆ păng đei yoa, mă loi athei tơrĕk truh tơdrong marketing păng tơdrong ‘lơ̆ng hơnăn tơmam, kơƀi tăh roi tơbăt tơ̆ ‘ngoăih vă đe băt truh tơmam bơ̆n”.

Ƀôh đe drŏ kăn iung jang xa ưh đei veh hơtăih kơ trong jang tơplih hăm kơmăy sô̆ atŭm kơ tĕh đak, dôm sơnăm âu ki, Khul drŏ kăn Việt Nam đei lơ tơdrong jang vă drŏ kăn iung jang xa gơ̆h tơlĕch đei trong jang mŭk drăm hăm kơmăy sô̆. ‘Ngoăih kơ dôm lăm pơtâp pơhrăm vă đe mŏ ŏh pơm juăt hăm dôm tơdrong kăl, Khul oei tơgŭm ăn mŏ ŏh truh hăm tơdrong tĕch mơdro hăm điên tư, chă iŏk nơ̆r roi tơƀôh đơ̆ng Khul tĕch mơdro hăm điên tư, kiơ̆ đơ̆ng noh mŏ ŏh hŏk iŏk tơdrong tĕch mơdro, roi tơbăt tơmam kơdih jang đei lơ̆m kơmăy tĕch mơdro hăm điên tư.

Yă Nguyễn Thị Minh Hương, Phŏ Kơdră vei lăng Khul drŏ kăn Việt Nam ăn tơbăt: “Tơdrong đei ƀôh hơdăh hlŏh tơ̆ dôm tơring, mưh đei pơgơ̆r bơ̆n kơchơ, năr iung jang xa, ‘nŏh hơnơ̆ng đei tơdrong vang jang hơdoi đơ̆ng dôm anih jang păng khul drŏ kăn Việt Nam vă tơgŭm ăn mŏ ŏh vang bơ̆ jang lơ̆m tơdrong ‘nŏh. Tơ̆ hơnăp kơnh, Khul vă hơnơ̆ng tơgŭm ăn drŏ kăn iung jang xa, truh hăm anih tĕch mơdro mă lei vă akŏm lơ ƀiơ̆ ăn tơdrong jang mŭk drăm atŭm păng drŏ kăn iung jang xa hăm kơmăy kơmŏk ‘nao, tơgŭm atŏk tơiung choh jang xa rơgŏh vă lăp hăm trong jang atŏk tơiung rơgŏh ‘lơ̆ng păng pran kơjăp hrei ‘nâu”.