Lăm hŏk "Tin hŏk Văn phòng ưh đei nôp jên" đei pơih pơtho đơ̆ng khei 3/2024 păng pơtho hŏk lơ̆m dôm kơmăng năr 6, năr 7 rim giĕng tơ̆ Hnam trưng THPT Chi Lăng, phường Chi Lăng plt Pleiku. 30 ‘nu bơngai kiơ̆ hŏk tơ̆ plei Ia Lang, phường Chi Lăng hơnơ̆ng năm hŏk tơ̆ lăm âu.

Ƀok Puih Chyh, 60 sơnăm, bơngai hŏk ‘lŏ hlŏh tơ̆ lăm tơroi: "Vang hŏk tơ̆ lăm âu vă chă hơlen năng kơmăy kơmŏk roi tơbăt păng kơmăy tinh, vă gơ̆h băt hơdăh ƀiơ̆ găh tơpôl hrei ‘nâu. Ƀôh thây kô pơtho tôch tơnăp, roi tơƀôh tôch hơlen kơna inh tôch hơiă."

Hăm lơ anih jang, khul grŭp, lơ bơngai, kơmăy kơmŏk roi tơbăt ‘nŏh jĭ tơdrong tôch juăt, nhen ưh đei tơpleh lơ̆m tơdrong arih xa păng bơ̆ jang, mă lei hăm kon pơlei tơ̆ plei Ia Lang, ‘nâu jĭ tơdrong tôch chrih, hui bơngai băt. Kơlih đơ̆ng thoi noh mă lăm hŏk âu pơm ăn lơ bơngai ‘mĕh truh. Jô̆ hloi bơngai hŏk ‘lŏ hlŏh păng đe bôl boăl hơioh kŭm tôch ‘mĕh hŏk. 

Oh H'K'riêng, 14 sơnăm, 1 ‘nu bơngai kiơ̆ hŏk tơƀôh jơhngâm đon hưch hanh đơ̆ng kơdih: "Oh bơnê kơ đe ƀok thây đĭ jơhngâm pơtho tơƀôh ăn nhôn, yoa ‘nâu jĭ ‘măng mă blŭng đei hŏk tin hŏk kơna oei đei lơ tơdrong tam mă băt, mưh truh hăm lăm hŏk đei đe ƀok thây pơtho ăn lơ tơdrong, đơ̆ng teh chư hăm Word, pơdăh PowerPiont, lơ tơdrong nai, hŏk pơm toăn lơ̆m Excel. Oh bơnê kơ đe thây kô yoa pơtho tơƀôh tôch hơlen, gơnơm thoi noh mă nhôn đei hŏk iŏk tôm păng hrĕnh ƀiơ̆ mưh yoa kơmăy tinh. Oh bơnê kơ đe thây kô”.

Tơdrong pơtho hŏk đei hloi dôm tơdrong kăl găh tin hŏk tơ̆ anih jang nhen chih ƀai hăm Word, pơm Excel, pơdăh PowerPoint, kai iŏk phân mêm kăl păng hơmet tơdrong ưh kơlăp đơ̆ng kơmăy tinh. Hnam trưng THPT Chi Lăng ăn 3 ‘nu thây kô pơtho tin hŏk kŭm hăm 30 tŏ kơmăy tinh vă pơjing tơdrong ‘lơ̆ng hlŏh ăn bơngai hŏk.

Ƀok thây Đồng Ánh Dương, thây pơtho lăm hŏk ăn tơbăt: "Lăm hŏk tôch hơiă. Hnam trưng ming hơmet 30 tŏ kơmăy tinh păng ăn 3 ‘nu thây kô vang pơtho, tơbôh. Nhôn chă rơih dôm bơngai hŏk rơgei hlŏh vă vang thi iŏk hla ar chư̆ng chi tin hŏk tơ̆ anih jang kơ apŭng plenh teh."

Đơ̆ng rŏng 1 khei ‘năr kiơ̆ hŏk, lăm hŏk hlôi pơtho hŏk đang ƀât blŭng khei 10. Mă hơtuch, 30 ‘nu bơngai hŏk gơ̆h teh chư, chih hla ar păng iŏk yoa dôm tơdrong ‘lơ̆ng đơ̆ng internet. Mŏ H'Tinh, Bí thư Chi ƀô̆ pơm hloi Bơngai pơgơ̆r plei Ia Lang, jĭ 1 lơ̆m dôm ‘nu bơngai hŏk rơgei, đei đon tơchĕng ‘mĕh hŏk dơ̆ng vă iŏk Hla ar chư̆ng chi tin hŏk kơjung ƀiơ̆.

Mŏ H'Tinh tơroi: "Plei Ia Lang đĭ đei 12 ‘nu bơngai hŏk, iŏk đei hla ar chih hŏk đang lăm hŏk, lơ̆m noh đei 5 ‘nu bơngai rơgei. Truh âu kơnh, hnam trưng Chi Lăng vă pơih dơ̆ng lăm hŏk tin hŏk kơjung ƀiơ̆. Inh vă năm hŏk păng pơlung kon pơlei vang hŏk hai. Bơnê kơ teh đak đei trong tơgŭm ăn plei Ia Lang, pơlei oei đei lơ mih ma duch nă pơmat tat, băt trong đŏk lăng tơdrong tơroi lơ̆m chăl ‘nao."”

Kiơ̆ yă Hồ Thị Ngọc Huyền, Bí thư Đảng phường Chi Lăng, kŭm hăm dêh char, phường Chi Lăng oei hơtŏk tơdrong jang tơplih hăm kơmăy sô̆ kơ teh đak. Tơdrong pơih dôm lăm pơtho đĕch găh kơmăy kơmŏk tôch gĭt kăl păng đei yoa, tơgŭm pơm hơtŏk đon hlôh vao ăn kon pơlei. Đơ̆ng noh vang tơgop pơjing tơdrong juăt, jŏh ayŏ kơ dŏ xoang, tơpôl yoa kơmăy sô̆:

"Nhôn ‘mĕh dar deh tơgŭm ăn kon pơlei, mă loi jĭ kon pơlei kon kông, atŏk tơiung tơdrong juăt joh ayŏ kơdŏ xoang hăm kơmăy sô̆. Kiơ̆ đơ̆ng noh, đe sư đei đon hlôh vao vă kơchăng pơih lăng internet, iŏk yoa dôm tơdrong pơvih hăm kơmăy sô̆ nhen pơvih trư̆k tuyê̆n, khăm hơmet jĭ kiơ̆ kơmăy sô̆, pơih lăng mang tơpôl. Tơdrong tơm ‘nŏh iŏk yoa kơmăy sô̆ lơ̆m rim tơdrong arih xa, tơpôl, năm truh tơdrong tơplih hăm kơmăy sô̆ kiơ̆ trong jang đơ̆ng teh đak găh atŏk tơiung mŭk drăm hăm kơmăy sô̆ păng tơpôl kơmăy sô̆ đơ̆ng Thủ tướng teh đak"./.