Tŏk bŏk anih bơ̆ jang ming man Cham xă tŏk bŏk plt Gia Nghĩa, dôm jĭt tŏ gre, kơ măy sir kôch oei hăt bơ̆ jang, chưk hơ met tĕh. Ƀok Trương Công Tiến, Bơ ngai vei lăng tơ drong jang man dơ nâu Gia Nghĩa, Công ty jang hơ doi ming man Phú Hiển Vinh, ăn tơ băt, anih jang oei tơ gĕch khei ‘năr tŏ ‘lơ̆ng vă hơ tŏk hrĕnh tơ drong jang ming man: “Hrei ‘nâu pơ tơm mât lơ̆m pơ yan phang, anih jang nhôn jang hơ doi hăm tơ ‘ngla tơ mât jên jang, akŏm gre, kơ măy kơ mŏk, bơ ngai jang vă hơ tŏk hrĕnh tơ drong jang ming man, adrin truh đĭ ‘năr 31/12/2022 ‘nŏh man đang cham xă păng dôm anih oei đei dơ̆ng.”

Ƀok Hồ Sỹ Điệp, Phŏ Kơ dră Anih vei lăng tơ drong tơ mât jên ming man dêh char Dak Nông tơ roi, Tơ drong jang man cham xă tŏk bŏk plt Gia Nghĩa đei jên jang truh 400 ti, khei ‘năr bơ̆ jang đơ̆ng 2022-2025. Jên tơ lĕch jang sơ năm 2022 ‘nŏh 54 ti. Mă đơ̆ng ‘nâu jĭ tơ drong jang tơm kơ dêh char mă lei tơ ƀâp lơ mơ mat tat đơ̆ng chưk pơ ‘ngoăih tĕh truh tơ drong kĭ ăn rim tơ drong jang, tơ lĕch jên jang... Dang ei dôm tơ drong tơ hlăk hlôi đei hơ met pơ ‘lơ̆ng vă pơ yoa ăn tơ drong jang ming man: “Anih vei lăng bơ̆ jang hăm dôm anih iŏk jang jăh hơ tŏk hrĕnh tơ drong jang. Oei tơ drong chưk pơ ‘ngoăih tĕh ‘nŏh hrei ‘nâu đĭ pơ jao đang ăn tơ ‘ngla tơ mât jên jang bơih, gô truh ‘năr 15/11 âu kơnh tơ lĕch jang ming man.”

Sơ năm 2022 akŏm đĭ đăng jên tơ mât jang kơ tĕh đak tơ̆ dêh char Dak Nông ‘nŏh 2.783,517 ti hlak jên. Jô̆ truh hơ tuch khei 10, dêh char ‘nao tơ lĕch dang 50% nơ̆r hơ găt. Tơ drong tơm pơm hiơ̆ hyĭn ‘nŏh yoa tơ drong pơm hla ar đunh păng tơ hlăk tăk mưh chưk pơ ‘ngoăih tĕh. Ƀok Lê Văn Chiến, Phŏ Kơ dră vei lăng kon pơ lei dêh char Dak Nông, ăn tơ băt, hơ tŏk hrĕnh tơ drong tơ lĕch jên jang, dêh char hlôi iŏk jên đơ̆ng dôm tơ drong jang ưh kĕ jang kĕh ăn dôm tơ drong jang hlôi jang đang; athei dôm tơ ‘ngla tơ mât jên jang, dôm anih iŏk jang adrin jang lơ̆m dôm khei pơ yan phang; păng khŏm hơ met pơ ‘lơ̆ng dôm tơ drong tơ hlăk tăk mưh hrŭ ‘mong tĕh vă chưk pơ ‘ngoăih.

Dak Nông pơ kăp vă tơ lĕch đei hlŏh 95% kơ sô̆ jên jang đei pơ jao: “Sơ năm ‘nâu Dak Nông tơ lĕch man ‘nao lơ anih, lơ tơ drong jang đei jên tôch lơ, iŏk đei vă jê̆ 1 puăt lơ̆m đĭ đăng kơ sô̆ jên tơ mât jang kơ tĕh đak lơ̆m sơ năm. Dôm anih âu athei đei khei ‘năr hơ met vă tơ mât jên jang, truh dang ei đĭ đăng anih hlôi đei chă rơih đang bơ ngai jang, păng vă tơ lĕch jên jang lơ̆m khei 11, khei 12. Mưh dôm anih jang âu chă đang bơ ngai jang ‘nŏh tơ drong tơ lĕch jên jang gô tŏk hrĕnh. Păng nhôn pơ kăp hăm Khul kơ dră tĕh đak, sơ năm ‘nâu vă tơ lĕch hlŏh 95% jên jang đơ̆ng tĕh đak.