Tổng Bí thư Nguyễn Phú Trọng jĭ 1 ‘nu bơngai cộng sản tơpăt, 1 ‘nu bơngai chĕp kơ̆l gơh hơgei, bơngai ling lang jang kiơ̆ đơ̆ng nơ̆r pơma hăm jang, iŏk kon pơlei pơm ‘long rek pơ tŏ, iŏk kon pơlei pơm ‘lơ̆ng, iŏk tơdrong đei yua đơ̆ng kon pơlei pơm tơdrong hơgăt hơdrin hloh; ling lang jê̆ kon pơlei, hơdai kon pơlei păng đei 1 plei nuih ‘mêm mơnat. “Teh đak bơ̆n tam mă lai yơ đei anih dơ̆ng ‘lơ̆ng păng bưng ai lơ̆m apŭng plĕnh teh nhen hrei ‘nâu đei dơ̆ng lơ tơdrong hiôk ‘lơ̆ng vă yak kơjăp tơ̆ jăl trong mă Đảng bơ̆n, kon pơlei bơ̆n păng ƀok Hồ ‘mêm kơ eng hlôi rơih iŏk.”

‘Nâu jĭ nơ̆r pơma hơdăh đơ̆ng Tổng Bí thư Nguyễn Phú Trọng tơ̆ Hop akŏm ‘măng mă mônh Anih chĕp kơ̆l pơgơ̆r Trung ương Đảng jăl XIII păng tơ̆ lơ hop akŏm gĭt kăl mưh Tổng Bí thư truh akŏm păng đei dôm nơ̆r pơma pơgơ̆r gĭt kăl. Ưh kơ sĭ ưh kơ ê Tổng Bí thư hlôi pơma hơdăh truh tơdrong ‘nâu ƀơ̆t tơpă yan âu ăn ƀôh, đơ̆ng rŏng vă jê̆ 40 sơnăm pơgơ̆r tơdrong jang tơplih ‘nao, đơ̆ng 1 teh đak dơnuh hin, đei anih tơmam drăm - ki thuơ̆t , anih jang mŭk drăm - tơpôl ưh kơ ‘lơ̆ng, hlôh vao tŏ sĕt, truh dang ei, Việt Nam hlôi yak tŏk jing teh đak tŏk bŏk tŏk pơdrŏng, đei iŏk yua jô̆ păh lăp; joh ayŏ, tơpôl hơnơ̆ng hơtŏk tơiung, tơdrong arih sa tơmam drăm păng jơhngơ̆m đon kơ kon pơlei đei tơplih ‘lơ̆ng; tơdrong jang pơjing Đảng păng khŭl jang chĭnh trĭ đei hơyak ‘lơ̆ng; grŭp tơgoăt tơgoăl đĭ đăng hơdrĕch hơdrŭng ưh kơ đei pơdơh đei hơmet ming; chĭnh trĭ, tơpôl sơđơ̆ng, khŭl lĭnh - sơđơ̆ng, rơngei, pơm tơm đei vei kơjăp; anih dơ̆ng păng bưng ai đơ̆ng teh đak roi ‘năr roi đei hơtŏk ‘lơ̆ng lơ̆m apŭng plĕnh teh: “Bơ̆n ‘noh kon sâu ƀok Hồ, Đảng jĭ Đảng Cộng sản Việt Nam hơdrĕch hơdrŭng ‘noh hơdrĕch hơdrŭng Việt Nam, teh đak ‘nâu athei hơtŏk tơiung mă pran ưh kơ gơh jur tơ̆ rŏng pơting hăm dôm teh đak nai, ưh kơ chĭu jei kơ đe nai, bơ̆n athei băt hơdăh jơhngơ̆m đon hơdrin thoi noh.”

