Bơngai hơ ioh hơdrung CơTu Clâu Ân oei tơ̆ tơring Tr’hy, apŭng Tây Giang, dêh char Quảng Nam mơti mĕ ƀă đơ̆ng ‘lơ̆p. Ŭnh hnam đei 3 ‘nu ‘nhŏng oh, Ân ‘noh bơngai hơlam lơ̆m ŭnh hnam. Dôm tơdrong oei sa lơ̆m ŭnh hnam jĭ yă dơnơm đĭ hloh 70 sơnăm chă pơvih pơvăn. ‘Măng sŏng sa kơ yă sau đe sư lăp por hơdreh hăm ‘nhot bri, mư̆h yă chă jĭ jăn ưh kơ kĕ năm tơ̆ bri ‘nŏh jĭ mot măi đĕch. Mơnat tơdrong tơnap tap kơ đe yă sau Ân, kon pơlei vang chă tơra phe, ‘nhot tơgŭm ăn. Tơdrong hŏk pơhrăm kơ Ân tơpă ưh kơ ƀônh ôh.

Sơnăm 2020, Kơđông ƀô̆ đô̆i A Xan pơma dơnuh hăm ŭnh hnam, kơdră tơring vă sơng iŏk Ân pơm kon rong. Vih erih sa hăm đe mih ma Ƀô̆ đô̆i vei lăng sơlam teh đak, Clâu Ân đei oei sa lơ̆m mĭnh hơnih să, đei hơnih hŏk pơhrăm tôm tơmam drăm … Clâu Ân đei đe ƀă mŏm grat ao jơk ‘mêm kơ eng, vei lăng năng tông đơ̆ng sŏng sa, tep păng hŏk pơhrăm, pơtho ăn hŏk pơhrăm. Ân tŏk bŏk hŏk lăm 8 hnam trương oei sa kơ ‘năr dơ̆ng Jăl ƀar Lý Tự Trọng. Ân pơma:“Ŭnh hnam nhôn tôch mơmat tat, đei đe mih ma ƀô̆ đô̆i rong ‘me ĭnh chơt hơ iă dêh. Đe mih ma ƀô̆ đô̆i vei lăng năng tông sŏng sa păng hŏk pơhrăm nhen kon hơ ‘lơ̆p kơ dih đĕch. Ĭnh tôch bơnê kơ đe mih ma ƀô̆ đô̆i. Tơ̆ au ĭnh đei sŏng sa măh mai, đei hơbĕn ‘nao ao ‘lơ̆ng, rim đe mih ma ƀô̆ đô̆i chă pơtho ĭnh hŏk pơhrăm.”

Ưh gan rơhao nhen ‘nhŏng Clâu Ân, Hốih Đức Hữu oei mơ mrunh ƀiơ̆. Ŭnh hnam Hữu jei ŭnh hnam dơnuh. Ƀă Hữu hơnơ̆ng chă hơmet jĭ pleh lĕn đơ̆ng lơ sơnăm kơ au. Tơdrong erih sa lơ̆m ŭnh hnam jĭ lăp gơnang kơ bơngai mĕ đĕch. Sơnăm 2019, Hữu đei Kơđông ƀô̆ đô̆i A Xan sơng iŏk pơm kon rong. Dôm năr blŭng vih erih sa tơ̆ Kơđông Ƀô đô̆i vei lăng sơlam Teh đak, Hốih Đức Hữu hơkĕ hơkong păng hơnơ̆ng ƀlok hơdơ̆r kơ ŭnh hnam, apĭnh brŏk.

Kang ƀô̆, ƀô̆ đô̆i Kơđông Ƀô̆ đô̆i A Xan ling lang chă pơlung, tơgŭm oh pơm joăt hăm tơdrong oei sa, erih sa ‘nao. Vih tơ̆ au, rim đe mih ma, đe ‘nhŏng jei lăng 2 ‘nu mon nhen kon hơ ‘lơ̆p kơdih. Ƀar ‘nu “ƀô̆ đô̆i ‘lơ̆p” hŏk pơhrăm, oei sa ‘lơ̆ng hơ iă nhen lĕ đe mih ma, adoi băt chă klơ̆p bơ̆n khăn, sơkok ‘lơ̆ng hơ iă.

Kơđông Ƀô̆ đô̆i vei lăng sơlam teh đak A Xan dang ei rong ‘me 2 ‘nu mon tơ̆ hơnih jang păng tơgum djru 7 ‘nu đe mon tơnap tap anai tŏk bŏk erih sa hăm ŭnh hnam. Thiếu Tá Nguyễn Văn Lợi, chính trị viên, Kơđông Ƀô̆ đô̆i vei lăng sơlam teh đak A Xan, apŭng Tây Giang tơbăt: “Hăm đe mon găh lơ̆m kon rong kơ hơnih Kơđông, nhôn tŏk bŏk rong ‘me 2 ‘nu mon ŭnh hnam tơnap tap hloh, nhôn hơnhăk ba oei tơ̆ au đei rơvơn vă vei lăng năng tông đe mon tih vơ̆ păng đei hŏk pơhrăm ‘lơ̆ng hơ iă hlŏh ƀiơ̆. Đe mon hlôi joăt oei sa tơ̆ au păng hŏk pơhrăm gơ̆h ƀiơ̆ kơ hơdrol au ki. Đơ̆ng tơdrong jang ‘nŏh đei tơlĕch jang păng lang să, hăm kon jên kơdră kơpal pơtruh ăn păng kang ƀô̆ ƀô̆ đô̆i lơ̆m hơnih vang chă tơra tơgum djru rim khei 600.000 hlak jên lơ̆m 1 ‘nu mon.”

