VOV4.Bahnar - Đoàn Grŭp dôm anih jang kơ tĕh đak păng Anih tĕch mơ dro dêh char Dak Nông ‘nao pơ gơ̆r pơ jao tơ drong jang đơ̆ng druh dăm “Tơ̆k hơ dăh trong pơ lei” ăn kon pơ lei păng khul kơ dră pơ gơ̆r xăh Trường Xuân (apŭng Đak Song).

Tơ dăm Anih jang unh điên chô̆ hơ met kơ ƀŏng unh điên

Tơ drong jang đei 40 kơ ƀŏng unh điên măt ‘năr, tơ̆k hơ dăh 2 tŏ trong tơ̆ plei N’Jang Bơ păng Ding P’lei (xăh Trường Xuân) kơ jung hlŏh 2km. Tơ drong jang đei kơ jă truh 60 triu hlak jên yoa đoàn viên, druh dăm dôm anih jang kơ tĕh đak, anih tĕch mơ dro lơ̆m dêh char vang tơ gop, tơ gŭm; druh dăm anih jang unh điên Dak Nông iŏk bơ̆ jang.

Khul druh dăm pơ jao tơ drong jang Tơ̆k hơ dăh trong pơ lei tơ̆ xăh Trường Xuân

Dôm jăl trong lơ̆m 2 pơ lei đei tơ̆k hơ dăh gô tơ gop vei lăng ‘lơ̆ng tơ drong sơ đơ̆ng tơ̆ tơ ring kon pơ lei oei xa, pơ jing tơ drong hiôk hian ăn kon pơ lei yak vih vât. Tơ drong jang “Tơ̆k hơ dăh trong pơ lei” oei tơ ƀôh dơ dăh đon jang tơ năp, bơ̆ jang tơ gŭm yoa tơ drong arih xa tơ pôl đơ̆ng sơ năm mơ lôh Dak Nông vang akŏm jơ hngâm pơ jing tơ ring tơ rang ‘nao.

Dơ̆ng: Tơ blơ̆