Khŭl vei lăng drŏ kăn xăh sơlam Đăk Dục, apŭng Ngọc Hồi, dêh char Kon Tum đei 9 Chi hội hăm hloh 900 bơngai jang lơ̆m khŭl. Hloh 7 sơnăm pơm Kơdră Khŭl vei lăng drŏ kăn xăh, mŏ Y Chon tơbăt, vă dôm bơngai jang lơ̆m khŭl hăm 98% mŏ oh ‘noh bơngai Giẻ- Triêng hơdrin vang jang tơdrong jang Khŭl, kơdih kâu sư athei ling lang pơm jŭk yŭk trong hơlâu, năm hơdrol lơ̆m đĭ đăng dôm tơdrong jang, hơnăp jang đơ̆ng Khŭl kŭm nhen tơdrong jang chĭnh trĭ, tơ pôl kơ tơring. Hơdai hăm ‘noh jĭ truh tơ̆ rim pơlei, tơ jê̆ băt hơdăh tơdrong, jơhngơ̆m đon hơ pơi ‘meh vă đơ̆ng rim bơngai jang lơ̆m khŭl.

Tơ̆ hơnăp tơdrong yan âu tơmam đơ̆ng choh jang sa tơƀơ̆p mơmat tat lơ̆m tơdrong tĕch mơdro, sơnăm 2019 mŏ Y Chon krao hơvơn mŏ oh pơjing Hơp tak xăh Dục Nông hăm 7 ‘nu jang, hơnơ̆ng pơjing tơdrong jang ăn kơ 45 ‘nu bơngai jang lơ̆m khul drŏ kăn đei dơ̆ng jên iŏk yua đơ̆ng 80- 100 triệu hlak jên 1 sơnăm. Kŭm đơ̆ng đon tơchĕng ‘noh “ Grŭp jang hơdai rong nhŭng bronh” đei pơ jing tơdrong jang sa sơđơ̆ng ăn dôm jĭt ‘nu bơngai jang lơ̆m khŭl. Mŏ Y Chon pơma hơdăh, ‘nâu jĭ dôm tơdrong jang tơiung tơdrong jang jang sa tôch kơ jơnei đơ̆ng mŏ oh jang lơ̆m khŭl drŏ kăn tơring: “Dang ei nhôn hlôi đei dôm tơdrong vă tĕch ăn anih mơdro sa. Nhôn ưh khan lăp tĕch nhŭng oei hơrih, ‘nhĕm nhŭng hơdrih dăh mă nhŭng yŏng dơ̆ng bơih mă nhôn tơplih ‘nhĕm nhŭng ‘noh jing tơmam ‘nhĕm  nhŭng chhu tơ̆ hơdra păng nhôn hlôi rơih iŏk tơmam âu vă pơ long tơmam Ocop kơ dêh char păng iŏk đei 3 hơ nglŏng. Truh dang ei tơmam nhôn đei anih tĕch mơdro sơng iŏk tôch kơ ‘lơ̆ng, mă loi ‘noh jĭ dôm năr Têt ‘noh tơmam nhôn ưh kơ măh ăn anih tĕch mơdro.”

Đơ̆ng hla kơ blŭng Y Chon, dôm tơdrong jang yua đơ̆ng Khŭl vei lăng drŏ kăn xăh Đăk Dục pơjing, nhen: “Pơm kiơ̆ Ƀok Hồ”, “Trong pơkao”, “Dur var rơgoh”, “Tơplih râm rĕk jing jên”.... hơnhăk ăn iŏk yua hơdăh ‘lơ̆ng tơgop pơm tơplih trong tơchĕng, trong jang đơ̆ng kon pơlei tơring sơlam. ‘Moi kiơ̆ tơdrong jang “Drŏ kăn hơdai hăm Ƀô̆ đô̆i vei lăng  tơring sơlam vei lăng tơdrong pơm tơm sơđơ̆ng sơlam tơring tơklep hăm vei lăng tơmam drăm, cham char”, mŏ Y Chon hơdrin tơ roi tơbăt, krao hơvơn bơngai jang lơ̆m khŭl păng kon pơlei hơtŏk ‘lơ̆ng đon hlôh vao lơ̆m tơdrong jang vei lăng vă jê̆ 8km trong sơlam teh đak tơtil teh đak CHDCND Lào păng sơđơ̆ng lơ̆m tơring: “Kơdih kâu ĭnh ‘noh jĭ bơngai chĕp kơ̆l kơ Khŭl jang kŭm jing bơngai rơneh păng tih vơ̆ tơ̆ tơring sơlam, ĭnh hlôh hơdăh hloh pơm thoi yơ vă kơ gơh vei lăng tơring sơlam. Ĭnh tơroi tơbăt, krao hơvơn mŏ oh ‘nĕ kơ pơm kiơ̆ dôm tơdrong kơ nê̆ đơ̆ng bơngai kơ nê̆. Nhôn kŭm hơnơ̆ng jang hơdai hăm Kơ đông lĭnh vei lăng sơlam Dục Nông vă kơ jang ‘lơ̆ng tơdrong jang tơ roi tơbăt krao hơvơn ăn dôm mŏ oh jang lơ̆m khŭl mă hơmơt ƀônh kơ lui lơ̆m bơngai kơ nê̆, đang kơ ‘noh kon pơlei đei kơ tum kơ tŏng ‘nhŏng oh tơ̆ Lào ‘noh nhôn kŭm hơnơ̆ng bơngơ̆t truh.”

