Ƀok thây Hoàng Trọng Hải, pơtho tơ̆ hnam trưng THCS Cư Pui, xăh Cư Pui, apŭng Krông Bông, dêh char Đắk Lắk, hlŏh 10 sơnăm pơtho chư kŭm jing dôm noh sơnăm kŭm hăm thây kô nai chă năm truh tơ̆ rim hnam vă pơlung đe hŏk tro năm hŏk. Ƀok thây Hoàng Trọng Hải tơroi: Cư Pui jĭ xăh tơring 3, tôch pơmat tat, hŏk tro kon kông đei truh 80%. Mĕ ƀă hŏk tro tơ̆ âu chu ăn kon pơdơ̆h hŏk vă tơgŭm ăn unh hnam choh jang tơplih ăn tơdrong năm hŏk chư hloi.

Tơdrong krao hơvơn vă hŏk tro năm hŏk ưh kơ đei ƀônh kiơ. Mă lei hăm thây Hải mă đơ̆ng pơmat tat dang yơ oei athei adrin bơ̆ jang ‘mơ̆i, đĭ đăng yoa tơdrong arih ning mônh kơ kơ đe oh: “Thây kô năm truh tơ̆ rim hnam đe oh, pơlung mĕ ƀă ăn kon năm hŏk. Mă 2 ‘nŏh roi tơƀôh, pơlung đe ŏh lê̆ hăt năm jang mưh tam mă tôm sơnăm bơ̆ jang. Hnam trưng vang jang hơdoi hăm khul kơdră pơgơ̆r tơring bơ̆ jang tơdrong ‘nâu hơnơ̆ng”.

Oei tơ̆ xăh tơring 3 tôch pơmat tat ‘năi, xăh Ea Sin, apŭng Krông Búk, dêh char Đắk Lắk rim sơnăm vă hơiŏh năm hŏk tôm mưh truh sơnăm năm hŏk ‘nŏh athei đei tơdrong vang jang đơ̆ng đĭ đăng anih jang chinh trĭ hai. Ƀok Trần Văn Tiến, Kơdră vei lăng xăh ăn tơbăt, tơ̆ tơring đei 1 hnam trưng mầm non păng 1 hnam trưng jăl mônh, jăl ƀar. Akŏm đĭ đăng hŏk tro lơ̆m sơnăm hŏk 2024-2025 dang hlŏh 500 ‘nu.

Iŏk đơ̆ng blŭng khei 8, xăh hlôi pơtho ăn rim khul grŭp, chih hơmet hơnăn đe kon mon truh sơnăm năm hŏk, mă loi jĭ jăl mầm non păng jăl mônh vă năm truh tơ̆ rim hnam tơtă ăn đe mĕ ƀă athei ba kon năm hŏk trŏ năr: “Khei ‘năr âu ki khul thây kô vei lăng hnam trưng pơtho tơƀôh ăn dôm khul grŭp vang jang hơdoi, chă roi tơbăt athei chông ba kon mon tôm sơnăm năm hŏk. Năng atŭm tơdrong iŏk hŏk tro mât hŏk lăm 1 păng lăm mầm non sơnăm ‘nâu lăp hăm tơdrong hơgăt đei pơjao ngăl. Truh dang ei, dôm hnam trưng hlôi iŏk tôm kơsô̆ hŏk tro vă hơmet ăn sơnăm hŏk ‘nao”.

Tơdrong vei lăng, pơngơ̆t ăn hŏk tro pơmat tat đei jang ‘lơ̆ng. Tơ̆ Anih jang Đoàn – Đội, Hnam trưng jăl mônh Tô Hiệu, plt Buôn Ma Thuột, dêh char Đắk Lắk dôm năr ‘nâu, hơnơ̆ng đei thây kô chă iŏk hlar hŏk, hơbăn ao so đơ̆ng hŏk tro lăm hơdrol ‘măn ăn đe ŏh hŏk tro đei tơdrong arih xa pơmat tat hŏk đơ̆ng rŏng. Rim kơsơ̆p hla ar hŏk đei rơih, ƀao hơmet, hơbăn ao đei pih, uih hơmet, châp tăh lơ̆m tơpu hơnhăk ba ăn đe oh.

Kô Đoàn Thị Tuyết Yến, Hiê̆u trơng hnam trưng ăn tơbăt: Sơnăm hŏk 2024-2025, hnam trưng đei hlŏh 1.200 ‘nu hŏk tro, đơ̆ng lăm 1 truh lăm 5. 1/4 lơ̆m kơsô̆ âu jĭ kon hơ ‘lơ̆p bơngai Rađe tơ̆ Buôn A Lê B, lơ oh đei lơ̆m unh hnam tơnuh hin: “Hnam trưng athei rim bơngai vei lăng khul hơioh hơlen năng dôm bơngai, đei ŏh hŏk tro pơmat tat vă đei trong tơgŭm. Hnam trưng chih akŏm tôm păng đei lơ tơmam hơpăh ăn đe kon mon lơ̆m năr pơm lêh mât hŏk. Tơgŭm tôm hla ar hŏk vă đe oh năm hŏk gơ̆h đei tôm hla ar, tơmam hŏk pơhrăm nhen bôl boăl nai. Mă 2 ‘nŏh vang tơgop đơ̆ng bôl boăl tơ̆ hnam trưng hŏk sơnăm adrol ki bơ̆n hơbăn ao, tơmam yoa oei ‘lơ̆ng vă hơpăh ăn bôl boăl đei tơdrong arih xa pơmat tat”.