Rim kơđông Ƀô̆ đô̆i vei lăng sơlam teh đak lơ̆m dêh char Quảng Nam tŏk bok rong ‘me 18 ‘nu đe mon kiơ̆ Tơdrong jang “Kon rong ƀô̆ đô̆i vei lăng sơlam Teh đak”. Rim đe mon oei sa kơtă tơ̆ kơđông hloi, chă pơchơt hơ iă pơm hơtŏk jơhngơm đon hlôh vao lơ̆m tơdrong erih, tŏk tơdrong hlă. Kơđông Ƀô̆ đô̆i vei lăng sơlam Teh đak ling lang tơgoăt kơjăp hăm kwodră tơring, ŭnh hnam păng hnam trương đe mon hŏk pơhrăm, hơnơ̆ng chă pơma dơnuh dôm tơdrong, băt hơdăh tơdrong hŏk pơhrăm, oei sa, hŏk pơhrăm kơ rim đe mon. Tơdrong jang “Ba oh năm tơ̆ hnam trương” kơ rim Hơnih Ƀô̆ đô̆i vei lăng sơlam Teh đak Quảng Nam oei dơ̆ng pang tang măt tơgŭm djru 164 ‘nu hŏk tro ŭnh hnam tơnap tap,lơ̆m au đei 6 ‘nu hŏk tro teh đak boăl Lào. Mĭnh ‘nu oh đei tơgŭm ăn 500.000hlak jên lơ̆m 1 khei truh hŏk đang lăm 12. Trong jang “Kon rong Ƀô̆ đô̆i vei lăng sơlam teh đak” hlôi hơnhăk đei tơdrong ‘lơ̆ng, pơjing hơnih gơnang kơjăp ăn rim đe mon ŭnh hnam tơnap tap, atŭm hăm rim hơnih bơ̆ jang tơring atŏk jơhngơ̆m đon hlôi vao, pơjing đei tơdrong oei sa sơđơ̆ng ăn kon pơlei tơring sơlam teh đak. Đại tá Hoàng Văn Mẫn, Chính uỷ Đô̆ đô̆i vei lăng sơlam teh đak dêh char Quảng Nam hơlen:“ ‘Nau jing mĭnh tơdrong jang tôch gĭt kăl, kơ yuơ lơ loh nhôn tŏk bŏk tơlĕch jang hơnơ̆ng tơ̆ rim hơnih ƀô̆ đô̆i iung jang hơdoi hăm rim tơring, rim hnam trương dăr lăng hơlen, chă rơih păng hơnơ̆ng sơng iŏk dôm đe mon tơnap tap au vă pơm kon rong kơ ƀô̆ đô̆i vei lăng sơlam teh đak. Đơ̆ng noh pơjing rơvơn hŏk pơhrăm, oei sa ‘lơ̆ng hơ iă hloh vă đe kôn mon kon sau đei tơdrong erih sa ‘lơ̆ng hơ iă hlŏh dơ̆ng tơ̆ hơnăp kơngh. ‘Moi kiơ̆ tơdrong jang ƀar păh khul kơdră đảng Kơđông ƀô̆ đô̆i vei lăng sơlam teh đak păng kơdră tơring păng kon pơlei 2 tơring sơlam teh đak tơklep dih băl kơ jăp hloh dơ̆ng păng ‘mêm kơ eng dih băl hloh dơ̆ng.”

Tơdrong jang “Kon rong ƀô̆ đô̆i vei lăng sơlam teh đak” păng “Ba oh năm tơ̆ hnam trương” kơ kang ƀô̆, ƀô̆ đô̆i vei lăng sơlam teh đak tơpă jing hơnih gơnang kơjăp ăn rim hŏk tro kon kông mơti mơtĕk tơnap tap tơ̆ tơring ataih yăih. Đôm đe hơ iŏh ‘nŏh gô tih vơ̆ djơ̆ ‘lơ̆ng lơ̆m jơhngơ̆m đon ‘mêm kơ eng păng đei tơdrong erih sa ‘lơ̆ng hơ iă hlŏh dơ̆ng tơ̆ hơnăp kơnh. Dôm tơdrong tơroi găh “Kon rong Kơđông ƀô̆ đô̆i vei lăng sơlam teh đak” sa roi tơƀôh hơdăh hloh dơ̆ng jơhngơ̆m đon tơgoăt tơgoăl dih băl kơjăp ƀar păh ƀô̆ đô̆i vei lăng sơlam teh đak hăm kon pơlei oei tơ̆ tơring sơlam teh đak”.