Tŏk 7 xơnăm đơ̆ng rŏng kơ Khul Kơpal teh đak đei Tơchơ̆t 100 găh hơtŏk păng vei lăng hnam oei tơpôl, truh dang ei dêh char Đăk Nông pơtơm đei minh tơdrong jang đei tơlĕch mă lei lơ̆m tơdrong hiang hiơp, tŏk bŏk oei hơlen pơtôch tơdrong jang. Tơdrong hơtŏk hnam oei tơpôl lơ̆m tơring tŏk bŏk oei tơnap tap.  

Đơ̆ng rŏng 7 xơnăm Khul Kơpal teh đak đei Tơchơ̆t 100 găh hơtŏk păng vei lăng hnam oei tơpôl, tơ̆ Đăk Nông pơtơm iŏk jang đei 1 tơdrong jang

Ƀok Nguyễn Văn Nam, Phŏ Kơdră Anih Ming man dêh char Đăk Nông ăn tơbăt, truh dang ei, lơ̆m tơring kơ dêh char pơtơm tơlĕch ming man minh hơbon hnam oei tơpôl xă jê̆ 18.000m2, đei 127 tŏ hnam iĕ. Tơdrong jang âu đei iŏk jang tơ̆ phương Nghĩa Tân, pơlei tơm Gia Nghĩa, đei jên axong jang 139 rơtăl hlj. Đơ̆ng rŏng 5 xơnăm tơlĕch man, 3 'măng hơmet tơchơ̆t axong jang, tơplih anih iŏk man păng hơtŏk jên ming man truh 162 rơtăl hlj, tơdrong jang keh đang đei 16 tŏ hnam, 28 hnam nai tŏk bŏk oei ming man. Tơdrong ming man mă blŭng truh dang ei oei lơ tơxŭl tơxăl, păng tŏk bŏk oei đei hơlen pơtôch hloi. Xơkơ̆t tôm tơdrong jang, ƀok Nam akhan tơdrong hơtŏk hnam oei tơpôl lơ̆m tơring dang ei tơnap tap. Minh păh noh kơlih dêh char oei hin dơnuh, tam mă đei jên vă ming man dăh mă tơgŭm ăn dôm anih jang mŭk drăm tơlĕch pơm kiơ̆ dôm tơdrong pơkăp jang. Păh nai dơ̆ng noh anih axong jang tơ 'ngla tam mă tơrĕk truh tơdrong âu tơ̆ tơring kơlih dôm anih jang kŏng ngĭp tam mă hơtŏk tơ iung, tơdrong kăl hnam oei tơpôl oei kơđeh.