Tơ̆ apŭng sơlam Buôn Đôn, dêh char Đắk Lắk kơplăh dang ei, dôm hnam trưng hlôi hơmet tôm tơdrong ăn sơnăm hŏk ‘nao. Kiơ̆ ƀok Đỗ Ngọc Anh, Kơdră Anih vei lăng pơtho pơhrăm apŭng, sơnăm hŏk 2024-2025, lơ̆m apŭng đei hlŏh 16.000 ‘nu hŏk tro tơ̆ 34 hnam trưng đơ̆ng lăm mần non truh lăm 12 păng lăm pơtho hŏk ƀô tŭk. 50% kơsô̆ hŏk tro jĭ kon hơ ‘lơ̆p bơngai kon kông, tơdrong arih xa oei đei lơ pơmat tat. Vă đe oh năm hŏk tôm, Anih vei lăng pơtho pơhrăm adrin roi tơƀôh ăn Anih vei lăng kon pơlei apŭng, jang hơdoi hăm dôm anih jang kơpal đei ƀơm truh tơlĕch lơ tơdrong tơgŭm ăn đe oh. Atŭm hăm ‘nŏh, jang hơdoi hăm dôm hnam trưng tơlĕch trong jang mă hơdăh vă krao hơvơn đĭ đăng đe oh năm hŏk ngăl, hơtŏk tơdrong vang jang đơ̆ng tơpôl lơ̆m tơdrong pơtho pơhrăm, bơ̆ jang đei yoa ‘lơ̆ng tơdrong yak hơdoi hăm hŏk tro pơmat tat.

Ƀok Đỗ Ngọc Anh tơroi: “Dôm hnam trưng đei trong jang hơdoi hăm dôm khul jang tơgŭm, dôm bơngai đei đon ‘lơ̆ng vang tơgŭm ăn đe oh hŏk tro găh klang tap, hla ar hŏk, tơmam hŏk pơhrăm, hơbăn ao vă tơgŭm ăn đe oh đei đon adrin, chơt hơiă mưh năm hŏk”.

Tơ̆ apŭng Ea Súp, jĭ 1 tơring sơlam kơ dêh char Đắk Lắk ‘năi, sơnăm hŏk ‘nâu rŏ năng gô đei vă jê̆ 18.000 ‘nu hŏk tro năm hŏk. Hơdai hăm hơmet pơ ‘lơ̆ng lăm hŏk vă pơm lăp hăm tơdrong ‘mĕh vă hŏk pơhrăm đơ̆ng hŏk tro, pơgơ̆r pơtho hơmet ăn khul thây kô, anih pơtho pơhrăm apŭng hlôi bơ̆ jang chă hơlen năng rim hŏk tro pơmat tat vă tơtom jang hơdoi hăm dôm khul jang chinh trĭ, tơpôl, dôm bơngai đei jơhngâm đon ‘lơ̆ng vang tơgŭm ăn đe oh, ưh đei lê̆ oh yơ yoa tơdrong arih xa pơmat tat mă athei pơdơ̆h hŏk.

Ƀok Nguyễn Văn Khoá, Kơdră Anih vei lăng pơtho pơhrăm apŭng Ea Súp, dêh char Đắk Lắk ăn tơbăt: “Anih vei lăng pơtho pơhrăm pơtho ăn dôm hnam trưng chă hơlen năng đe ŏh hŏk tro đei tơdrong arih xa pơmat tat vă tơgŭm bơ̆n hla ar hŏk, hla ar chih, tơmam hŏk pơhrăm vang tơgŭm ăn đe ŏh năm hŏk sơnăm hŏk 2024 - 2025. Truh dang ei hlôi đei hlŏh 18.700 blăh hla ar chih păng hơpăh 50 tong gre tang vang păng 50 tơpu tơmam ăn hŏk tro bơngai kon kông, unh hnam tơnuh”.

Sơnăm hŏk 2024-2025, lơ̆m dêh char Đắk Lắk đei vă jê̆ 500.000 ‘nu hŏk tro rim jăl hŏk. Tơ̆ tơring hơtăih yăih oei đei lơ oh, unh hnam pơmat tat. Mă lei hăm dôm tơdrong tơgŭm ăn đe ŏh hŏk tro tơnuh đei Anih pơtho pơhrăm Đắk Lắk jang hơdoi hăm dôm tơring, anih jang lơ̆m dêh char đei tơlĕch jang hrôih hlôi tơgŭm ăn đe oh đei tôm tơdrong ‘lơ̆ng vă mât hŏk sơnăm hŏk ‘nao. Tơdrong jang gĭt kăl, tôch đei yoa âu ưh lăp tơgop pơm hơtŏk tơdrong juăt “tơgŭm băl” đĕch mă oei pơm hơtŏk đon lui, đon adrin, tơgŭm ăn hŏk tro tơnuh, đei tơdrong arih xa pơmat tat hơđơ̆ng jơhngâm năm hŏk mưh sơnăm hŏk ‘nao truh./.