Sơ̆ ŭnh hnam ƀok BNươ̆ch Ngang, oei tơ̆ koeng kơphô̆ A Duông, thĭ trân Prao, apŭng groi kông Đông Giang, dêh char Quảng Nam găh ŭnh hnam dơnuh. Rim năr, ƀok BNươ̆ch Ngang năm tơ̆ mir chă pơtăm ƀum ƀlang, chik, ‘long găr sơlơ̆k …, tơdrong hơrih sa tôch mơmat tat. Đơ̆ng rŏng ‘noh, ƀok BNươ̆ch Ngang đei Hơnih jang vei lăng Choh jang sa dêh char Quảng Nam păng khul kơdră apŭng Đông Giang tơgŭm djru hơdrĕch ‘long pơtăm choh jang sa-bri ‘long.

Hrei au, ƀok BNươ̆ch Ngang đei 4 hektar ‘long sâm ba kích ƀrê 5 hektar ‘long keo păng ‘long yôih, kuê̆. ‘Ngoăih kơ ‘noh ƀok oei chă rong hloi pơbe, nhŭng hmă ..., mĭnh sơnăm jang sa iŏk đei đơ̆ng 150-200 triu hlak jên. Ƀok BNươ̆ch Ngang ‘noh đảng viên hơnơ̆ng pơm jŭk yŭk trong hơlau lơ̆m rim tơdrong jang. Ƀok ‘noh bơngai chĕp kơ̆l koeng kơphô̆ A Duông, thĭ trân Prao, apŭng Đông Giang. Ƀok hơnơ̆ng chă tơƀơ̆p, pơma dơnuh păng pơtho ăn kon pơlei Kơ Tu choh jang sa. Bơngai ayơ tơnap tap, ‘meh vă đei hơdrĕch dơđăh ‘long pơtăm, ƀok BNươ̆ch Ngang jei tơgŭm djru hloi. “Ba bơngai đảng viên kơna kăl pơm jŭk yŭk trong hơlau ăn rim kon pơlei lơ̆m pơlei bơ̆n. Trong jang sa kơ ba đei iŏk yua kơjăp, kon pơlei tŏk bŏk hŏk pơhrăm păng jang kiơ̆. Rim ‘măng hop akom pơlei păng hơnơ̆ng chă pơtho ăn kon pơlei găh tơdrong pơtăm rim hơdrĕch ‘long pơtăm păng vei lăng ‘long pơtăm, rong kon tơrong. Hơpơi kơdră tơring hơnơ̆ng chă tơgŭm djru ăn rim ŭnh hnam đei teh choh jang sa găh hơdrĕch ‘long pơtăm, tơgŭm ăn kon pơlei đei tơdrong jang sa păng iŏk yua kơjăp”.

Ƀok BNươ̆ch Ngang hơnơ̆ng chă pơrô̆ pơrôp, pơtho khan ăn kon pơlei tơ iung pơjing hơrih sa ‘lơ̆ng hơ iă, hŭt dôm tơdrong joăt joe pă trŏ lăp. Ƀok A Lăng Minh, hơdrung Kơ Tu oei tơ̆ thĭ trân Prao tơroi, sơ̆, ŭnh hnam sư găh ŭnh hnam dơnuh, đei ƀok BNươ̆ch Ngang năm tơ̆ hnam chă pơtho trong jang sa, rong kon tơrong păng choh pơtăm kơna dang ei ŭnh hnam hlôi dă ƀiơ̆ tơnap tap bơih:“Đảng viên BNươ̆ch Ngang yuk trong hơlau lơ̆m atŏk tơ iung mŭk drăm lơ̆m tơring. ‘Ngoăih kơ ‘noh oei chă pơtho ăn kon pơlei găh choh jang sa, rong kon tơrong nhen chă pơtăm sâm ba kích brê kơna tơdrong hơrih sa kơ kon pơlei sơđơ̆ng păng hơdrin jang sa yak hloh dơnuh hin”.

