Kiơ̆ trong pơprŏ vă jang sơnăm 2023, dêh char Dak Lăk gô iung jang tơlĕch 5.660 ti hlak jên kon jên teh đak tơmơ̆t jang. Jô̆ truh vă đĭ khei 10, Dak Lăk hlôi tơlĕch hloh 2.600 ti hlak jên, jơnei hloh 48% trong tơlĕch jang sơnăm, tŏk 17% pơtêng hăm sơnăm sơ̆. Lơ̆m mă noh, kon jên Trung ương jơnei 42,5% păng tơring ‘noh 56,8% trong pơprŏ jang.

Tơ̆ hop akŏm, kơdră chĕp pơgơ̆r Hơnih vei lăng kon pơlei dêh char Dak Lăk athei rim hơnih jang, Hơnih vei lăng kon pơlei rim apŭng, thĭ xah, pơlei tơm atŏk kơtang bơ̆ jang dăr lăng, lăng hơlen, ƀôh păng xek tơlang tơtom rim tơdrong tơnap tap, tơhlăk tơhlĭn kiơ̆ rim tơdrong vă jang. Vă jang keh đang trong pơprŏ jang tơlĕch hloh 5.660 ti hlak jên kon jên teh đak tơmơ̆t jang lơ̆m sơnăm au, ƀok Đinh Xuân Hà, Kơdră chĕp pơgơ̆r Hơnih vei lăng Pơprŏ tơdrong jang-Tơmơ̆t jên jang dêh char Dak Lăk tơbăt, hrei au rim hơnih bơ̆ jang, tơ-‘ngla tơmơ̆t jên jang kơ dêh char tŏk bŏk hơnơ̆ng jang kiơ̆ trong atŏk kơtang iung jang tơlĕch kon jên teh đak tơmơ̆t jang.