‘Nao pơm đang dôm hla bar kăl ah minh anih tơ̆ anih jang Vei lăng kon pơlei xah Ea Tiêu, apŭng Cư Kuin, dêh char Đăk Lăk, ‘nhŏng Trần Vũ Hải Đăng ăn tơbăt, sư hơdrô̆ hiong 30 pơnĭt ăn tơdrong pơm hla bar: “ ‘Năr âu inh năm truh xah Ea Tiêu vă pơm hla bar sơkơ̆t tam mă đei unh om, inh ƀôh đe kăn ƀô̆, bơngai jang tơ̆ âu tơgŭm dăp đon dăp bơnôh, pơtho hơdah chih thoi yơ, bơ̆ hla bar tenh kuăng vă kon pơlei ưh đei hiong jơ ƀơ̆t truh pơm hla bar kăl.

Kiơ̆ kơsô̆ chih akŏm tơbang đơ̆ng Anih jang vei lăng kon pơlei apŭng Cư Kuin, rim sơnăm rim xah lơ̆m tơring sơng đei đơ̆ng 13.000 truh 16.000 hô sơ. Vă pơm trong hiôk ăn anih jang, tơ-‘ngla bơngai jang truh pơm hô sơ, dôm xah hlôi chih tơbang Dôm hla bar kăl hanh chĭn mă po sek pơm jang tơ̆ kơƀang chih sơkơ̆t kơ anih jang păng lơ̆m mạng điê̆n tưh kơ xah; asong bơngai juăt jang păng kơdră xah iŏk jang tơ̆ Anih iŏk păng pơdreo hla bar pơm đang.

Rim xah adoi iŏk yua trong jang  “Hơgei hanh chĭn” tơguăt hăm  “ ‘Năr 4 kon pơlei ưh đei chih, jơnŭm pơgơ̆r ưh pơkă” đei yua kăp gĭt. Ƀok Nguyễn Kim May, Phŏ Ƀĭ thư, Kơdră Anih jang vei lăng kon pơlei xah Ea Ktur, apŭng Cư Kuin ăn tơbăt: “Nhôn hlôi asong pơlăp kơmăi camera hơlen bơngai jang tơ̆ minh anih jang adoi nhen băt hơdah tơdrong mă kon pơlei truh pơm hal bar hanh chĭn, kiơ̆ đơ̆ng noh hơtŏk sơnong jang ăn kăn ƀô̆ bơngai jang lơ̆m anih jang. Minh ƀar trong sek tơlang hla bar hanh chĭn nhôn hơnơ̆ng asong jang hơbĕch hloh, vă pơm trong hiôk, vei sơđơ̆ng ăn kon pơlei lơ̆m tơdrong hơmet pơ-‘lơ̆ng hla bar hanh chĭn, noh jing khei năr nhôn tang găn pơkă kiơ̆ tơchơ̆t khôi luơ̆t, pơm trong hiôk ăn kon pơlei noh tơgenh chă sek tơlang tơtenh hloi...”