Lơ đảng viên sơnăm mơlôh oei tơ̆ tơring groi kông apŭng Đông Giang, dêh char Quảng Nam hlôi atŏk kơtang jơhngơ̆m đon pơm jŭk yŭk trong hơlau, nơ̆r pơma tơ-‘ngla iung jang hloi, hơdrin yak hloh dơnuh hin. Đảng viên sơnăm mơlôh ATing Nấu oei tơ̆ thĭ trân Prao, apŭng Đông Giang jei mĭnh ‘nu bơngai yŭk trong hơlau mơ̆n. Hrei au, ATing Nấu hlôi pơjing pơgar să rong nhŭng hmă, rong iĕr, bip, sir dơnau rong ka păng pơtăm ‘long sa plei nhen: sầu riêng, ‘long lòn bon…

Ƀok Nguyễn Hữu Sanh, Kơdră chĕp pơgơ̆r Khul kon pơlei choh jang sa apŭng Đông Giang, dêh char Quảng Nam tơbăt: găh lơ đảng viên tơ̆ au jei jang ‘lơ̆ng lơ̆m pơm jŭk yŭk trong hơlau lơ̆m choh jang sa, atŏk tơ iung mŭk drăm. Hlôi đei lơ bơngai jang sa hơgei nhen ƀok BNươ̆ch, ATing Nấu... Đe sư hlôi tơƀôh hơdăh jơhngơ̆m đon “đảng viên pơchoh trong, kon pơlei giong kiơ̆ đơ̆ng rŏng”, jĭ dôm bơngai pơjing đei jơhngơ̆m pran kơtang lơ̆m choh jang sa, xut xa pơngot rơvĕt tơjur dơnuh:“Đảng viên yŭk trong hơlau lơ̆m atŏk tơ iung mŭk drăm. Mă kăl ‘nŏh đảng viên jang lơ̆m khul kon pơlei choh jang sa ling lang pơm jŭk yŭk trong hơlau tơlĕch jang kiơ̆ rim trong choh jang sa, mă kăl jang mir pơgar, jang pơgar să, pơjing đei chŭn mir jang sa iŏk yua kơjăp, tơgŭm ăn kon pơlei hơdrin pơm pơdrŏng păng yak hloh dơnuh hin kơjăp.”

Rim sơnăm, Khul kon pơlei choh jang sa dêh char Quảng Nam iung jang hơdoi hăm rim hơnih jang, tơring, tơgum djru 1.500 đảng viên bơngai jang lơ̆m Khul kon pơlei choh jang sa chă tŏk iŏk jên hăm jên chĕh tŏ sĕt, tĕch ăn hơdrĕch, yŏng kon tơrong, tơgŭm ăn rim đảng viên atŏk tơ iung mŭk drăm. Ƀok Hồ Quang Bửu, Kơ iĕng kơdră chĕp pơgơr Hơnih vei lăng kon pơlei dêh char Quảng Nam tơbăt: lơ đảng viên ưh khan lăp choh jang sa hơgei mă oei hơdrin tơgŭm djru lơ kon pơlei ŭnh hnam tơnap tap băt jang sa, atŏk jang sa iŏk yoa kơjăp, sơđơ̆ng hơrih sa, tơgop tơ iung pơjing tơring tơrang ‘nao:“Hrei au, mĭnh ƀar ‘nu đảng viên tơ̆ rim apŭng groi kông choh jang sa gơ̆h hơgei, đe sư choh jang sa hơnhăk đei iŏk yua kơjăp păng pơjing đei trong choh jang sa hle ăn kon pơlei kiơ̆ yok rok jơ̆ng. Mă hơdăh ‘noh đe sư pơtăm ‘long sâm păng ‘long pơgang hơnhăk đei iŏk yua kơjăp hloh. Tơdăh tơ̆ tơring groi kông đei lơ đảng viên pơm jŭk yŭk trong hơlau lơ lau lei tơdrong hơrih sa kơ kon pơlei đei tơplih ‘lơ̆ng hơ iă hloh".