Tơ̆ ‘măng hop akŏm tơlĕch hơnăp jang sơnăm 2023 đơ̆ng jơnŭm jang hơdai tơroi pơtho khôi luơ̆t Trung ương pơgơ̆r kơ sơ̆ ‘năr 16/3, tơ̆ anih jang kơ Khŭl kơdră teh đak, dôm bơngai jang lơ̆m jơnŭm hlôi pơma dơnuh găh trong jang bơ̆jang kiơ̆ tơdrong tơm: Truh sơnăm 2030, đon pơm kiơ̆ ‘lơ̆ng Khôi luơ̆t teh đak athei jing tơdrong jang kăl hloh đơ̆ng rim bơngai lơ̆m tơpôl.

Phŏ Thủ tướng Trần Lưu Quang, Kơdră Jơnŭm jang hơdai tơroi pơ tho khôi luơ̆t Trung ương pơgơ̆r ‘măng hop akŏm. Hơdai hăm tơdrong tơlĕch athei hơnơ̆ng hơtŏk hơnăp jang đơ̆ng anih jang tơroi tơbăt, hơtŏk loi dơ̆ng hơlen lăng dăr lăng, dôm bơngai jang lơ̆m Jơnŭm Trung ương kŭm apĭnh Khŭl kơdră teh đak hơmet ăn jên jang vă tơlĕch jang tơdrong jang tơ roi pơ tho khôi luơ̆t, mă loi ‘noh jĭ hăm bơngai ưh kơ hlôh vao, bơngai kon kông, dôm tơring groi kông, tơring hơtăih hơtŏ, tơring đei tơdrong mŭk drăm mơmat tat păng tơring tơm găh vei sơđơ̆ng sơlam teh đak.