Gơnơm đei tơchơ̆t jang 8 mă pơmai Châu Thị Ngọc Điệp tơ̆ ấp Đại Nghĩa Thắng, xah Đại Tâm đei akŏm jang lơ tơdrong jang juăt jue tơ̆ tơring. Đơ̆ng noh, pơmai chă tơroi ăn rim unh hnam tăp dăr băt hơdah păng hơtŏk hlôh vao lơ̆m tơdrong jang vei lăng đe drăkăn păng hơ-ioh: Inh vang jang kiơ̆ tơchơ̆t jang 8 noh chă năm tơroi ăn kon pơlei, pơmai oh băt ưh gơh teh dong kon hơ-ioh nhen hơdrol ki ôh, vei vêr drăkăn păng hơ-ioh tơ̆ tơring po kơdih.

Tơchơ̆t jang 8 đei tơlĕch jang tơ̆ 3 ấp tơnap tap hloh kơ apŭng Mỹ Xuyên. Noh jĭ Đại Nghĩa Thắng, xah Đại Tâm; ấp Sóc Bưng, xah Thạnh Phú păng ấp Phú Giao, xah Thạnh Quới hăm lơ tơdrong jang kăp gĭt hlôi păng tŏk bŏk đei pơgơ̆r. Pơmai Dương Thị Mỹ Nhiên, Kơdră Jơnŭm jang đe Drăkăn ấp Phú Giao, xah Thạnh Quới, apŭng Mỹ Xuyên, dêh char Sóc Trăng tơroi: Lơ̆m khei năr truh, Jơnŭm jang đe Drăkăn ấp Phú Giao, xah Thạnh Quới gô jang hadoi tơnăp hăm jơnŭm jang tơ̆ kơpal păng dôm anih jang đei tơrĕk, pơm jang tơnăp dôm sơnong jang kơ tơchơ̆t jang 8. ‘Nâu jing minh lơ̆m dôm tơchơ̆t jang tih, kăp gĭt tơrĕk truh đe drăkăn păng hơ-ioh, jang kiơ̆ pơkăp hơtŏ hơnơ̆ng drŏnglo drăkăn păng akŏm set tơlang tơnăp minh ƀar tơdrong đei truh hăm đe drăkăn păng đe hơ-ioh tơ̆ tơring kon pơlei kon kông.

Khei năr âu ki, Jơnŭm jang đe Drăkăn apŭng Mỹ Xuyên akŏm lơ̆m 3 tơdrong tơm. Noh jing tơroi tơbăt, hơvơn pơtho tơplih đon tơchĕng, trong pơm jang, tơgop sut lê̆ tơdrong chere tơklah oei xa drŏnglo drăkăn lơ̆m unh hnam păng lơ̆m tơpôl, dôm khôi juăt ưh kơ ‘lơ̆ng păng minh ƀar tơdrong đei ƀôh lơ̆m tơpôl kăl ăn đe drăkăn păng hơ-ioh; Pơjing păng pơih să dôm trong jang tơplih gah đon tơchĕng, hơtŏk tơdrong jang păng gơh yua mŭk drăm ăn đe drăkăn; Hơtŏk hơtŏ hơnơ̆ng drŏnglo drăkăn păng athei jang trŏ dôm tơdrong kăl hăm đe drăkăn păng hơ-ioh, vă vei sơđơ̆ng nơ̆r pơma păng tơdrong vang jang đơ̆ng drăkăn păng hơ-ioh lơ̆m dôm tơdrong jang hơtŏk mŭk drăm tơpôl kơ tơring, hơlen păng pơma tơblang, tơgŭm ăn đe drăkăn vang jang lơ̆m anih jang chĭnh trĭ. Yă Trần Hồng Ni, Kơdră Jơnŭm jang đe Drăkăn apŭng Mỹ Xuyên, dêh char Sóc Trăng ăn tơbăt: Vă jang ‘lơ̆ng tơchơ̆t jang 8, Jơnŭm jang đe Drăkăn apŭng Mỹ Xuyên hơtŏk tơroi tơbăt, pơjing dôm tơdrong jang trŏ hăm tơdrong đei tơ̆ tơring păng set tơlang mă tơnăp dôm tơdrong ưh đei hơtŏ hơnơ̆ng drŏnglo drăkăn lơ̆m lơ tơdrong jang hăm đe drăkăn păng hơ-ioh drăkăn tơ̆ tơring kon kông, sut lê̆ đon juăt tơchĕng chere tơklah oei xa hăm đe drăkăn, sut lê̆ khôi kơtul chơdư, tơgop lơ̆m tơdrong hơtŏk tơ-iung hơtŭm kơ tơring.

Đơ̆ng rŏng kơ tơlĕch pơm kiơ̆ Tơchơ̆t jang 8, tơdrong hơtŏ hơnơ̆ng gah hŏk pơhrăm, pơm jang, vei lăng jơhngơ̆m jăn ăn đe drăkăn tơ̆ Sóc Trăng hlôi đei hơmet ‘lơ̆ng; mă hăt noh hăm đe drăkăn tơ̆ tơring hơtaih yaih, tơring kon pơlei kon kông. Sơnong jang, anih dơ̆ng kơ đe drăkăn roi năr roi đei sơkơ̆t hơdah lơ̆m tơdrong hơrih tơpôl păng unh hnam. Tơdrong ưh đei hơtŏ drŏnglo drăkăn đei sut lê̆ bơih, drŏnglo păng drăkăn đei pơm trong hiôk lơ hloh. Kiơ̆ kơsô̆ chih akŏm truh hơtuch sơnăm sơ̆, jơ̆p dêh char đei 109 xah, phương, thĭ trâ̆n đei tơdrong jang tang găn păng tơjră teh dong lơ̆m unh hnam hăm jê̆ 180 Kâu lak ƀô̆, jê̆ 650 khul jang tang găn păng tơjră teh dong lơ̆m unh hnam, hloh 800 anih jang tơgŭm lơ̆m tơpôl, jê̆ 850 kơsô̆ điê̆nt hoăi krao mưh đei tơdrong kăl.