Pơm kiơ̆ tơdrong jang Mĕ chĕp kơ̆l kơyuơ Trung ương Jơnŭm jang tơlĕch, lơ̆m 2 sơnăm kơ âu, Jơnŭm jang Đe drăkăn dêh char Đăk Lăk hlôi pơm jang hadoi hăm dôm anih jang, bơngai jang 'mêm bơnat păng dôm jăl jang Drăkăn iŏk rong 'me 685 hơ-ioh pơti lơ̆m jâ̆p dêh char hăm kơsô̆ jên tơgŭm hloh 7 tih 800 trĭu hlj. Hăm tơdrong tơgŭm đơ̆ng đe Mĕ hơđơ̆ng, đe oh đei tơgŭm gah đon bơnôh păng tơmam drăm, đei tơdrong tơrĕk, 'mêm kơ-eng, tơgŭm ăn đe oh da ƀiơ̆ ơh ol gah đon bơnôh.

Ƀơ̆t 'măng âu, Jơnŭm pơgơ̆r hlôi asong jên hŏk ăn 15 hŏk tro pơti găn hloh tơnap tap hŏk rơgei, asong 120 tơpu tơmam ăn đe hơ-ioh pơti đei tơdrong hơrih tơnap tap; pôk hơpah ăn 31 'nu bơngai jang păng anih jang hơgei lơ̆m tơdrong jang kiơ̆ Mĕ hơđơ̆ng lơ̆m 2 sơnăm kơ âu.