VOV4.Bahnar - Hơnơ̆ng hop akŏm mă 10, Dơnŏ anĭh chĕp pơgơ̆r Kuô̆k hô̆i hlôi pơma dơnŭh Tơdrong vă pơjing Tơchơ̆t kơ Kuô̆k hô̆i găh jang pơlong năng mĭnh ƀar trong bơ̆ jang, tơgŭm djru git kăl ăn dêh char Khánh Hòa. Rim kơdră tang măt akhan, atŏk tơ iung Khánh Hoà ư̆h khan lăp hơdrô̆ atŏk tơ iung mŭk drăm mă lei oei tơgop vei kơ jăp pơm tơm kơ dĭh đak dơsĭ kơ Tĕh đak. Tơ̆ hop akŏm, đĭ đăng rim kơdră Dơnŏ anĭh chĕp pơgơ̆r Kuô̆k hô̆i drơ̆ng nơ̆r hăm trong vă pơjing Tơdrong tơchơ̆t kơ Kuô̆k hô̆i găh jang pơlong năng mĭnh ƀar trong bơ̆ jang, tơgŭm djru kăl atŏk tơ iung kơ Khánh Hòa lơ̆m tơdrong jang pơjing khôi luơ̆t, khôi luơ̆t tơm sơnăm 2022. Tơdăh đei pơdrơ̆ng kiơ̆ tơ̆ hop akŏm mă 3, dêh char Khánh Hoà gô đei jang kiơ̆ rim trong jang tơgŭm djru gĭt kăl nhen; Atŏk lơ kon jên hre tŏk iŏk; đei kon jên bơ̆ jang Trung ương tơmơ̆t ăn dơ̆ng; dêh char gơ̆h tơchơ̆t kơ dĭh pơ prŏ jang tơ iung pơjing hơnĭh bơ̆ jang; tơchơ̆t tơplĭh iŏk yua tĕh jang ƀa tim mă trŭh 500ha, tơplĭh bri jang sa tim mă trŭh 1.000ha kiơ̆ nơ̆r pơjao đơ̆ng Thủ tướng Tĕh đak.

Tơblơ̆ nơ̆r: Amazưt