Hnam trưng jăl 1 thị trấn Khe Tre pơm tơ̆ anih kơdrơ̆m apŭng Nam Đông, păih hơnăp hnam trưng đei trong gre tih 14C năm brih, gre kơdâu rim năr tôch kơ lơ. Lơ̆m jơ hŏk tro lĕch đơ̆ng hnam trưng ling lang hơmơt kơ gre tơ̆m preh băl đei ƀôh. Tơdrong kăl kơ tơroi, lơ mĕ ƀă ba iŏk kon kon ưh kơ yơ̆l môk ƀao hiêm, chơ 2, chơ 3, ƀơ̆t lăp chơ 4 pơm jing um rup kơnê̆ hăm hŏk tro, ƀơm ưh kơ ‘lơ̆ng truh tơdrong jang pơtho pơhrăm pơm kiơ̆ khôi luơ̆t pơma atŭm păng Luơ̆t vei sơđơ̆ng trong nơnăm pơma hơdrô̆ đơ̆ng hnam trưng truh đe oh. Jô̆ đơ̆ng ƀơ̆t tơlĕch jang kiơ̆ tơdrong jang “ ‘Măng jang hnam trưng sơđơ̆ng trong nơnăm”, lăp đơ̆ng blŭng sơnăm hŏk, hnam trưng pơjao kơ thây kô vei lăng lăm pơgơ̆r tơlĕch jang kĭ pơkăp vei sơđơ̆ng trong nơnăm truh đĭ đăng mĕ ƀă hŏk tro păng đei đĭ đăng mĕ ƀă jang kiơ̆. Hnam trưng hơnơ̆ng jang hơdai hăm Khŭl kanh sat vei lăng trong nơnăm - Kŏng an apŭng Nam Đông vă tơroi tơbăt găh vei sơđơ̆ng trong nơnăm ăn kơ đe oh.

Oh Nguyễn An, hŏk tro lăm 4/5 hnam trưng hŏk jăl 1 thị trấn Khe Tre, apŭng Nam Đông, dêh char Thừa Thiên Huế tơbăt: “Mưh bơ̆n hao gre tơ̆ trong bơ̆n ưh kơ gơh hao gre hang 3, hang 4, chơ lơ bơngai păng hao sak kư̆ kư̆.”

Gơh ƀôh akhan, hrei ‘nâu kơ sô̆ hŏk tro hao gre hon đa điên, da tang vang điên mưh truh tơ̆ hnam trưng roi ‘năr roi ƀôh lơ. Kŏng an apŭng Nam Đông, dêh char Thừa Thiên Huế tơbăt, khei ‘năr âu ki ƀơ̆t dăr joang hlôi chă ƀôh păng phak lơ hơioh păh iung pơm glăi vei sơđơ̆ng trong nơnăm. Vă găn ƀiơ̆ tơdrong ‘nâu, hơdai hăm tơdrong hơdrin mơ̆t jang đơ̆ng dôm anih jang kơpal lơ̆m tơdrong tơroi tơbăt krao hơvơn ‘noh kăl kơ đei tơdrong roi tơbăt jang hơdai kơjăp đơ̆ng hnam trưng, ŭnh hnam păng tơpôl. Lơ̆m noh, hlôh vao đơ̆ng đe oh păng hơnăp jang đơ̆ng ŭnh hnam ‘noh tôch kơ gĭt kăl.

Oh Cao Ngọc Phương Dung, hŏk tro lăm 12B2 hnam trưng hŏk jăl 3 Nam Đông tơbăt: “Kiơ̆ kơ oh, vă vang vei sơđơ̆ng trong nơnăm ‘noh bơ̆n kăl kơ yơ̆l môk ƀao hiêm ƀlep tơdrong hơgăt. Mưh hao gre ‘noh ‘nĕ kơ pơrĕng, ‘nĕ kơ chơ lơ bơngai, ‘nĕ kơ ploi ŭnh kơ đeng ƀrê, ‘nĕ kơ năm hơdrơ̆k trong păng năm hrĕnh kư̆ kă.”

