VOV4.Bahnar - Đơ̆ng rŏng hlŏh 3 khei tơ lĕch bơ̆ jang, tơ̆ dêh char Kon Tum, Tơ drong tơ chơ̆t kơ sô̆ 11 đơ̆ng Khul kơ dră tĕh đak găh tơ drong tơ iung ming păng jang tŏk mŭk drăm, tơ pôl hlôi ƀôh tôch đei yoa, tơ gŭm ăn kon pơ lei pơm sơ đơ̆ng tơ drong arih xa, tơ iung ming dơ̆ng tơ drong jang xa, tĕch mơ dro đơ̆ng rŏng kơ jĭ COVID-19.

Hlŏh 1 khei ‘nâu, ƀok A Veo, bơ ngai Xơ dang, hnam tơ̆ plei Kà Bầy, xăh Sa Bình, apŭng Sa Thầy ƀôh kơ dih kâu roi rơ hơi hiôk ƀiơ̆. Prăt năr jang tơ̆ mir, kơ sơ̆ brŏk ƀok oei tơ gĕch năm yoă sip ăn 2 tŏ rơ mo ‘nao răt dơ̆ng. Ƀok A Veo ăn tơ băt, oei mơ mat tat, ưh đei jên ‘nŏh đei tŏk iŏk 100 triu đơ̆ng kơ sô̆ jên tơ gŭm chă tơ drong jang xa, pơ yoa ăn tơ drong arih kiơ̆ tơ drong tơ chơ̆t kơ sô̆ 11 đơ̆ng Khul kơ dră tĕh đak. Đei jên ƀok răt rong 2 tŏ rơ mo yŏng, đĭ 50 triu, oei 1 puăt ‘nŏh ƀok răt bơ̆n hơ drĕch, tơ đăh ‘long, phŏng vă xăy ăn pơ gar ‘long xa plei. Pơ pơ̆ đei jên jang, đei tơ drong ‘lơ̆ng vă jang tŏk mŭk drăm ăn unh hnam, ƀok A Veo đei dơ̆ng đon adrin kŭm hăm unh hnam jang xa: “Tôch bơ nê kơ Đảng, tĕh đak tơ rĕk truh. Hăm unh hnam tôch hơ iă mưh đei tŏk iŏk jên đơ̆ng ngân hang vă răt rong rơ mo, pơ tăm ‘long xa plei, tơ gŭm ăn unh hnam jang xa roi tŏk ƀiơ̆”.   

Pơ tho pơm hla ar tŏk iŏk jên kiơ̆ Tơ drong tơ chơ̆t 11 đơ̆ng Khul kơ dră tĕh đak tơ̆ tơ ring

Hăm kơ hrĕng unh hnam kon pơ lei tơ̆ apŭng Sa Thầy, kơ sô̆ jên đei tŏk iŏk hăm jên kon tŏ sĕt kiơ̆ tơ drong Tơ chơ̆t 11 đơ̆ng Khul kơ dră tĕh đak truh trŏ jơ năr vang tơ gŭm sek tơ lang đei dôm tơ drong mơ mat tat kơ unh hnam. Kiơ̆ đơ̆ng ƀok pơ gơ̆r păng Bí thư Chi ƀô̆, băt đei jên asong tŏk iŏk vă pơ yoa ăn tơ drong răt tơ mam hŏk pơ hrăm kơ đe hŏk tro, unh hnam 'nhŏng Lương Văn Phúc, găh unh hnam tơ nuh tơ̆ Thôn 1, xăh Ya Xier chih măt hăm Grŭp 'mơ 'met păng tŏk tŏk iŏk jên kơ pơ lei vă tŏk iŏk. Đơ̆ng kơ sô̆ jên 20 triu hlak jên đei tŏk iŏk, 'nhŏng răt tơ mam hŏk pơ hrăm ăn 2 'nu kon: “Unh hnam nhôn mơ mat tat, mă loi ƀât đei jĭ COVID-19. Tĕh đak đei trong asong tŏk iŏk âu vă răt 2 tŏ kơ măy tinh ƀảng ăn 2 ‘nu kon vă hŏk pơ hrăm ‘lơ̆ng ƀiơ̆. Hơ pơi ‘mĕh 2 ‘nu kon hŏk rơ gei, mưh ‘lŏ ning mônh kơnh gơ̆h tơ gŭm ăn mĕ ƀă”.

