Đei hơnih jê̆ anih kơdrơ̆m pơlei tơm Gia Nghĩa, xăh Đăk Nia đei dêh char Dak Nông pơjing ‘noh jĭ hơnih tơmang lăng tơpôl kơ bơngai Mnông Mạ; vei răk, tơmăk mong joh ayŏ joăt joe nhen tôn chĭng chêng, pơm tơiung ming dôm tơdrong et soi. Xăh hlôi pơjing đei pơlei tanh brai vai khăn păng tanh bơ̆n kơ đum kơđŏng, reo, hơkăt, grŭp jang hơdai pai tơdrô ge...., pơm đei dôm tơmam ‘lơ̆ng pơyua ăn tơmang lăng. Tơgop lơ̆m jơnei ‘noh đei hơnăp jang đơ̆ng đoàn viên hơdruh tơdăm hăm dôm tơdrong jang iung jang yua kơ tơdrong arih sa tơpôl, vang jang dôm tơdrong jang vei răk tơdrong joh ayŏ ‘lơ̆ng hơiă, pơm rơgoh cham char, vei ăn pơlei pơla rơgoh - ‘yâu- ‘lơ̆ng. Đơ̆ng dôm tơdrong jang đoàn, lơ hơdruh tơdăm bơngai kon kông hlôi chơt hơiă đei tơmơ̆t lơ̆m Đảng. Đảng viên mơlôh H’Don, Phŏ bí thư đoàn xăh Đắk Nia, tơbăt: Hăm hơnăp jang ‘noh jĭ phŏ bí thư đoàn xăh ĭnh kŭm ling lang hơtŏk ‘lơ̆ng jơhngơ̆m jang hơdrin, hŏk pơhrăm păng pơm kiơ̆ jơhngơ̆m đon ‘lơ̆ng đơ̆ng ƀok Hồ lơ̆m tơdrong jang. Ĭnh kŭm hơnơ̆ng tơroi tơbăt ăn kơ dôm đoàn viên hơdruh tơdăm nai hơdrin vă jing đảng viên lei lăi nhen ĭnh.

Oei đảng viên mơlôh Đỗ Thị Hạnh, kang ƀô̆ jang lơ̆m anih jang 1 ‘măng xăh Đắk Nia, tơroi: Hơtŏk jơhngơ̆m đon “đảng viên năm hơdrol, pơlei pơla kiơ̆ đơ̆ng rŏng”, ĭnh kŭm ling lang hơdrin iung jang hơdrol, pơm kiơ̆ tơ păt tơdrong hơgăt đơ̆ng anih jang, tơdrong hơgăt đơ̆ng khôi luơ̆t păng lơ̆m trong arih sa rim năr. Hơdai hăm ‘noh lơ̆m dôm jơ hŏk hôp chi bộ, ĭnh kŭm hơnơ̆ng apĭnh, tơgop nơ̆r lơ̆m dôm hla ar chih ming tơdrong tơchơ̆t vă tơlĕch ăn đei trong jang, hơnăp jang vă pơjing tơdrong jang ăn khei truh đei ‘lơ̆ng hloh.

Ƀok Lê Đình Cường, Bí thư anih jang Đảng xăh Đắk Nia, tơbăt, Đảng bộ xăh dang ei đei 217 đảng viên hŏk hôp tơ̆ 20 chi bộ. Băt hơdăh hơnăp jang hơdrol đơ̆ng đảng viên lơ̆m dôm tơdrong jang mŭk drăm tơpôl, xăh ling lang lăng kăl tơdrong jang hơtŏk tơiung Đảng, mă loi ‘noh jĭ lơ̆m tơring kon pơlei kon kông. 1 puăt blŭng sơnăm ‘nâu, Đảng bộ xăh hlôi tơmơ̆t đei 3 đảng viên ‘nao, lơ̆m noh đei 2 ‘nu bơngai kon kông. Dang ei Anih jang Đảng tŏk bŏk pơm dôm hla ar vă tơmơ̆t dơ̆ng 1 ‘nu đảng viên bơngai Mạ. Ƀok Lê Đình Cường, Bí thư Anih jang Đảng xăh Đắk Nia, tơroi: Dôm đảng viên mơlôh ‘noh đei hŏk pơhrăm ‘lơ̆ng kiơ̆ dôm hnam trưng đại học, păng hrei ‘nâu ‘noh Anih jang Đảng kŭm pơm tơdrong hiôk ăn năm hŏk dôm lăm lý luận chính trị, đơ̆ng noh đe sư hơtŏk jơhngơ̆m đon jang tơnăp bơ̆jang kiơ̆ ‘lơ̆ng dôm hơnăp jang đei pơjao. ‘Noh Đảng viên kŭm lăng kăl tơdrong jang hơtŏk tơiung đảng viên, mă loi ‘noh jĭ hơtŏk tơiung Đảng lơ̆m tơring bơngai kon kông. Păng tơ̆ hơnăp kơnh ‘noh nhôn kŭm tơlĕch ăn dôm trong jang, pơjao tơdrong hơgăt hơtŏk tơiung đảng hăm dôm chi bộ păng tơklep hơnăp jang đơ̆ng rim bí thư chi bộ kŭm nhen hăm dôm đảng viên vei lăng tơring.

Hơtŏk hơnăp jang chĕp kơ̆l đơ̆ng Đảng, lăng kăl hơtŏk tơiung đảng viên lơ̆m tơring bơngai kon kông, hlôi tơgop tơgŭm Đắk Nia jang đang tơdrong jang pơjing tơring tơrang ‘nao đơ̆ng sơnăm 2018. Đảng bộ, khŭl kơdră tơring kŭm hăm kon pơlei hơdrin hơtŏk tơiung mŭk drăm tơpôl vă hơtŏk jên iŏk yua jô̆ păh lăp kơ̆l bơngai 1 sơnăm đei hloh 60 triệu hlak jên, păng truh sơnăm 2025 xăh gô ưh pă đei ŭnh hnam dơnuh hin.