Dôm tơdrong jang đei yua đơ̆ng Khŭl vei lăng drŏ kăn xăh Đăk Dục tŏk bŏk roi ‘năr roi sơkơ̆t hơdăh đei hơnăp jang, anih dơ̆ng đơ̆ng mŏ oh drŏ kăn lơ̆m pơjing ŭnh hnam phĭ tơnŏ, hiôk hian păng vang jang tơdrong jang tơpôl. Đơ̆ng kơ sô̆ jên hloh 28 ti hlak jên Khŭl vei lăng drŏ kăn xăh Đăk Dục dơ̆ng tŏk iŏk jên Anih mong jên tơgŭm tơpôl, hơdai hăm hơnơ̆ng pơgơ̆r pơhrăm, pơtho khoa hŏk ki thuơ̆t, pơtho tơdrong jang tơklep hăm roi tơbăt, pơ jing tơdrong jang.... vă jê̆ 590 ŭnh hnam bơngai jang lơ̆m khŭl drŏ kăn tơ̆ xăh Đăk Dục hlôi tơplih đei iŏk yua. Mă loi ‘noh jĭ đei 22 ‘nu drŏ kăn jang lơ̆m khŭl tơ ‘ngla ŭnh hnam dơnuh hin đei Khŭl tơgŭm hlôi klăih đơ̆ng dơnuh hin kơjăp. Yă Y Phương, Kơdră Khŭl vei lăng drŏ kăn dêh char Kon Tum lăng ‘lơ̆ng dôm tơdrong tơgop đơ̆ng mŏ Y Chon hăm tơdrong jang Khŭl tơ̆ xăh sơlam Đăk Dục, apŭng Ngọc Hồi: “Mŏ Y Chon jĭ 1 lơ̆m dôm kang ƀô̆ Khŭl ‘noh bơngai kon kông tôch kơ pơnam, hơdrin, pơ̆n tơchĕng, pơ̆n jang. Sư ling lang tơchĕng hơlen, hŏk pơhrăm, đŏk lăng hla ar pơgơ̆r đơ̆ng kơdră kơpal păng tơ gĕch iŏk tơdrong pơgơ̆r đơ̆ng kơdră đảng, jang hơdai kơjăp hăm khŭl kơdră tơring păng dôm anih jang, khŭl grŭp kơ xăh băt hơdăh tơdrong đơ̆ng bơngai jang lơ̆m khŭl drŏ kăn vă tơlĕch jang kiơ̆ hơnăp jang kơ Khŭl păng hlôi hơnhăk ăn iŏk yua ‘lơ̆ng sơng iŏk, akŏm lơ lap đei bơngai jang lơ̆m khŭl drŏ kăn vang jang.”

Đơ̆ng jơhngơ̆m đon jang tơnăp hăm tơdrong jang Khŭl đơ̆ng mŏ Y Chon, dôm tơdrong jang kơ Khŭl vei lăng drŏ kăn xăh Đăk Dục roi ‘năr roi sơng đei lơ lap drŏ kăn păng kon pơlei lơ̆m xăh vang jang. Khŭl vei lăng drŏ kăn xăh hlôi hơtŏk tơiung đei dơ̆ng 210 ‘nu bơngai jang lơ̆m khŭl ‘nao đei 100% trong tơlĕch jang tơlĕch ăn; roi tơƀôh 16 ‘nu bơngai jang lơ̆m khŭl hơgei ăn Đảng set lăng, tơmơ̆t... Kơdih mŏ Y Chon hơnơ̆ng đei Khŭl chĕp kơ̆l Đảng Bộ xăh Đắk Dục hơpăh hla ar pơ ư iŏk đei hơnăn Đảng viên jang đang hơgei hloh hơnăp jang; đei khŭl kơdră, khŭl tơpôl pôk hơpăh lơ Bằng khen, hla ar pơ ư. Khei 6 âu ki mŏ Y Chon chơt hơiă ‘noh jĭ 1 lơ̆m 5 ‘nu bơngai kơ dêh char Kon Tum đei năm tơ̆ anih tơm Hà Nội vang Hop akŏm pôk pơ ư bơngai jang hơgei lơ̆m teh đak ƀlep ƀơ̆t tơbăt 75 sơnăm Năr ƀok kơdră Hồ Chí Minh tơlĕch nơ̆r krao hơvơn pơjei băl ‘mêm kơ teh đak. Hop akŏm yua đơ̆ng Jơnŭm vei lăng Pơjei băl - Pôk hơpăh Trung ương pơgơ̆r.