VOV4.Bahnar - Ưh lăp tưk tơ iung ‘lơ̆ng hơ năp jang chĕp kơ̆l pơ gơ̆r, tơ ƀôh trong chong glung, krao hơ vơn kon pơ lei tơ gŭm băl jang atŏk tơ iung mŭk drăm, sut pơ đĭ pơ ngot, tơ jur tơ nuh hin, dôm đảng viên tơ̆ tơ ring kon kông lơ̆m dêh char Dak Lak oei arih xa tôch ‘lơ̆ng, oei xa kơ jăp hăm kon pơ lei, sek tơ lang rim tơ drong tơ hlăk tăk, ưh hơ iă lơ̆m tơ pôl. Đơ̆ng nŏh, gơ̆h drơ̆ng 1 nơ̆r, pơ jing pơ lei pơ la sơ đơ̆ng ‘lơ̆ng, vang vei kơ jăp đon lui đơ̆ng kon pơ lei hăm Đảng.

Pơ yan ‘nâu, kon pơ lei tơ̆ xăh Ea Tiêu, apŭng Cư Kiun, dêh char Dak Lak chơt hơ iă mât lơ̆m pơ yan phĕ tiu. Yoa tŏ ‘mi kial ưh sơ đơ̆ng lơ̆m khei ‘năr tiu lĕch pơ kao, kơ tĕn plei adrol ki kơ na sơ năm ‘nâu rŏ năng plei tiu gô jur dang 30% pơ têng hăm pơ yan adrol ki, mă lei kon pơ lei lơ̆m xăh oei tôch hơ iă. Yoa ưh pă đei pơ tăm hơ drô̆ tiu đĕch, mă lơ kon pơ lei hlôi pơ tăm hơ lam lơ kơ loăi ‘long pha ra băl, đei iŏk yoa prăt sơ năm. Lơ̆m 1 pơ gar, 2,3 sơ năm tơ jê̆ âu, iŏk yoa đơ̆ng kon pơ lei tŏk đơ̆ng 30-40%. Tơ drong arih xa kơ kon pơ lei roi hiôk jơ nap ƀiơ̆, tơ gop ăn tơ drong jang tơ jur unh hnam tơ nuh tơ̆ tơ ring. Vă gơ̆h iŏk đei thoi nŏh, đei lơ tơ drong tơ gop đơ̆ng đe đảng viên tơ̆ pơ lei pơ la, vang roi tơ băt vă kon pơ lei tơ plih ming đon tơ chĕng mưh choh jang xa, pơ̆n tơ mât jên jang atŏk tơ iung mŭk drăm.

Ƀok Y Bom Buôn yă, Bí thư chi ƀô̆ plei Ê Bung, xăh Ea Tiêu, apŭng Cư Kiun ăn tơ băt: “Rim ‘măng hop chi ƀô̆, đei hloi khul vei lăng, khul jang chinh trĭ vang akŏm ‘nŏh tơ gĕch roi tơ băt ăn kon pơ lei adrin jang xa, athei răt bơ̆n phŏng, hŏk iŏk ki thuơ̆t jang ‘nao. Plei nhôn ưh đei pơ tăm hơ drô̆ chĕh phe, tiu, sâu riêng ôh, mă pơ tăm hơ lam ngăl kơ na đei plei ‘lơ̆ng, iŏk yoa lơ ƀiơ̆. Roi tơ băt tơ drong ‘nâu vă jang atŏk mŭk drăm lơ̆m hnam tơ nŏ.”

Ƀok Y Bom Buôn yă (tŏk bŏk) roi tơ ƀôh ăn kon pơ lei athei pơm kiơ̆ ‘lơ̆ng dôm trong tang găn jĭ Covid 19.

Tơ dăh đảng viên kră nhen ƀok Y Bom đei lơ trong chă krao hơ vơn kon pơ lei ‘nŏh kŭm đei lơ đảng viên oei mơ lôh jĭ bơ ngai kon kông, hăm jơ hngâm đon jang tôch tơ năp, pơ̆n tơ chĕng pơ̆n jang. ‘Nhŏng Y Khăn Niê, rơ nĕh sơ năm 1991, Bí thư chi ƀô̆ plei Knir jĭ 1 ‘nu bơ ngai thoi nŏh. Đơ̆ng năr đei pôk pơm Bí thư chi ƀô̆, ‘nhŏng băt hơ dăh hơ năp jang tih tên đơ̆ng kơ dih. Ưh lăp jang gơ̆h đĕch, ‘nhŏng oei hơ nơ̆ng hơ met pơ ‘lơ̆ng jơ hngâm đon, trong arih xa vă kon pơ lei lui yom. Plei Knir, đei 90% ‘nŏh jĭ bơ ngai kon kông, 98% bơ ngai kiơ̆ lui tin lành, mă lei dôm sơ năm âu ki, tơ drong sơ đơ̆ng chinh trĭ, sơ đơ̆ng tơ pôl tơ̆ âu tôch ‘lơ̆ng. Tơ drong tơ tông klĕ, đe tơ dăm pơ thơr băl et tơ drô, hơ vĕng, tĕh băl jur tơ pă. Mă loi, lơ tơ dăm lơ̆m pơ lei adrin jang xa, đei dôm khul grŭp lăng ƀôh, iŏk tơ mât, jing đoàn viên, bơ ngai jang rơ gei vă roi tơ băt ăn chi ƀô̆ tơ̆ tơ ring.

