Kiơ̆ tơroi tơbăt đơ̆ng Anih tơlĕch nơ̆r sơkơ̆t păng tơmơ̆t jên jang Dak Nông, jô̆ truh dang ei, lơ̆m dêh char ‘nao tơlĕch jên jang đei 1.350 ti hlak jên tơmơ̆t jên jang teh đak, iŏk đei 34,5% trong tơlĕch jang, tŏ sĕt hloh 7% pơtêng hăm khei ‘nâu sơnăm sơ̆. Tơhlăk tơhlĭn lơ̆m iŏk pơdreo teh, tơhlăk tơhllĭn găh chĕng hơmet teh pơyua ăn sir ƀŭ, kơ lơ̆p, păng hơdrom băl chĕng hơmet teh bô xít ‘noh jĭ dôm tơdrong tơm pơm ăn hơnhăk truh tơlĕch jên tơmơ̆t jên jang teh đak tơ̆ Dak Nông iŏk đei tŏ sĕt. Lơ̆m noh, ƀơm ưh kơ ‘lơ̆ng kơtang hloh ‘noh jĭ yua đơ̆ng tơhlăk chĕng hơmet teh bô xít.

Ƀok Trần Đình Ninh, Kơdră vei lăng Anih tơlĕch nơ̆r sơkơ̆t păng tơmơ̆t jên jang Dak Nông tơbăt, đei lơ tơdrong ưh kơ ‘lơ̆ng găh chĕng hơmet teh păng dôm tơdrong hơgăt ƀơm truh pơm ăn lơ tơdrong jang đei tơklăk. Dêh char hlôi lơ ‘măng apĭnh trung ương hơmet pơ ‘lơ̆ng dôm tơdrong mơmat tat, tơhlăk tơhlĭn ƀơm truh chĕng hơmet teh bô xít mă lei truh dang ei oei tam mă hơmet pơ ‘lơ̆ng đei ‘mơ̆i, tơdrong tơlĕch jên tơmơ̆t jên jang teh đak sơnăm ‘nâu kơ dêh char tôch kơ hơnat kĕ jang đang.