Mĭnh tơdrong pơgơ̆r pơm pơtih ăn tơ̆ hop akŏm, lăp đơ̆ng rŏng mơ̆ng Kơdră chĕp pơgơ̆r Hơnih tơm vei lăng Hnam trương pơtho pơhrăm tơblang hơdăh găh tơdrong tơm pơm ăn kơ tơdrong hil hơreh teh dong lơ̆m hnam trương, Bơngai tang măt Đậu Khắc Gia Bảo kơ Khul bơngai tang măt Kuô̆k hô̆i hơ ioh dêh char Quảng Trị, pơma apĭnh tơ̆ hop akŏm:“Ơ ƀok Kơdră chĕp pơgơ̆r Hơnih tơm vei lăng Hnam trương pơtho pơhrăm, ĭnh đĭ măng tôch hơlen nơ̆r tơblang hơdăh đơ̆ng ih găh tơdrong tơm pơm ăn tơdrong hil hơreh teh dong lơ̆m hnam trương. Mă lei kiơ̆ kơ ĭnh ƀôh Ih tim mă tơl hơdăh tơdrong đei ƀơm kơnê̆ truh jơhngơ̆m đon găh tơdrong hil hơreh teh dong lơ̆m hnam trương ‘mơ̆i?

Bơngai tang măt ăn Hơnih tơm vei lăng Hnam trương pơtho pơhrăm tơl nơ̆r apĭnh:“Ĭnh bơnê păng lăp đon hăm bơngai tang măt Kuô̆k hô̆i Đậu Khắc Gia Bảo pơma ‘noh, ‘nou jei jing tơdrong tim gan lăp, kơna truh ou kơnh, nhôn gô iung jang hơdoi kơjăp hăm hơnih jang vei lăng jang pơgang vă atŏk kơtang tơlĕch jang păng sek tơlang tơtom hloh dơ̆ng dôm tơdrong oei sa pơma dơnuh kơ hŏk tro”.

Iung pơma tơ̆ hop akŏm ou găh tơdrong “Tang găn hơlou, iung tơjră tang găn hil hơreh teh dong lơ̆m hnam trương”, Kơdră chĕp pơgơ̆r Hơnih tơm vei lăng hnam trương Pơtho pơhrăm Nguyễn Kim Sơn akhan:“Tơl nơ̆r apĭnh ou hei, pơma akhan ‘noh pơm pơtih ăn mă lei tơdrong ou ưh khan chă pơm pơtih ăn ôh, ‘nou jing tơdrong đei tơpă. Ĭnh ƀôh đe oh chă apĭnh păng hlôh vao hơdăh găh tơdrong ou adoi nhen dôm trong vă jang mă Hơnih tơm vei lăng Hnam trương pơtho pơhrăm hlôi pơma truh, tơlĕch jang kiơ̆. Bơ̆n kăl atŭm dih băl sơkơ̆t mă hơdăh, hnam trương hŏk ‘lơ̆ng rŏ ưh kơ lê̆ đei tơdrong hil hơreh teh dong, đei tơdrong kơnê̆ păng dôm tơdrong pơm hơmơt ăn truh hăm đe hŏk tro”.

Găh Kơdră chĕp pơgơ̆r Hơnih tơm vei lăng jang pơgang Đào Hồng Lan, mă đơ̆ng vang năm Hop akŏm Pơm pơtih ăn Kuô̆k hô̆i đe hơ ioh, mă lei Kơdră chĕp pơgơ̆r ou lăng nhen tŏk bŏk vang hop akŏm apĭnh tơl nơ̆r apĭnh tơpă hloi:“Dôm nơ̆r chă apĭnh adoi nhen nơ̆r tơl hơdăh đơ̆ng rim Bơngai tang măt hơ ioh tôch trŏ lăp păng tơpăt, tơƀôh hơdăh jơhngơ̆m đon lăng ba kơjăp truh dôm tơdrong kơ hơ ioh. Ba ƀôh tôch trŏ lăp hăm đe hơ ioh hrei ou. Dôm tơdrong đei ƀơm truh tơdrong chă et hơ̆t, mă kăl hơ̆t hle, hơ̆t điên tư păng rim kơchơ̆t pơm kơnê̆ jơhngơm jăn nhen hơlăk, ƀier, đei ‘măng truh hloi ma tuý jei jing dôm tơmam pơm pơjoă tih tên hloh truh jơhngơ̆m pran jăng grăng akou kơ đe hơ ioh pơma atŭm, adoi nhen tơdrong hơrih sa ‘lơ̆ng rŏ hơmŏ nhen kon pơlei pơla kơ lơ̆m teh đak bơ̆n”.

Hăm hơnăp jang jĭ Bơngai tang măt Kuô̆k hô̆i hơ ioh kơ Khul bơngai tang măt Kuô̆k hô̆i pơlei tơm Hà Nội, oh Nguyễn Trà My, lăm 8 B3,  Hnam trương jăl ƀar Vinschool Times City pơma:“Lơ̆m ‘măng hop akom năr brei, rim bơngai hlôi chă pơma dơnuh tôch kơ tang păng đei lơ nơ̆r chă pơma dơnuh dih băl tôch hơ iă. Ĭnh hơmŏ, dôm nơ̆r tơgop păng nơ̆r ĭnh chă pơma gô đei rim Hơnih tơm, hơnih jang chă mơ̆ng păng lăng ba kơjăp hloh dơ̆ng, đei rim trong pơchoh ăn đơ̆ng dôm nơ̆r nhôn chă tơgop, vă kĕ pơtôch hloi dôm tơdrong ưh kơ ‘lơ̆ng hơ iă lơ̆m jơhnơr nhôn”.

Lăp đơ̆ng rŏng vang năm ‘Măng apĭnh jet păng tơl nơ̆r apĭnh pơpơm pơtih ăn, Kơdră chĕp pơgơ̆r Kuô̆k hô̆i Trần Thanh Mẫn hôn bơnê kơtang kơ Trung ương Đoàn, Jơnŭm Đội Trung ương hlôi đei trong tơchăr hơ iă hăm rim hơnih bơ̆ jang pơgơ̆r ‘Măng hop akŏm pơm pơtih ăn “Kuô̆k hô̆i đe hơ ioh”. Adoi pơma hơdăh, Đảng, Teh đak ling lang lăng ba kơjăp, vei lăng năng tông gĭt kăl hăm tơdrong jang vei lăng năng tông, pơtho pơhrăm hơ ioh. Kiơ̆ đơ̆ng Kơdră chĕp pơgơ̆r Kuô̆k hô̆i, ‘măng hop akom Pơm pơtih ăn “Kuô̆k hô̆i đe hơ ioh” ‘măng mă ƀar hlôi rơ̆ih 2 tơdrong tơm ‘noh “Tang găn hơlou, tơjră tang găn tơdrong hil hơreh teh dong lơ̆m hnam trương” păng “Tang găn tơdrong pơrăm đơ̆ng hơ̆t, tơmam pơm kơnê̆ jơhngơ̆m jăn, mă kăl lơ̆m hnam trương hŏk pơhrăm” tôch kơ trŏ lăp, đei tơpôl kon pơlei lăng kơjăp.