‘Nhŏng Y Khăn Niê, Bí thư chi ƀô̆ Plei Knir, xăh Ea Tiêu, apŭng Cư Kuin pơ ma: “Chi ƀô̆ plei Knir khei ‘năr âu ki adrin jang atŏk tơ iung khul đảng viên, hrei ‘nâu kŭm tơ mât đei 1 kơ sô̆ đảng viên oei tơ dăm. Adrin krao hơ vơn kon pơ lei jang atŏk tơ iung mŭk drăm, iŏk khul kăn ƀô̆ đảng viên jang hơ drol vă kon pơ lei jang kiơ̆, roi tơ ƀôh ăn kon pơ lei băt păng pơm kiơ̆ dôm trong jang đơ̆ng Đảng păng tĕh đak tơ jur.”

Ƀok Y Min Enuôl, Bí thư Đảng xăh Ea Tiêu, apŭng Cư Kiun tơ roi: lơ̆m xăh đei 37 chi ƀô̆, tơ̆ 24 pơ lei pơ la, hăm 645 ‘nu đảng viên. Lơ̆m nŏh đei 125 ‘nu đảng viên jĭ bơ ngai kon kông. Yoa rim pơ lei đei bơ ngai kon kông arih xa ngăl, kơ na đảng viên bơ ngai kon kông jing dôm bơ ngai kon, bơ ngai boăl vang yak hơ doi kŭm hăm kon pơ lei kon kông lơ̆m trong jang tŏk mŭk drăm tơ pôl, sut pơ đĭ pơ ngot, pơ jing tơ ring tơ rang 'nao. Vă tơ gŭm ăn đe đảng viên bơ ngai kon kông păng oei xa hơ dai kơ jăp hăm kon pơ lei, anih jang Đảng xăh pơ jao ăn dôm bơ ngai jang lơ̆m khul chĕp kơ̆l jur hŏk hôp tơ̆ dôm chi ƀô̆ pơ lei pơ la. Đơ̆ng tơ drong oei xa hơ doi 'lơ̆ng, chă mơ̆ng, tơl tơ blang tơ tom dôm nơ̆r pơ ma đơ̆ng kon pơ lei, đe đảng viên jing gơng tơ ƀưh, pơ jing đon lui đơ̆ng kon pơ lei hăm Đảng.

Mĭnh ‘măng hŏk hôp tơ̆ chi ƀô̆ plei Ê Bung, xăh Ea Tiêu, apŭng Cư Kiun, dêh char Dak Lak tơ lĕch jang kiơ̆ tơ drong tơ chơ̆t đơ̆ng Đảng.

Ƀok Y Min Enuôl, Bí thư Đảng xăh Ea Tiêu ăn tơ băt: “Đảng viên vei lăng tơ ring, hŏk hôp hơ dai hăm pơ lei pơ la kơ na kon pơ lei tôch hơ iă. Dôm tơ drong kiơ mă kon pơ lei đei nơ̆r pơ ma ‘nŏh tơ tom sek tơ lang ăn yoa đảng viên ‘nŏh jĭ bơ ngai jang kơ tă. Mưh kon pơ lei ‘mĕh tơ ƀâp kăn ƀô̆ dăh mă đei nơ̆r pơ ma nuh truh dôm tơ drong mơ mat, tơ hlăk tăk tơ̆ pơ lei ‘nŏh pơ lei dăh mă chi ƀô̆ athei pơm thoi yơ, mă ưh ‘nŏh đảng viên vei lăng tơ ring athei đei nơ̆r pơ ma thoi yơ vă gơ̆h pơ truh ăn nhôn băt, dăh mă nhôn jang ưh trŏ iĕm athei đei nơ̆r pơ ma vă nhôn hơ met ming”.

Hăm jơ hngâm đon băt ‘mêm, đon jang tơ năp đơ̆ng kơ dih, lơ đảng viên bơ ngai kon kông tơ̆ xăh Ea Tiêu, apŭng Cư Kuin, dêh char Dak Lak hlôi tơ ƀôh hơ dăh jơ hngâm đon jang rơ gei, tơ năp ‘lơ̆ng, hơ nơ̆ng năm hơ drol vang tơ gŭm ăn Đảng, khul kơ dră tơ ring tơ lĕch jang đei yoa ‘lơ̆ng dôm trong jang, tơ drong tơ gŭm, mă loi jĭ dôm tơ drong tơ gŭm ƀơm truh tơ drong jang atŏk tơ iung mŭk drăm tơ pôl tơ̆ tơ ring kon kông. Đảng viên bơ ngai kon kông jĭ tơ lei tơ guăt tôch kơ jăp tơ drong pôm ƀơ̆r đon đơ̆ng rim hơ drĕch hơ drung, vang vei kơ jăp tơ drong sơ đơ̆ng chinh trĭ, sơ đơ̆ng tơ pôl, tưk tơ iung tơ drong jang mŭk drăm, tơ pôl tơ̆ tơ ring.

Hương Lý: Chih

Dơ̆ng: Tơ blơ̆