Dôm năr tŏk bŏk khei 10, tơ̆ kơdrăn pơhrăm tơblăh kơ Hơnih Ƀô̆ đô̆i dêh char Dak Lăk tơ̆ tơring Krông Na, apŭng Buôn Đôn, đei ‘măng ‘mi đunh jơ ‘năr. Hạ sỹ Ngô Văn Trọng atŭm hăm rim boăl lơ̆m Tiểu đô̆i phao tih Đại đội bộ binh 2 iŏk yua gre choh kôch chă kôch teh tơmo bơ̆ pơnơ̆ tang găn đak lăh ro lơ̆m sơlŭng, hơmet ming jơ̆ng hơtơ̆p kơƀang pơhrăm prăh. ‘Mi tôn đunh jơ, hơkou jăn đe ‘nhŏng hơ iuih hơmrĕm. Trọng tơbăt, atŭm hăm bôl boăl hơnơ̆ng pơhrăm, pơm hơtŏk jơhngơ̆m đon chinh trĭ, hơnơ̆ng hŏk pơhrăm vă gơ̆h hơgei kih thuơ̆t, pơhrăm tơblăh gơ̆h hơgei.“Đại đội tŏk bŏk pơhrăm rim ƀai tiểu đô̆i tơblăh tơdrŭt, trung đô̆i tang găn păng đăi đô̆i iung tơblăh tơdrut pơjei iŏk dơ̆ng kơđông pơ pơm pơtih ăn. Đăi đô̆i pơhrăm tơblăh prăt năr, hăm jơhngơ̆m đon pơhrăm tôch kơtang, kơchăng kơjăp iung tơblăh vei lăng Teh đak.”  

          Đại đội bộ binh 2 đei pơjing lơ̆m năr 01/01/1991, sơ̆ ‘noh hơnăn Đại đội Bộ binh 2, Tiểu đoàn 697 găh Hơnih vei lăng Ƀô̆ đô̆i dêh char Dak Lăk. Jĭ mĭnh lơ̆m ƀar đại đội bộ binh kơ Hơnih Ƀô̆ đô̆i dêh char oei tơ̆ tơring sơlam teh đak, Đại đội 2 ‘noh khul ƀô̆ đô̆i tơm vei lăng sơlam teh đak lơ̆m apŭng Ea Sŭp. Lơ̆m jơ ‘năr ‘mi pru pơdach ‘mi ‘ngach pơdăr lơ̆m pơyan ‘mi, tŏ phang pơđang hlơ hlĕng lơ̆m pơyan phang tơ̆ tơring sơlam teh đak, đại đội ling lang vei kơjăp măt bơngai, gre kơchăng iung tơblăh kơtang. Lơ̆m rim sơnăm 2020 păng 2023, đại đội iŏk đei hơnăn Hơnih Pran kơtang, lơ sơnăm hơnơ̆ng jĭ đại đội rơgoh ‘lơ̆ng pran kơtang tôm tong. Dang ei, kang ƀô̆, ƀô̆ đô̆i Đại đội tŏk bŏk pơhrăm tơhlăh, hơdrin pơting dih băl, jang keh kong tơdrong bơ̆ jang, iŏk đei jơnei gĭt kăl vă kơkuh chơt hơ iă ăn tơbăt 80 sơnăm năr pơjing Khul Ƀô̆ đô̆i Kon pơlei Việt Nam (22/12). Trung uý Tô Viết Sỹ - Chính trị viên đại đội, pơma: “Nhôn pơgơ̆r pơlong prăh ƀrơ̆m phao hmă hăm tơdrong trong jang đại đội bộ binh iung tơblăh tơdrŭt, đơ̆ng noh, pơjing ăn kang ƀô̆, ƀô̆ đô̆i đei jơhngơ̆m đon tơnăp, pran kơtang, nuih mơng lơ̆m tơdrong iung tơblăh tơdăh đei tơdrong.”

