Pơgê năr 19/10, tơ̆ dêh char Bắc Ninh, Kơ iĕng Kơdră chĕp pơgơ̆r Kuô̆k hô̆i Trần Thanh Mẫn hlôi pơm tơm Hop akŏm ‘măng mă 4 Dơnŏ anĭh bơ̆ jang vei lăng Oei sa jŏh ayŏ, Pơtho pơhrăm kơ Kuô̆k hô̆i .

Kơ iĕng Kơdră chĕp pơgơ̆r Kuô̆k hô̆i Trần Thanh Mẫn iung pơma tơ̆ hop akŏm

‘Măng hop akŏm lăng hơlen, ăn tơgop nơ̆r găh 4 tơdrong kăl ‘nŏh: Tơroi tơbăt dôm tơdrong jang sơnăm 2022 păng trong vă jang sơnăm 2023 kơ Dơnŏ anĭh; Tơroi tơbăt vang jang hơlen hơdăh jang kiơ̆ pơ prŏ jang atŏk tơ iung mŭk drăm, tơpôl sơnăm 2022; Tơroi tơbăt tơdrong jang dăr lăng jang kiơ trong bơ̆ jang, khôi luơ̆t găh mĭnh ƀar tơdrong: Pơtho pơhrăm mâm non tơ̆ rim hơnĭh jang kmăi kmŏk, hơnĭh pơm tơlĕch tơmam drăm; Pơtho pơhrăm đăi hŏk; Pơtho pơhrăm tơdrong jang păng Tơroi tơbăt dăr lăng jang kiơ̆ trong bơ̆ jang, khôi luơ̆t găh tang găn hơlau, tơjră tang găn hơ iŏh glơ̆k kơ đak. Iung pơma tơ̆ hop akŏm, Kơdră jang lơ̆m Dơnŏ anĭh tơm Chĭnh trĭ, Kơ iĕng Kơdră chĕp pơgơ̆r Kuô̆k hô̆i Trần Thanh Mẫn athei Dơnŏ anĭh kăl hơnơ̆ng kơrŭn đĭ jơhngơ̆m akŏm jang keh đang rim tơdrong jang tơlĕch ăn lơ̆m sơnăm 2022, mă kăl’nŏh pơm tơm, iung jang hơdoi pơgơ̆r keh đang Hop akŏm oei sa jŏh ayŏ lơ̆m tĕh đak sơnăm 2022.