Vă vei sơđơ̆ng, tơjur hơmơt gre tơ̆m pơ̆k preh băl tơ̆ tơring groi kông Nam Đông ‘noh tơdrong hơtŏk ‘lơ̆ng hlôh vao, đon băt pơm kiơ̆ đơ̆ng đe oh hŏk tri ‘noh tôch kơ gĭt kăl. Anih jang Kŏng an apŭng Nam Đông hlôi jang hơdai hăm anih jang vei lăng pơtho pơhrăm akŏm tŭn pran tơdrong jang tơroi tơbăt, pơtho khôi luơ̆t trong nơnăm, pơtho pơhrăm tơdrong băt mưh hao gre tơ̆ trong tơ̆ 17 hnam trưng hŏk jăl 2, jăl 3 lơ̆m apŭng hăm vă jê̆ 5 rơbâu 700 ‘nu thây kô, hŏk tro vang jang. Hơdai hăm pơgơ̆r kĭ pơkăp pơm kiơ̆ yak vih vơ̆t tơ̆ trong sơđơ̆ng đơ̆ng hnam trưng hăm ŭnh hnam păng hŏk tro hăm kơ sô̆ vang jang đei 100%. ‘Ngoăih kơ ‘noh, anih jang kŭm pơjing dôm grŭp vei lăng sơđơ̆ng trong nơnăm tơ̆ dôm ‘măng jang hnam trưng lơ̆m jơ lĕch đơ̆ng hnam trưng, vei sơđơ̆ng ‘lơ̆ng, hiôk; pơih să đei yua tơdrong jang “ ‘măng jang hnam trưng vei sơđơ̆ng trong nơnăm” tơ̆ 30 hơnih hnam trưng hŏk.

Trung tá Nguyễn Tiến Dũng, Kơdră khŭl pơjing tơdrong jang vei lăng sơđơ̆ng kơdih apŭng Nam Đông tơbăt, kơđeh, ƀônh kơ ƀlŏk, ƀônh kơ hlôh mă loi ‘noh jĭ đei tơdrong mơ̆ng băl đơ̆ng bơngai tơroi hăm đe oh hŏk tro. Mĭnh jăl hŏk đei 1 trong jang tơroi lăp ‘noh jĭ trong jang ‘nao păng pơm tơdrong hơiă sơng đei tơdrong lăng mơ̆ng đơ̆ng đe oh hŏk tro lơ̆m kơ dôm ‘măng tơroi tơbăt pơtho tơdrong hlôh vao păng tơdrong vang jang vei lăng sơđơ̆ng trong nơnăm, krao hơvơn hŏk tro pơm kiơ̆ dôm tơdrong pơkăp trong nơnăm:

“Grŭp tơroi tơbăt khôi luơ̆t đơ̆ng kŏng an apŭng hlôi năm truh tơ̆ dôm hnam trưng hŏk. ‘Nâu jĭ dôm hnam trưng đei 17 hnam trưng hŏk jăl 2, jăl 3 păng jăl 1 vă tơroi tơbăt găh luơ̆t trong nơnăm, tơdrong băt hao gre, yak vih vơ̆t ‘lơ̆ng hơiă tơ̆ trong. Găh luơ̆t tang găn teh dong băl đơ̆ng hŏk tro kŭm nhen tang găn pơrăm đơ̆ng ma túy truh thây kô pơtho kŭm hăm đe oh hŏk tro kŭm nhen đe mĕ ƀă vang băt păng vang bơ̆jang kiơ̆ tơpăt.”

Tơ̆ hơnăp kơnh, Khŭl kanh sat vei lăng trong nơnăm, Kŏng an apŭng Nam Đông, dêh char Thừa Thiên Huế hơnơ̆ng jang hơdai hăm dôm hnam trưng lơ̆m tơring tŭn pran tơdrong jang tơroi tơbăt, pơtho pơhrăm găh vei sơđơ̆ng trong nơnăm ăn hŏk tro, kiơ̆ đơ̆ng noh tơgŭm đe oh băt hơdăh hơnăp jang đơ̆ng kơdih mưh hao gre, yak vih vơ̆t tơ̆ trong; hơtŏk ‘lơ̆ng đon băt pơm kiơ̆ Luơ̆t trong nơnăm vă vei sơđơ̆ng hơkâu jăn ăn kơdih kâu păng rim bơngai.