Hơnơ̆ng ăh jê̆ hơtuch giĕng dăh mă lơ̆m ‘năr pơdơh lêh, 21 Đảng viên đei Kơđông ƀô đô̆i vei sơlam teh Axan pơtruh năm tơgŭm 95 unh hnam tơ̆ 2 tơring AXan păng Tr’hy, apŭng Tây Giang (dêh char Quảng Nam), đe sư chă năm hơlen băt rim unh hnam tơ̆ tơring sơlam.

Vă băt hơdăh tơdrong hơpơi ‘meh, atŭm hăm chă hơlen băt tơdrong tơchĕng, trong pơm jang đơ̆ng kon pơlei, đe kang ƀô̆ linh  Kơđông ƀô đô̆i vei sơlam teh Axan hlôi tơlĕch lơ tơdrong jang chă tơgŭm kon pơlei tơring sơlam teh, unh hnam tơnap tap hơtŏk pơm jang klaih đơ̆ng hin dơnuh.

Unh hnam ƀok Bliềng, tơ̆ thôn Ki’noonh, tơring Axan, adrol ki noh hin dơnuh. Đơ̆ng đei đe Đảng viên Kơđông ƀô đô̆i vei sơlam teh Axan tơgŭm, pơtho trong pơm jang, tơdrong hơrih unh hnam ƀok Bliềng hlôi tơplih ƀôh hơdăh: “Adrol ki, unh hnam inh tơnap tap, tơdrong hơrih kơƀah tôm tơdrong, đei đe met tơ̆ Kơđông ƀô đô̆i vei sơlam teh tơgŭm ăn hơdrĕch nhŭng yŏng, pơtho găh trong vei rong noh nhŭng vơ̆ pran, pơyua lơ ăn unh hnam. Hmach bơnê kơ đe met ƀô đô̆i lơ”

Tơdrong tơgŭm đơ̆ng đe Đảng viên Kơđông ƀô đô̆i vei sơlam teh Axan hlôi tơgop kăp gĭt hơvơn kon pơlei adrin pơm jang. Thượng uý Nguyễn Văn Trọng, Kơdră Khul jang hơvơn kon pơlei, Kơđông ƀô đô̆i vei sơlam teh Axan ăn tơbăt, anih jang asong ăn rim Đảng viên iŏk tơgŭm đơ̆ng 5 truh 7 unh hnam hin dơnuh, unh hnam ưh đei ‘nhŏng oh vei rong, đei tơdrong hơrih tơnap tap.  Găh Trọng noh iŏk tơgŭm 5 unh hnam: “Đei đơ̆ng tơdrong mŭk drăm tơpôl lơ̆m tơring mă anih linh pơm jang, tơdrong erih kon pơlei oei ƀơm lơ tơnap tap. Anih linh tơlĕch lơ trong jang tơgŭm kon pơlei hơtŏk mŭk drăm. Đơ̆ng rŏng kơ đei kang ƀô̆ Kơđông Ƀô đô̆i vei sơlam teh Axan tơgŭm chă pơtho găh rong kon tơrong, choh pơtăm, kon pơlei dar deh chă đei trong jang kơ unh hnam lơ̆m hơtŏk mŭk drăm. Mă kăl noh, dôm trong jang hơtŏk mŭk drăm unh hnam pơyua lơ găh mŭk drăm, tơgop hơtŏk iŏk yua ăn tơdrong erih kon pơlei lơ̆m tơring”

Vă tơlĕch jang đei jơnei tơdrong jang Đảng viên Kơđông ƀô đô̆i tơgŭm unh hnam kon pơlei tơring sơlam, Kơđông ƀô đô̆i sơlam teh Axan rơih đe kang ƀô̆ linh hlôh vao kloh klĕch găh khôi juăt kơ kon pơlei. Kiơ̆ đơ̆ng noh, tơlĕch tơgŭm kon pơlei chă hơtŏk mŭk drăm, sut lê̆ pơngot tơjur hin dơnuh. Thiê̆u tă Nguyễn Văn Lợi, Ƀĭ thư Anih jang Đảng, jang chĭnh trĭ tơ̆ Kơđông ƀô đô̆i vei sơlam teh Axan, apŭng Tây Giang, dêh char Quảng Nam ăn tơbăt: Đơ̆ng tơlĕch pơtruh đảng viên pơm jang, tơgŭm unh hnam, tơdrong erih kon pơlei hlôi tơplih ƀôh hơdăh, đei lơ unh hnam tŏk pơm pơdrŏng: “Kơđông ƀô đô̆i pơtruh Đảng viên năm tơgŭm unh hnam hin dơnuh lơ̆m tơring. Tơdrong tơm noh vă băt hơdăh rim unh hnam âu, vă băt đe sư kăl yă kiơ vă tơgŭm jang hadoi hăm dôm jăl jang tơgŭm ăn kon pơlei. Kiơ̆ đơ̆ng tơdrong jang tơgŭm kon pơlei hơtŏk mŭk drăm tơpôl, tơdrong jang kơ đe Ƀô đô̆i tơ̆ Kơđông ƀô đô̆i vei sơlam teh tơlĕch jang ‘noh dang ei tơdrong hơrih kon pơlei đei hơtŏk ƀiơ̆ găh mŭk drăm tơpôl. Dang ei, rim unh hnam dar deh pơgơ̆r kơdih tơdrong jang mŭk drăm kơ po”

Đại tá Nguyễn Bá Hưng, Phŏ Chĭnh wi Ƀô đô̆i vei sơlam teh dêh char Quảng Nam ăn tơbăt, Anih jang Đảng uỷ, Anih tơm pơgơ̆r Ƀô đô̆i vei sơlam teh dêh char hlôi pơgơ̆r Kâ̆p uỷ 11 Kơđông ƀô đô̆i vei sơlam teh jang atŭm hăm Anih jang Đảng, Anih vei lăng kon pơlei 30 tơring, phương sơlam teh, achon đak dơsĭ asong 212 đảng viên pơgơ̆r hloh 1.000 unh hnam kon pơlei. Lơ̆m noh, đei 132 đảng viên pơgơ̆r 720 unh hnam bơngai kon kông. Lơ đảng viên đei trong jang ‘lơ̆ng, hơgei, tơchơ̆t tơgŭm unh hnam kon pơlei hơdăh hloh đei asong pơm jang. Đại tá Nguyễn Bá Hưng sơkơ̆t, mă blŭng rim đảng viên hlôi hơvơn lơ unh hnam pơjing tơdrong hơrih ‘lơ̆ng, ưh đei pơm glăi lươ̆t tơchơ̆t, pơm glăi lơ̆m tơpôl, sơkơ̆t ăn kon pơlei tơring sơlam hơtŏk mŭk drăm đei jơnei hloh:  “Đảng viên đei asong tơgŭm unh hnam kon pơlei, rim khei chih akŏm tơdrong jang hơdăh, kăl akŏm tơgŭm rim unh hnam lơ̆m tơdrong hơtŏk mŭk drăm tơpôl, vang vei sơđơ̆ng tơpôl. Tơdrong tơlĕch jang đei jơnei, hlôi hơvơn tơgŭm 10 unh hnam đei đon bơnôh ưh kơ ‘lơ̆ng dăh ming đon, ưh đei pơm glăi khôi luơ̆t bơih. ‘Nguaih kơ noh, oei tơgŭm 25 unh hnam klaih đơ̆ng hin dơnuh, pơm jang tơnăp sơnong vei lăng sơlam teh, hơtŏk mŭk drăm tơpôl tơ̆ tơring”