VOV4.Bahnar – Pơtoi kơ tơdrong hop akŏm mă 16, năr 12/10, Anih juăt jang kơ Kuôk hô̆i tơgop nơ̆r găh tơdrong pơm kiơ̆ Tơchơ̆t kơsô̆ 54 kơ Kuôk hô̆i jăl 14 găh pơm kiơ̆ tơchơ̆t kăp gĭt hơtŏk tơ iung pơlei tơm Hồ Chí Minh păng pơkăl keh đang dôm pơkăp jang hơlâu ăn pơlei tơm Hồ Chí Minh; tơbang xơkơ̆t 3 xơnăm pơm kiơ̆ Tơchơ̆t kơsô̆ 115 đơ̆ng Kuôk hô̆i jăl 14 găh pơkăp jên mong, jên kăp gĭt hăm pơlei tơm Hà Nội. Hơlen kĭ pơkăp pơkăl đơ̆ng Thủ tướng teh đak găh tơdrong athei pơdơh jang Kơdră tang măt ăn teh đak Cộng hòa xã hội chủ nghĩa Việt Nam. Tơgop nơ̆r ăn tơdrong hơmet ăn 'măng hop akŏm mă 4 kơ Kuôk hô̆i găh trong xek tơlang tơhlăk tơhlĭn tơ̆ minh ƀar anih iŏk jên pơkăp BOT. Adrol kơ noh tơ̆ hop akŏm ăh năr 11/10, Anih juăt jang Kuôk hô̆i drơ̆ng nơ̆r pơtruh ăn Kuôk hô̆i trong hơmet jên khei jang, jên hưu, tơgŭm bảo hiểm xã hội păng tơgŭm ăn bơngai đei kŏng lơ̆m xơnăm 2023. Ƀô̆ trưởng Anih tơm Jên hu Hồ Đức Phớc ăn tơbăt: kơchĕng hơmet jên khei jang, jên hưu, tơgŭm ƀao hiêm tơpôl păng tơgŭm bơngai đei kŏng pơtơm đơ̆ng năr 1/7/2023.

VOV/Lan tơblơ̆