Mă tơ pă tơ̆ dêh char Kon Tum ăn ƀôh, Tơ drong tơ chơ̆t kơ sô̆ 11, ‘năr 30/1/2022 đơ̆ng Khul kơ dră tĕh đak găh tơ drong jang tơ iung ming păng jang tŏk mŭk drăm tơ pôl hlôi mât lơ̆m tơ drong arih xa păng tôch đei yoa. Vă jang đei tơ drong ‘nâu, dôm anih jang kơ pal kơ dêh char hăt hot tơ lĕch jang păng pơ jing tơ drong ‘lơ̆ng vă kon pơ lei đei tŏk iŏk jên. Ƀok Nguyễn Minh Thuận, Bí thư Đảng xăh Sa Bình, apŭng Sa Thầy ăn tơ băt, đơ̆ng rŏng tơ drong tơ chơ̆t 11 đei tơ lĕch, Anih jang Đảng, khul kơ dră chĕp kơ̆l tơ ring roi tơ ƀôh ăn rim kăn ƀô̆, đảng viên păng truh tơ̆ jơ̆p pơ lei pơ la: “Iŏk đơ̆ng blŭng jăl khei mă I, khul kơ dră tơ ring jang hơ doi hăm anih mong jên tơ gŭm tơ pôl apŭng Sa Thầy hơ len năng, chih akŏm măt dôm unh hnam mơ mat tat yoa đơ̆ng jĭ Covid-19 vă tơ gŭm asong tŏk iŏk jên. Păng truh dang ei hlôi đei 30 unh hnam đei tŏk iŏk păng oei vă tơ lĕch dơ̆ng dang 1,4 ti hlak jên. Anih jang Đảng oei pơ jang ăn anih jang, khul grŭp tơ pôl tơ gŭm ăn kon pơ lei iŏk yoa jên mă trŏ, vă gơ̆h đei yoa ‘lơ̆ng hlŏh”.

Jên đei tŏk iŏk kiơ̆ Tơ drong tơ chơ̆t 11 đơ̆ng Khul kơ dră tĕh đak chă tơ drong jang ăn hlŏh 1.200 ‘nu bơ ngai tơ̆ dêh char Kon Tum

Jĭ 1 lơ̆m dôm anih jang tơ lĕch jên asong tŏk iŏk hăm jên kon tŏ sĕ kiơ̆ tơ drong Tơ chơ̆t 11 đơ̆ng Khul kơ dră tĕh đak, ƀok Nguyễn Văn Trung, Phŏ Kơ dră chĕp kơ̆l Anih mong jên tơ gŭm tơ pôl dêh char Kon Tum ăn tơ băt, kơ sô̆ jên ‘mĕh tŏk iŏk kiơ̆ tơ drong tơ chơ̆t 11 tơ̆ dêh char Kon Tum sơ năm 2022 păng 2023 hlŏh 1.200 ti, đei 5 tơ drong asong tŏk iŏk. Dang ei, anih jang oei hơ tŏk hrĕnh tơ drong tơ lĕch jên asong tŏk iŏk đơt 1 đơ̆ng 3 tơ drong asong tŏk iŏk hăm kơ sô̆ jên 112 ti truh hăm dôm bơ ngai đei xa yoa: “Khul kơ dră tĕh đak tơ lĕch tơ drong Tơ chơ̆t tôch tơ tom vă rim bơ ngai, mă loi jĭ dôm bơ ngai yoa Anih mong jên tơ gŭm tơ pôl pơ vih, unh hnam tơ nuh păng dôm bơ ngai mơ mat tat nai, pŭ lơ tơ drong răm lơ̆m hlŏh 2 sơ năm đei jĭ âu ki, đei tŏk iŏk jên vă tơ iung dơ̆ng tơ drong jang xa, tĕch mơ dro pơm sơ đơ̆ng dơ̆ng tơ drong arih.”.

Jô̆ truh ‘năr 11/5, Anih mong jên tơ gŭm tơ pôl dêh char Kon Tum hlôi tơ lĕch 75,4 ti hlak jên hơ tŏ hăm 67% kơ sô̆ jên asong tŏk iŏk kiơ̆ tơ drong tơ chơ̆t 11 đơ̆ng Khul kơ dră tĕh đak. Gơ nơm đơ̆ng kơ sô̆ jên âu, hlŏh 1.200 ‘nu bơ ngai jang lơ̆m dêh char chă đei tơ drong jang; vă jê̆ 400 ‘nu hŏk tro đei kơ măy tinh vă hŏk; 30 unh hnam kăn ƀô̆ công nhân, bơ ngai jang đei tŏk iŏk jên pơm hnam kiơ̆ tơ drong Hơ găt kơ sô̆ 100 đơ̆ng Khul kơ dră tĕh đak hăm kơ sô̆ jên 15 ti. Kŭm đơ̆ng tơ drong jang kiơ̆ Tơ drong tơ chơ̆t 11 đơ̆ng Khul kơ dră tĕh đak, Anih mong jên tơ gŭm tơ pôl dêh char Kon Tum hơ met ming khei ‘năr kla jên ăn 320 unh hnam, hăm kơ sô̆ jên 13 ti.

     Khoa Điềm: Chih

Dơ̆ng: Tơ blơ̆