Dôm sơnăm âu ki, Đảng, tĕh đak Khul kơdră tĕh đak hơtŏk tơdrong chĕp kơ̆l pơgơ̆r păng đon hlôh vao, jang tơnăp đơ̆ng rim anih jang Đảng găh tơdrong jang ƀơm truh hơdrĕch kon kông, mă loi jĭ tơring kon pơlei kon kông păng groi kông lơ̆m chăl ‘nao. Jô̆ truh dang ei, đei 118 tơdrong tơgŭm oei đei yoa, tŏk bŏk tơlĕch jang tơ̆ tơring kon kông păng groi kông, lơ̆m nŏh đei 54 tơdrong tơgŭm tơpăt ăn kon pơlei kon kông, tơring kon kông păng groi kông; 64 tơdrong tơgŭm atŭm pơ ‘nhŏ hơdrol ăn kon pơlei kon kông. Lơ tơdrong jang nhen Tơdrong jang 135, Tơdrong jang tơm kơ tĕh đak găh atŏk tơ iung mŭk drăm, tơpôl tơ̆ tơring kon kông păng groi kông; găh tơjur tơnuh hin kơjăp ‘lơ̆ng; găh pơjing tơring tơrang ‘nao; kŭm nhen dôm tơdrong jang tơm găh pơgang, jŏh ayop kơ dŏ xoang, tơpôl; dôm tơdrong tơgŭm găh hnam oei, tĕh oei, tĕh choh jang xa, đak yoa; asong tŏk iŏk jên hăm jên kon tŏsĕt vă atŏk tơiung tơdrong choh jang xa, pơtho tơdrong jang, chă tơdrong jang… tơgŭm kơmăy kơmŏk, phŏng, hơdrĕch ‘long, kon yŏng; pơjao tĕh, pơjao bri; pơtruh choh jang xa, pơtăm ‘long đei tơrĕk bơ̆ jang kiơ̆. Gơnơm thoi nŏh, mŭk drăm, tơpôl tơ̆ tơring kon kông păng groi kông đei lơ tơdrong tơplih ‘lơ̆ng hơ iă.

Kơdră tơm chĕp kơ̆l Anih vei lăng hơdrĕch kon kông Hầu A Lềnh ăn tơbăt: “Tơdrong jang găh kon kông păng tơgŭm ăn kon kông ‘nŏh ưh kơsĭ tơchĕng hơlen hơtăih kiơ, mă ‘nŏh jĭ trong jang kơ tĕh đak găh tơdrong arih xa kơ kon pơlei, ‘nŏh jĭ dôm tơdrong mă kon pơlei oei tơtăm, kơna hơnăp jang đơ̆ng bơ̆n mưh bơ̆ jang 1 tơdrong kiơ athei yoa kon pơlei ngăl, ‘nâu jĭ hơnăp jang mă bơ̆n athei bơ̆ jang. Atŭm hăm ‘nŏh athei chă tơdrong jang ăn đe sư, chă pơjing tơdrong ‘lơ̆ng ăn đe sư jang tŏk vă gơ̆h tơlĕch jang ‘lơ̆ng dôm tơdrong tơgŭm, tơdrong jang kon kông lơ̆m khei ‘năr truh.”

Truh dang ei, lơ̆m tĕh đak đei 255 anih jang tơ̆ apŭng găh 58 dêh char, plt găh trung ương đei Thủ tướng tĕh đak chih tơbăt jang kĕh tơdrong jang pơjing tơring tơrang ‘nao, iŏk đei vă jê̆ 40% akŏm đĭ đăng anih jang tơ̆ apŭng lơ̆m tĕh đak. Tơring kon kông păng groi kông đei 1.052 xăh (iŏk đei 22,3%) jang kĕh jing tơring tơrang ‘nao, lơ̆m nŏh 106 xăh đơ̆ng tôch mơmat tat adrin jang tŏk jing xăh tơring tơrang 'nao; đei 27 apŭng tơ̆ tơring kon kông păng groi kông (iŏk đei 6%) jang kĕh tơring tơrang 'nao. Rim sơnăm, kơsô̆ unh hnam tơnuh tơ̆ tơring kon kông păng groi kông jur đơ̆ng 2 - 3%; dôm xăh, pơlei pơla mơmat tat dêh hlŏh jur đơ̆ng 3 - 4%; dôm apŭng tơnuh jur đơ̆ng 4 - 5%, đei tơring jur hlŏh 5%. Kơsô̆ unh hnam tơnuh, vă jê̆ tơnuh lơ̆m tơring jur 1,2%; hlôi đei 22 apŭng, 125 xăh, vă jê̆ 1.300 pơlei, lĕch đơ̆ng tơdrong mơmat tat dêh hlŏh.