Ƀok Võ Tấn Huy, Kơdră Anih jang vei lăng kon pơlei apŭng Cư Kuin ăn tơbăt, vă pơjing jơnŭm pơgơ̆r gơh hơgei, pơm jang đei jơnei Anih jang vei lăng kon pơlei apŭng hlôi tơlĕch jang gah hơmet pơ-‘lơ̆ng hanh chĭn kơ teh đak kiơ̆ rim sơnăm. Kiơ̆ tơchơ̆t, Anih jang vei lăng kon pơlei apŭng pơgơ̆r hop akŏm sơkơ̆t tơdrong jang hơmet pơ-‘lơ̆ng hanh chĭn vă băt hơdah tơdrong jang, sơnong jang trŏ ƀlep ăn khei năr pơtoi kơ noh. Atŭm hăm noh, apŭng tơlĕch kĭ pơkăp hăm sơnong jang Kơdră Anih jang vei lăng kon pơlei dôm xah lơ̆m tơring. Apŭng adoi chih akŏm tơdrong jang lơ̆m mạng tơpôl Zalo vă pơm trong pơma dơnuh hăm kon pơlei, hăm jơnŭm pơgơ̆r tơring tơ̆ apŭng... Ƀok Võ Tấn Huy ăn tơbăt: “Minh lơ̆m dôm tơdrong mă apŭng akŏm jang noh hơmet pơ-‘lơ̆ng hanh chĭn kŏng, hơmet pơ-‘lơ̆ng asong răt kơmăi kơmŏk jang đơ̆ng apŭng truh tơ̆ xah kiơ̆ trong hiôk hian ăn kon pơlei. Atŭm hăm noh jang atŭm hăm Ƀưu chĭn viê̆n thŏng vă tơroi tơbăt pơm jang kiơ̆ điê̆n thoăi yi đŏng. Apŭng hlôi pơgơ̆r lơ̆m tơdrong pơm kiơ̆ tơchơ̆t jang, pơjing khul kang ƀô̆ jang hlôh vao gơh hơgei, tơnăp hăm sơnong jang kiơ̆ dôm tơdrong jang hơmet pơ-‘lơ̆ng hanh chĭn noh tơlĕch jang kiơ̆ jơnŭm pơgơ̆r điê̆n tưh, jơnŭm pơgơ̆r kơsô̆, vă pơm jang tơnăp tơdrong âu noh jing tơdrong jang tơplih kơsô̆”

Lơ̆m khei năr âu ki, Tơdrong jang hơmet pơ-‘lơ̆ng hanh chĭn dêh char Đăk Lăk đei tơlĕch jang tôm hăm 6 tơdrong kơ Tơdrong jang hơmet pơ-‘lơ̆ng hanh chĭn kơ teh đak đơ̆ng sơnăm 2021-2030 đơ̆ng Jơnŭm pơgơ̆r teh đak. Dêh char hlôi đei lơ tơplih lơ̆m pơgơ̆r jang vă hơtŏk tơdrong hiôk ăn kon pơlei, anih jang mŭk drăm. Mă kăl noh tơdrong hơtŏk pran pơm kiơ̆ tơdrong jang kŏng ah tăl mă 3, mă 4. Lơ̆m sơnăm 2022, dêh char Đăk Lăk hlôi hơtŏk đei 32 tăl gah tơdrong hiôk jơhngơ̆m đơ̆ng kon pơlei, sơkơ̆t dơ̆ng mă 27 lơ̆m jâ̆p teh đak. Vă tơdrong jang hơmet pơ-‘lơ̆ng hanh chĭn đei jơnei kăp gĭt lơ̆m khei năr truh, ƀok Nguyễn Tuấn Hà, Phŏ Kơdră Anih jang vei lăng kon pơlei dêh char Đăk Lăk ăn tơbăt: “Khul bơngai jang, mă kăl noh bơngai chĕp kơ̆l hơbĕch gơh hơgei, sek tơlang tơnăp tơdrong jang., Mă 2 noh bơngai jang lơ̆m Jơnŭm pơgơ̆r hơtŏk hơlen tơdrong jang hanh chĭn, pơm hla bar hanh chĭn, pơm kiơ̆ ƀlep tơchơ̆t tơlĕch, sek tơlang dôm tơdrong oei tơhlăk tơhlĭn. Mă 3 pơtoi hơlen vă kăt tơjur, pơm hiôk hla bar hanh chĭn, tơplih ‘nao tơdrong jang minh anih, tơroh lơ̆m tơdrong pơm hla bar hanh chĭn kiơ̆ hơtŏk pơ-‘lơ̆ng tơdrong pơm jang”

Hăm tơdrong tơlĕch lơ trong jang hiôk, atŭm hăm pơm jang gơh hơgei, tơdrong hơmet pơ-‘lơ̆ng hanh chĭn lơ̆m tơring teh kơ dêh char Đăk Lăk hlôi đei hơtŏk hơ-iă; kiơ̆ đơ̆ng noh pơm trong hiôk, pơm ăn anih jang, kon pơlei hiôk jơhngơ̆m ƀơ̆t truh pơm jang, tơgop pơ-‘lơ̆ng tơdrong jang hanh chĭn hơgei, đei jơnei tơnăp, pơm trŏ sơnong pơkăl lơ̆m chăl jang ‘nao.