Đơ̆ng rŏng 5 sơnăm jang hơdoi vang tang găn păng pơm tơjur sar bar lơ̆m anih pơtho pơhrăm, dôm tơring pơgơ̆r lơ tơdrong thi, pơtâp pơhrăm, bơ̆ jang tơ̆ ‘ngoăih jơ hŏk, vă hơtŏk đon hlôh vao păng trong tang găn sar bar. Lơ tơdrong roi tơbăt găh tang găn, pơm tơjur sar bar tôch gĭt kăl đei pơgơ̆r, nhen: tơdrong thi “Dŏng plei tĕh – Hơiŏh pơchĕh pơngai kơtang nuih mơng tang găn tơdrong sar bar păng tŏ ‘mi kial tơplih”, “Chih pơchĕh nơ̆r ‘nao ‘moi kiơ̆ boa hơri brông păng nhak so găh tang găn sar bar”, čhơ̆ rup tơ̆ ‘ngoăih hăm hơnăn “Hơdai hăm ŏh vang tang găn sar bar – Pơjing tơdrong arih xa kơjăp ‘lơ̆ng ăn ning mônh kơnh”, Pơtâp tơjră hăm tĕh dơdrŏ tơ̆ hnam trưng jăl mônh Măng Đen, apŭng Kon Plông, dêh char Kon Tum…

Hơdai hăm dôm tơdrong jang đei, tơdrong jang hơdoi vang tang găn sar bar đơ̆ng Anih tơm vei lăng pơtho pơhrăm păng Anih tơm vei lăng choh jang xa păng atŏk tơiung tơring tơrang oei đei 1,2 tơdrong tam mă ‘lơ̆ng ‘năi nhen: ƀât lăp bơ̆ jang hơdoi tam mă tơtom; dôm tơdrong jang tơ̆ ‘ngoăih jơ hŏk găh tang găn sar bar oei tam mă ‘lơ̆ng hơnơ̆ng kơplăh rim tơring; tơdrong pơtho, pơtâp pơhrăm ăn khul thây kô tơ̆ dôm hnam trưng găh trong pơgơ̆r pơtâp pơhrăm tơ̆ ‘ngoăih jơ hŏk hăm tơdrong tang găn sar bar tam đei tơrĕk, tưk hơtŏk.