Minh lơ̆m dôm tơring đei tơdrong tơplih pran ‘lơ̆ng ‘nŏh jĭ dêh char Sóc Trăng. Kiơ̆ ƀok Phan Thanh Nhã, tơ̆ xăh Vĩnh Tân (thĭ xăh Vĩnh Châu), dôm tơdrong tơgŭm ăn kon kông nhen Tơdrong jang tơm kơ tĕh đak găh tơjur tơnuh hin, găh pơjing tơring tơrang 'nao đei bơ̆ jang, hlôi pơm tơplih 'lơ̆ng um ai tơring tơrang tơ̆ âu. Khul kơdră pơgơ̆r tơring hơnơ̆ng pơih xă dôm trong jang hơ iă, đei yoa vă pơm hơtŏk tơdrong choh jang xa, tĕch mơdro ăn dôm unh hnam tơnuh, unh hnam kon pơlei kon kông.

Ƀok Phan Thanh Nhã ăn tơbăt: “Anih jang, trong nơnăm tơ̆ tơring tơrang, unh điên, hnam trưng, hnam pơgang, dôm anih pơyoa ăn tơpôl đei tơlĕch jên man hơmet tơ̆ tơring đei lơ kon pơlei kon kông oei xa. Kon pơlei bơngai kon kông, đei pơjing tơdrong ‘lơ̆ng vă jang xa, atŏk tơiung unh hnam, đơ̆ng nŏh kơsô̆ unh hnam tơnuh rim sơnăm tơ̆ xăh jur hơnơ̆ng, iŏk yoa jô̆ păh lăp kiơ̆ kơ̆l bơngai rim sơnăm tŏk hơnơ̆ng.

Tơdrong atŏk tơiung pơtho pơhrăm, hơtŏk tơdrong ‘lơ̆ng đơ̆ng khul bơngai jang ‘nŏh jĭ bơngai kon kông kŭm đei Đảng, tĕh đak năng kăl. Hrei ‘nâu, lơ̆m tĕh đak đei 316 Hnam trưng tĕh đak rong hŏk tro kon kông tơ̆ 49 dêh char, plt hăm hlŏh 109.000 ‘nu hŏk tro; dôm tơdrong tơgŭm găh pơtho pơhrăm, pơtho tơdrong jang ăn bơngai kon kông hơnơ̆ng đei tơlĕch. Đơ̆ng 2016-2020, đei hlŏh 800 rơbâu ‘nu bơngai kon kông đei pơtho ăn tơdrong jang, lơ̆m nŏh đei dang 412 rơbâu ‘nu bơngai jang tơ̆ tơring tơrang ‘nŏh jĭ bơngai kon kông đei tơgŭm hŏk tơdrong jang hơla kơ 3 khei. Ƀok Đào Trọng Độ, Kơdră Anih vei lăng hŏk pơhrăm hơnơ̆ng, Anih vei lăng pơtho tơdrong jang (Anih tơm vei lăng tơdrong jang xa, linh jĭ rơka păng tơpôl) ăn tơbăt, hăm dôm tơdrong hlôi jang đei, đon pơhnŏng truh sơnăm 2025, lơ̆m tĕh đak đei 50% bơngai jang ‘nŏh jĭ bơngai kon kông đei pơtho ăn tơdrong jang, rŏ năng gô jang đei mơ̆n:

“Tơ̆ trong 3 apăng 62 Luơ̆t pơtho tơdrong jang ‘nŏh đei nơ̆r chih, drŏkăn kon kông păng bơngai jang oei tơ̆ tơring tơrang mưh hŏk tơdrong jang kơ đĕh năr, hơla kơ 3 khei ‘nŏh đei tơgŭm kiơ̆ tơdrong hơgăt đơ̆ng Thủ tướng. Oei hăm tơdrong chă iŏk bơngai hŏk trung cấp, cao đẳng kŭm đei lơ tơdrong tơgŭm ăn kon pơlei kon kông hai.”

Kŭm hăm dôm tơdrong tơplih ‘lơ̆ng hơiă lơ̆m tơdrong jang atŏk tơiung mŭk drăm, tơpôl tơ̆ tơring kon kông păng groi kông, 'nŏh tơdrong arih xa găh jŏh ayŏ kơ dŏ xoang tơ̆ tơring kŭm đei lơ hơyak tŏk 'lơ̆ng. Dôm trong pơgơ̆r jŏh ayŏ kơ dŏ xoang đei tưk hơtŏk, anih jang, tơmam drăm, 1,2 tơdrong jŏh ayŏ kơ dŏ xoang tơ̆ tơring kon kông đei pôk pơ ư. Dôm tơdrong jŏh hơri hơxoang đei pơgơ̆r lơ̆m tĕh đak, pơgơ̆r tơ̆ tơring vang tơgop chĕp vei, tưk tơiung dôm kơjă kăp gĭt đơ̆ng jŏh ayŏ kơ dŏ xoang kơ dôm hơdrĕch kon kông. Mĭnh lơ̆m dôm tơdrong ‘nŏh đei nơ̆r pơma, chư chih kơ kon pơlei kon kông.