          Đei pơjing lơ̆m năr 06/01/1995, Đại đội bộ binh 5 đei tơdrong jang pơtho pơhrăm tơblăh, kơchăng iung tơblăh păng iung năm bơ̆ jang tơdrong jang A2 vei lăng năng tông apŭng Buôn Đôn. Rim sơnăm hơnih hơnơ̆ng pơhrăm tơblăh ăn rim bơngai ‘nao mơ̆t pơm ƀô̆ đô̆i lơ̆m dêh char; bơ̆ jang ‘lơ̆ng tơdrong jang pơrô̆ pơrôp kon pơlei pơla, atŏk kơtang choh jang sa pơm hơtŏk tơdrong hơrih sa ‘lơ̆ng hơ iă ăn ƀô̆ đô̆i păng iung jang mĭnh ƀar tơdrong jang anai mưh đei kơdră kơpal pơjao ăn. Thượng uý Nguyễn Thành Phước, Chính trị viên Đại đội bộ binh 5, tơbăt:  " ‘Ngoăih tơdrong jang kơchăng iung tơblăh, Đại đội bộ binh 5 oei đei tơdrong jang tơgŭm dŏng, tơgŭm djru; tơgŭm kon pơlei lơ̆m tơring hơnih oei jang kiơ̆ ‘lơ̆ng pơtho tơbăt khôi luơ̆t. Iung jang hơdoi hăm kơdră tơring tơ iung pơjing ming man hnam oei, hnam tơgoăt tơgoăl, tơgŭm ăn kon pơlei chă kĕch phĕ ‘long pơtăm, ming man păng chong choh pơ ‘ngoăih trong nơnăm, hơboong thoong đak; tơlĕch jang tơgŭm jru rim trong jang mŭk drăm rong kon tơrong, choh pơtăm hle tơgŭm ăn kon pơlei atŏk tơ iung mŭk drăm ‘lơ̆ng hơ iă hloh.”

Buôn Đôn păng Ea Súp ‘noh ƀar apŭng tơring sơlam teh đak kơ dêh char Dak Lăk. Lơ̆m tơring đei hloh 11.000 ŭnh hnam, hăm hloh 25.000 ‘nu kon pơlei, 29 hơdrĕch hơdrung vang hơrih sa. ‘Nou jĭ tơring đei tŏ ‘mi kial chrih chrĕng, teh ngơ ngal, hơnơ̆ng đei ‘mi kial, tŏ phang pơrăm. Tơdrong hơrih sa kơ kon pơlei tơnap tap, gleh hrat. ƀok Y Thưng Kđoh, kră pơlei kơ pơlei ƀuôn Trĭ, tơring Krông Na, apŭng Ƀuôn Đôn tơbăt, dôm sơnăm ou ki Đại đội bộ binh 5 tôch hơdrin tơgŭm djru kon pơlei vei lăng sơđơ̆ng tơpôl, tơgum dŏng mưh đei ‘mi kial hơbŭt hơbông pơrăm. Ƀok Y Thưng Kđoh pơma: “ Mưh ‘mi kial hơbŭt hơbông truh ‘noh Đại đội 5 ăn dơ̆ng kang ƀô̆, ƀô̆ đô̆i truh tơgŭm ăn kon pơlei tôch kơ lơ nhen: Yô̆ ƀa, pơ̆ng hơmet pơbŭng hnam, yông kon pơlei păng mŭk drăm lĕch veh đơ̆ng đak lip. Đe mih ma oei pôk ăn bơ̆n rơmo, pơbe, hơdrĕch ‘long pơtăm, tơgŭm pơtăm chehphe, tiu păng ‘long sa plei. Ƀô̆ đô̆i tơgŭm ăn kon pơlei tôch kơ lơ văi. Kon pơlei gơnang kơ ƀô̆ đô̆i, ƀô̆ đô̆i tơgŭm kon pơlei, jơhngơ̆m đon tơgoăt tơgoăl dih băl ƀô̆ đô̆i hăm kon pơlei rim năr roi kơjăp iăp kơtang hloh dơ̆ng.”

          Yak hloh 1 lơ̆m 3 anglŏ sơnăm tơ iung pơjing, iung tơblăh, atŏk tơ iung, rim đại đội bộ binh găh Hơnih Ƀô̆ đô̆i dêh char Dak Lăk ‘noh jing khul tơm dơnơm hloh vei lăng năng tông kơjăp iăp kơtang sơđơ̆ng dơ̆ng kơjăp tơring sơlam kơ teh đak, tơ iung pơjing kơjăp jơhngơ̆m đon kon pơlei lui yom, tơpă jĭ dôm đại đội bộ binh pran kơjăp iăp kơtang tơ̆ tơring sơlam teh đak kơ Dak Lăk.