Bơngai thi ‘nŏh jĭ đe kăn ƀô̆, bơngai jang kơ tĕh đak, kơdră chĕp kơ̆l dôm anih jang kơpal tơ̆ dêh char păng Anih vei lăng kon pơlei dôm apŭng, thĭ xăh, plt, Anih vei lăng kon pơlei dôm xăh, phường, thĭ trơ̆n păng kon pơlei Việt Nam đơ̆ng 18 sơnăm tŏk tơ̆ kơpal, dang ei oei arih xa, bơ̆ jang, hŏk pơhrăm tơ̆ dêh char Đắk Lắk. Tơdrong thi đei: Trong jang, tơdrong tơgŭm đơ̆ng Đảng, Teh đak păng dêh char Đắk Lắk ƀơm truh tơdrong hơmet ming trong pơm hla ar tĕh đak đơ̆ng 2021-2025, trong vă jang truh sơnăm 2030.

Ƀok Bạch Văn Mạnh, Kơdră chĕp kơ̆l Anih jang Nội vụ dêh char Đắk Lắk tơroi, ‘nâu jĭ sơnăm mă 2 dêh char Đắk Lắk pơgơ̆r thi trư̆k truyê̆n hơlen năng tơdrong hơmet ming trong pơm hla ar kơ dêh char. Kiơ̆ đơ̆ng tơdrong thi, khul kăn ƀô̆, bơngai jang kơ tĕh đak gô jing khul năm hơdrol lơ̆m tơdrong chă hơlen năng mă hơdăh, hlôh vao kơjăp rim tơdrong, trong jang, tơdrong hơgăt găh hơmet ming trong pơm hla ar vă tơmât yoa lơ̆m tơdrong jang rim năr roi đei yoa ‘lơ̆ng ƀiơ̆.