Unh hnam ƀok Điểu Thắng, bơngai M’Nông, tơ̆ plei Tân Bình, xăh Đắk Ngo, apŭng Tuy Đức, dêh char Đắk Nông đei 5 ‘nu bơngai mă lei dang ei lăp 1 ‘nu ƀok bơ̆ jang tơm đĕch. Hơkăn ƀok pơ̆k đơ̆ng pham blŭh tơ̆ ‘ngok, kon drŏ nglo ‘nŏh pơ̆k gre, dang ei ưh gơ̆h bơ̆ jang. Ƀok Điểu Thắng oei đei 2 ‘nu kon drŏ kăn, sơnăm ‘nâu 15 păng 16 sơnăm, hŏk tro lăm 9 Hnam trưng THCS păng THPT Lê Hữu Trác, xăh Đắk Ngo. Ƀât blŭng sơnăm hŏk ‘nao, thây vei lăng lăm năm truh tơ̆ hnam pơlung bre oh năm hŏk păng roi tơbăt tơdrong tơgŭm tôch hơdăh đơ̆ng teh đak.

Ƀok Điểu Thắng ăn tơbăt, dôm sơnăm âu ki gơnơm đơ̆ng dôm tơdrong tơgŭm đơ̆ng Đảng, Teh đak ‘măn ăn hŏk tro pơmat tat, mă 2 ‘nu kon drŏ kăn ƀok gơ̆h đei năm hŏk pơhrăm, ưh kơ đei hŭt hŏk: “Unh hnam nhôn tôch mơmat tat, oei hơtăih kơ hnam trưng dơ̆ng, kŭm gơnơm đei tơdrong pơngơ̆t đơ̆ng Đảng, Teh đak, hnam trưng, chă tơgŭm ăn bre mon jên sŏng xa, jên kla anih tep, jên yak vih vât. Inh hơnơ̆ng chă pơlung bre kon adrin hŏk pơhrăm vă băt chư, băt pơm toan vă tơdrong arih xa ning mônh kơnh da ƀiơ̆ kơ pơmat tat ƀiơ̆.”