Lơ̆m pơyan tŏ sơnăm 2023- 2024, Đội K53 dêh char Kon Tum hăm 67 ‘nu kang ƀô̆, lĭnh vă bơ̆jang hơnăp jang tơchă, iŏk akŏm kơ ting lĭnh lôch dŏng teh đak lĭnh năm jang tơgŭm păng bơngai joăt jang Việt Nam lôch hơchăng lơ̆m dôm khei ‘năr tơblăh vang sơ̆ tơ̆ 3 dêh char: Attapư, Sê Kông, Chămpasắc, teh đak Lào păng dêh char Rattanakiri, teh đak Campuchia.

Pơma tơ̆ lêh iung jang ăn Đội K53 năm jang hơnăp jang, yă Y Ngọc, Phŏ Kơdră Anih vei lăng kon pơlei dêh char, Kơdră Anih pơgơ̆r jang 515 dêh char Kon Tum pơma hơdăh, ‘nâu jĭ hơnăp jang mơmat tat, krê hơmơt mă lei tôch kơ gĭt kăl; tơƀôh tơdrong ƀlŏk hơdơ̆r đơ̆ng rim kơdră chĕp kơ̆l păng kon pơlei dôm hơdrĕch hơdrŭng dêh char Kon Tum hăm dôm khŭl lĭnh lôch dŏng teh đak hlôi iung tơblăh păng plang hŭt hơkâu nuih mơng yua kơ hơnăp jang apŭng plĕnh teh gĭt kăl.