VOV4.Bahnar - ‘Năr 1/4, Jơ nŭm pơ gơ̆r kon pơ lei dêh char Dak Lak jăl X pơ gơ̆r ‘măng hop a kŏm tơ drong jang ‘măng mă 1. Tơ̆ ‘măng hop akŏm, dôm bơ ngai tang măt hlôi pơ gơ̆r set hơ len dôm hla ar pơ truh, tơ roi tơ băt dăr hơ len păng pơ drơ̆ng kiơ̆ 9 tơ drong tơ chơ̆t gĭt kăl ƀơm truh hơ tŏk tơ iung mŭk drăm - tơ pôl kơ dêh char nhen: Tơ chơ̆t găh pơ dui đunh khei ‘năr bơ̆ jang păng tơ lĕch jên tơ mơ̆t jang kơ teh đak sơ năm 2021 truh sơ năm 2022 jên jang tơ ring; tơ chơ̆t trong jang tơ mơ̆t jên jang păng hơ met ming 1,2 tơ drong jang tih; trong jang klăih song trong tơ lĕch jang jên hơ met ăn bơ̆ jang kiơ̆ tơ drong jang tơm kơ teh đak pơ jing tơ ring tơ rang ‘nao kơ sơ năm 2022. 

Jơ hop akŏm

Kiơ̆ kơ ‘noh, lơ̆m sơ năm 2021, akŏp jên tơ mơ̆t jang kơ teh đak jên jang tơ ring tam mă đei tơ lĕch ‘noh hloh 476 ti hlak jên gô đei tơ plih dơ̆ng ăn sơ năm 2022. Dêh char kŭm hơ met ăn 238 ti hlak jên bơ̆ jang kiơ̆ tơ drong jang tơm kơ teh đak pơ jing tơ ring tơ rang ‘nao, trong tơ lĕch jang sơ năm 2022.

Thuem: Tơ blơ̆