Vă hơnhăk teh đak hơnơ̆ng hơtŏk tơiung hơtŏ hăm dôm teh đak jơ̆p plei teh nhen tơdrong Ƀok Hồ ‘meh vă, kiơ̆ kơ Tổng Bí thư ‘ngoăih kơ tơdrong 1 jơhngơ̆m đon đơ̆ng pơđĭ khŭl jang chĭnh trĭ păng rim răih kon pơlei lơ̆m teh đak ‘noh kŭm kăl kơ lăng gĭt tơdrong jang kang ƀô̆. Truh akŏm păng pơma pơgơ̆r tơ̆ ‘măng hop akŏm mă blŭng kơ Khŭl kơdră teh đak jăl jang 2021 – 2026, Tổng Bí thư Nguyễn Phú Trọng athei, jang ‘lơ̆ng hloh dơ̆ng tơdrong jang kang ƀô̆, mă loi ‘noh jĭ tơdrong vei lăng, hơlen lăng kang ƀô̆ vă rơih iŏk, hơmet ăn ƀlep dôm bơngai tơpă đei jơhngơ̆m đon ‘lơ̆ng, hơgei, tơpăt; đĭ jơhngơ̆m yua kơ teh đak, yua kơ kon pơlei lơ̆m dôm hơnih chĕp kơ̆l pơgơ̆r đơ̆ng khŭl kơdră teh đak păng khŭl kơ dră rim tơring. Tổng Bí thư tơtă: "‘Nĕ kơ “lăng tơmam ‘nâu jing tơmam to”, “‘nĕ kơ ƀôh ƀrê ngêh kơ đum”, ‘nĕ kơ đei puh kiơ̆ yua đơ̆ng dôm tơdrong đei yua kơ nê̆ tê̆, dôm tơdrong jang ưh kơ ‘lơ̆ng. Khŏm iung jang hŭt lê̆ dôm bơngai hư, kơ nê̆ găh jơhngơ̆m đon, trong arih; tơ jră rim tơdrong đei ƀôh chă apĭnh hơtŏk kơchư̆k jang, apĭnh chĕp kơ̆l, rơih iŏk bơngai ŭnh hnam, bơngai buăl ưh kơ đei tôm tơdrong pơkăp ‘lơ̆ng.”

Oei tơ̆ ‘măng pơgơ̆r pơih blŭng ‘Măng hop akŏm mă mônh, Quốc hội jăl XV lơ̆m ‘năr 20/7/2021, sơkơ̆t hơdăh ‘noh jĭ anih jang tang măt kơ jung hloh kơ kon pơlei, anih jang chĕp kơ̆l teh đak kơ jung hloh kơ teh đak Cộng hoà xã hội chủ nghĩa Việt Nam, Tổng Bí thư Nguyễn Phú Trọng athei, Quốc hội kăl kơ hơtŏk dôm jơnei păng hlôh vao đơ̆ng 75 sơnăm âu ki, hơnơ̆ng tơplih ‘nao, hơtŏk ‘lơ̆ng hloh dơ̆ng păng đei yua tơdrong jang vă pơm lăp ‘lơ̆ng hloh ‘meh vă, hơnăp jang chĭnh trĭ kơ teh đak lơ̆m jăl jang ‘nao. ‘Meh thoi noh Tổng Bí thư Nguyễn Phú Trọng kŭm ưh kơ hơiơt pơkă: “Đĭ đăng dôm bơngai tang măt Quốc hội bơ̆n jăl ‘nâu kăl kơ hơnơ̆ng hơtŏk ‘lơ̆ng jơhngơ̆m đon jang tơnăp, đĭ jơhngơ̆m yua kơ teh đak, yua kơ kon pơlei, tơgŭm ăn teh đak, pơvih pơvăn ăn kon pơlei, hơnơ̆ng pơhrăm, chĕp vei jơhngơ̆m đon ‘lơ̆ng, hơtŏk ‘lơ̆ng đon hlôh vao găh rim tơdrong, tơ jê̆ păng răp mơ̆ng nơ̆r tơgop đơ̆ng kon pơlei, jang kiơ̆ păng jang đang ‘lơ̆ng hloh hơnăp jang mă bơngai tăh hla păng kon pơlei pơjao ăn.”

Dôm nơ̆r pơma hơiă đơ̆ng Tổng Bí thư Nguyễn Phú Trọng - Bơngai cộng sản tơpăt, 1 ‘nu bơngai chĕp kơ̆l tôch kơ hơgei, bơngai ling lang vei kơjăp đơ̆ng nơ̆r pơma păng jang, iŏk kon pơlei pơm ‘long rek pơtŏ, iŏk kon pơlei pơm ‘lơ̆ng, iŏk tơdrong đei yua đơ̆ng kon pơlei pơm tơdrong hơgăt hơdrin; ling lang jê̆ kon pơlei, hơdai kon pơlei păng đei 1 plei nuih ‘mêm mơnat.