Tơ̆ pơm lêh sơng iŏk, Kơdră chĕp pơgơ̆r Jơnŭm vei lăng Kon Kông kơ Kuô̆k hô̆i Y Thanh Hà Niê Kđăm atŭm hăm tang măt rim hơnih tơgŭm djru hlôi pơjao ăn 300 triu hlak jên ăn Hơnih mong jên Kơ yuơ bơngai dơnuh păng 50 triu hlak jên ăn Hơnih mong jên lăng ba dôm bơngai đei iok yua ăn teh đak dêh char Dak Lăk. Sơng iŏk kon jên, Hơnih bơ̆ jang Mặt trận Tổ quốc Việt Nam dêh char hlôi klăh asong ăn 2 apŭng Cư̆ Kuin păng Cư̆ Mgar vă tơlĕch rim trong jang tơgŭm djru ăn ŭnh hnam đei iok yua ăn kĕch mang păng tơgŭm djru tơ iung pơjing hnam oei ăn bơngai dơnuh. Hơnih bơ̆ jang Mặt trận Tổ quốc Việt Nam dêh char Dak Lăk tơbăt: truh vă đĭ sơnăm 2023, dêh char Dak Lăk oei đei vă jê̆ 46.100 ŭnh hnam dơnuh păng hlŏh 34.000 ŭnh hnam vă jê̆ dơnuh, tơmơ̆t 16% ŭnh hnam. Hrei ou, hnam oei kơ unh hnam dơnuh păng vă jê̆ dơnuh oei tim mă kơjăp ‘lơ̆ng, lơ̆m mă kon jên tơgŭm djru đơ̆ng dêh char oei kơƀăh kơƀôch. Kơ yuơ lơ loh, hơnih ling lang kơrŭn jơhngơ̆m krao hơvơn rim hơnih jang, rim bơngai đei jơhngơ̆m đon ‘lơ̆ng vang tơgum djru vă pơjing kon jên mong tơgum djru ăn bơngai dơnuh.