Kiơ̆ tơdra hơdrol, sơnăm au pơtrŭh ăn ŭnh hơyŭh lơ̆m dêh char Đắk Nông tŏk 10%, hăm dang 135 MW. Vă ‘lơ̆ng hơ iă hlŏh dơ̆ng lơ̆m pơtrŭh ăn ŭnh hơyŭh, Kŏng ty hlôi dăr lăng păng tơplĭh ‘nao, dăng dơ̆ng tơlei ŭnh hơyŭh, rim kmăi kmŏk tơpĭt plôih ŭnh hơyŭh, atŏk pran hơnĭh biến áp; iung jang pơtrŭh ŭnh hơyŭh hăm kmăi kmŏk tomatĭk đơ̆ng hơtăih, hơmet pơ ‘lơ̆ng tĕnh koăng mư̆h đei sar bar.

Trŭh dang ei, đĭ đăng 7 hơnĭh biến áp 110kV păng kmăi kmŏk plôih, tơpăt trung thế tơ̆ Đắk Nông hlôi đei iung jang hơmet pơ ‘lơ̆ng tơ̆ hơnĭh jang tơm, hơnơ̆ng đei bơ̆ jang ‘lơ̆ng kiơ̆ tơring vă hơmet pơ ‘lơ̆ng pơtrŭh ŭnh hơyŭh trŏ lăp, ư̆h kơlê̆ đei tơdrong sar bar pơm ăn ư̆h kơ đei ŭnh hơyŭh. Kŏng ty jei ăn khŭl bơ̆ jang gak vei lăng hơnơ̆ng vă tơtom ƀô̆h, hơmet pơ ‘lơ̆ng rim tơdrong đei ƀô̆h chrĭh tơ̆ tơlei ŭnh hơyŭh.